“მერები და საკრებულოს თავმჯდომარეები მოადგილეებს ირჩევენ. არჩევანი, სამწუხაროდ, კვლავ მამაკაცებზე კეთდება და ქალებისთვის არც მოადგილეების პოსტები აღმოჩნდა ხელმისაწვდომი. ქალთა წარმომადგენლობა თვითმართველობის ორგანოებში საგანგაშოდ დაბალია. 64 მუნიციპალიტეტიდან მხოლოდ ერთ მუნიციპალიტეტს ჰყავს ქალი მერი და ერთს ქალი ვიცე მერი. მერის მოადგილედ მხოლოდ 6 ქალი დაინიშნა. საკრებულოს თავმჯდომარედ 5 ქალი, საკრებულოს თავმჯდომარის მოადგილედ კი მხოლოდ 3 ქალი აირჩიეს“, _ ამ შინაარსის წერილს “ჟურნალისტთა ქსელი გენდერული თანასწორობისთვის“ წევრები ავრცელებენ და მოუწოდებენ მერებს და საკრებულოს თავმჯდომარეებს მოადგილეებად ქალი დანიშნონ.
“მერის მოადგილეების დანიშვნის პროცესი არ დასრულებულა. „ჟურნალისტთა ქსელი გენდერული თანასწორობისათვის“ შეახსენებს არჩეულ მერებს, რომ მათ მუნიციპალიტეტებში მცხოვრები მოსახლეობის ნახევარზე მეტი ქალია და ისინი ამ ქალების მერებიც უნდა იყვნენ. ქალთა საჭირობების უკეთ გამოვლენა, გაანალიზება და არსებული პრობლემების მოგვარება ქალთა ჩართულობის გარეშე გაუჭირდებათ. „ჟურნალისტთა ქსელი“ მოუწოდებს მერებს, დანიშნონ ქალები ვიცე-მერებად და მოადგილეებად”, _ ნათქვამია წერილში.
ამ ეტაპზე გურიაში ოზურგეთის მუნიციპალიტეტის მერს კონსტანტინე შარაშენიძეს და ლანჩხუთის მუნიციპალიტეტის მერს ალექსანდრე სარიშვილს აქვს შესაძლებლობა მოადგილედ ქალი დანიშნოს.
ალექსანდრე სარიშვილი ამ ეტაპზე არ გვიმხელს, ვინ იქნება მისი მეორე მოადგილე: “ყველაფერს გაიგებთ მალე და თავის დროზე“, – ამბობს სარიშვილი.
“შესაძლოა, იყოს თუ იქნება შესაბამისი კანდიდატურა“, _ ეს კომენტარი კონსტანტინე შარაშენიძეს ეკუთვნის.
გავრცელებული ინფორმაციით, მისი მოადგილეები ოსიკო თოთიბაძე და ირაკლი სირაძე იქნებიან. ვინ იქნება მისი მესამე მოადგილე, ჯერჯერობით, უცნობია. ასევე, უკვე ცნობილია, რომ ჩოხატაურის მუნიციპალიტეტის მერიის ორივე მოადგილე მამაკაცია. გურიის სამივე მუნიციპალიტეტის საკრებულოს თავმჯდომარეების და მოადგილების თანამდებობას მამაკაცები იკავებენ.
