კანონპროექტი, რომელიც ექსპორტზე გატანის მიზნით მარიხუანის წარმოებას ითვალისწინებს, საერო და სასულიერო პირებში კითხვებს აჩენს. საპატრიარქო ხელისუფლებას ნარკობარიგების მფარველობაში პირდაპირ ადანაშაულებს და აცხადებს, რომ კანონპროექტი კონკრეტული პირების ბიზნესინტერესების გათვალისწინებით შეიქმნა.
იმ შემთხვევაში, თუ პარლამენტმა მარიხუანის კულტივაციის შესახებ კანონპროექტი დააკანონა, საპატრიარქო ხელისუფლებას, ე.წ. “სანთლების რევოლუციის” მოწყობას ჰპირდება.
_ ვისი ინტერესების გათვალისწინებით შეიქმნა აღნიშნული კანონპროექტი _საკითხზე ,,გურია ნიუსთან“ პოლიტოლოგი გია ნოდია საუბრობს.
_ ბატონო გია, კანონპროექტი მარიხუანის ექსპორტის შესახებ, რომლის განხილვა პარლამენტმა დროებით შეაჩერა, საზოგადოების უმრავლეს ნაწილში დიდ გაუგებრობას იწვევს. როგორ ფიქრობთ, რატომ დადგა დღის წესრიგში აღნიშნული ინიციატივის დაყენება? ფიქრობთ თუ არა, რომ კანონპროექტს კონკრეტული პირები, მათ შორის, ბიზნესიდან და მაღალი თანამდებობებიდან საკუთარი ინტერესების გათვალისწინებით ლობირებენ?
_ ფაქტობრივად, თანხა დაანგარიშებულია. როცა საქმე ეხება ასეთ კონკრეტულ ბიზნესს, როგორ შეიძლება, არ ვივარაუდოთ, რომ შეთანხმება არსებობს თუ ვინ შეიძლება იყოს მარიხუანის წარმოების ლიცენზიის მფლობელი. ამ ინიციატივას ბიძინა ივანიშვილი რომ არ უჭერდეს მხარს, კანონპროექტი არ შეიქმნებოდა. ივანიშვილი თავად არის ბიზნესმენი, ამიტომ გამორიცხული არ არის, რომ მარიხუანის ბიზნესში ჩართვა მისი ინტერესის საგანი იყოს.
_ ბატონო გია, უცნაურია, როცა მარიხუანის ექსპორტის შესახებ კანონპროექტის წარმდგენია ის უწყება, რომელსაც ნარკოდანაშაულის აღკვეთა ევალება. როგორ ფიქრობთ, რა არის ამის მიზეზი?
_ როგორც ჩანს, ასეთი ინიციატივის წარდგენა გულისხმობს სახელმწიფოს ვალდებულებას, რომ ის გააკონტროლებს ამ სფეროს, იმ თვალსაზრისით, რომ “ბარიგების” ხელში არ ჩავარდეს. თავისთავად, უცნაურია, რომ შს მინისტრი არის ამ კანონპროექტის წარმომდგენი და არა ვთქვათ, ეკონომიკის, მაგრამ, როგორც ჩანს, ამ ლოგიკით ფიქრობენ, ბოროტად არ იქნას გამოყენებული წარმოება.
_ შს მინისტრის თქმით, სამინისტრო ეფექტური კონტროლის გახორციელებას შესძლებს. როგორ ფიქრობთ, კანონპროექტის მიღების შემთხვევაში, რამდენად არსებობს რისკი იმისა, რომ გადამუშავებული მარიხუანა ბაზარზე არალეგალურად მოხვდეს?
_ უფრო მეტად შესაძლებელია, რომ მარიხუანა შიდა ბაზარზე მოხვდეს არალეგალურად. სახელმწიფოს მარიფათზეა დამოკიდებული რამდენად გაართმევს თავს კონტროლის ეფექტურად განხორციელებას.
თავისთავად, მარიხუანის ექსპორტი სარფიანი ბიზნესია. აქ ეკონომიკური მხარე არ არის იმდენად პრობლემური, რამდენადაც _ მორალური, იმ თვალსაზრისით, რომ ერთი მხრივ, საკუთარ ხალხს ეუბნებიან, რომ მისი მარიხუანა მავნებელია და მეორე მხრივ, ექსპორტზე გააქვთ, თუნდაც სამედიცინო და კოსმეტიკური მოხმარების მიზნით“, _გვითხრა ნოდიამ.
პარლამენტმა მარიხუანის ექსპორტის შესახებ კანონპროექტის განხილვა დროებით შეაჩერა, თუმცა მისი განხილვა დღის წესრიგში ისევ დგას. ამასთან, ჯერჯერობით, გაურკვევლია, რა სახეს მიიღებს ხელისუფლებისა და სასულიერო პირების დაპირისპირება.
