ფეხბურთელი შოთა არველაძე ბახმუტში, ოკუპანტებთან დაღუპული ქართველი მებრძოლების შესახებ ემოციურ პოსტს სოციალურ ქსელში აქვეყნებს.
“თუ ასე უერთმანეთოდ, შეურიგებლად და უმისამართოდ ვაპირებთ ცხოვრების გაგრძელებას, თუ იქამდე მივალთ, რომ დაღუპული ხალხის მშობლებს თანადგომას არ ვაგრძნობინებთ და ღირსეული შვილის აღზრდისთვის მადლობას ვერ ვიტყვით, ფასი არ ექნება ჩვენი შვილებისთვის ნათქვამ არც ერთ სიტყვას, შეგონებას და რჩევას. როგორ მივედით იქამდე, რომ ჩვენივე სისხლს და ხორცს თანადგომას ვერ ვუცხადებთ და ხმამაღლა ვერ ვამბობთ, რომ ტრაგედია დაგვემართა. ძალიან უცხოა ეს მდგომარეობა და მიჭირს გაგება, მაშინ როცა ბიჭები იღუპებიან, ჩვენ როგორ ვერ ვარქმევთ ტრაგედიას თავის სახელს და როგორ გვიჭირს ამაზე ლაპარაკი.
დიდება გმირებს!” – წერს არველაძე.
უკრაინაში, დონეცკის ოლქის ქალაქ ბახმუტში 5 ქართველი მებრძოლი ერთ დღეს მოკლეს.
არსებული ინფორმაციით, ქართველ მებრძოლებს “კადიროველები” დაესხნენ თავს.
