18 ივლისს, განათლების განვითარების და დასაქმების ცენტრმა (EDEC), ოზურგეთის დემოკრატიული ჩართულობის ცენტრში საჭიროებებზე დაფუძნებული შეზღუდული შესაძლებლობის მქონე პირთა მხარდამჭერი სერვისების შესახებ მრგვალი მაგიდა გამართა.
შეხვედრას ბევრი სტუმარი ჰყავდა _ ღონისძიებას ესწრებოდნენ გურიის სახელმწიფო რწმუნებულის მოადგილეები: ქეთევან მოისწრაფიშვილი, გია ებრალიძე, ოზურგეთის მერის მოადგილე ირაკლი სირაძე, მუნიციპალიტეტის მერიის საჯარო მოხელეები, საქველმოქმედო ასოციაცია “გურიას” წარმომადგენლები, ჟურნალისტები და დაინტერესებული პირები.
ქეთი მოისწრაფიშვილმა მადლობა გადაუხადა ღონისძიების ინიციატორებს და თქვა, რომ ბევრი რამ კეთდება შშმ პირთა საზოგადოებაში ჩართულობისთვის, თუმცა, არაადაპტირებული გარემო მაინც არსებობს და საჭიროა მაქსიმალური ძალისხმევა, რომ პროცესები დაჩქარდეს. მან ისაუბრა ასოციაცია “გურიას” შესახებ, რომელიც ოზურგეთში მდებარეობს და მათი წევრები ყველა ღონისძიებაში მონაწილეობენ. არიან ძალიან აქტიურები და მოტივირებული ადამიანები.
მოისწრაფიშვილმა აქცენტი გააკეთა შეზღუდული შესაძლებლობის მქონე პირთა მხარდამჭერი სერვისების გაუმჯობესებაზე და ამ მიმართულებით მუშაობის გააქტიურებაზე.
თბილისის მუნიციპალიტეტის მერის შეზღუდული შესაძლებლობის მქონე პირთა საკითხებზე მომუშავე საბჭოს აღმასრულებელმა მდივანმა გიგა სოფრომაძემ თავის გამოსვლაში ინკლუზიური გარემოს უზრუნველყოფის შესახებ ისაუბრა.
მან ისიც განმარტა, რომ შშმ პირთათვის განსაზღვრული სტატუსი არ არსებობს და შშმ პირად შეიძლება ჩაითვალოს მძიმე წონის ადამიანიც, ასევე, ორსული, ტურისტი, რომელიც მძიმე ბარგით გადაადგილდება და ასე შემდეგ. თუმცა, დარბაზში მსხდომთა შორის, ამ აზრმა არაერთგვაროვანი აღქმა გამოიწვია და თქვეს, რომ ასე არ არის.
გამომსვლელთა შორის, ოზურგეთის საკრებულოს დეპუტატმა ლელა საჯაიამ არსებულ პრობლემაზე ისაუბრა:
_ სხვა ადგილებში ნუ ვეძებთ არაადაპტირებულ გარემოს. ჯერ ეს ადამიანები მერიაში შემოვუშვათ, აქ შევუქმნათ ადაპტირებული გარემო, სადაც ლიფტიც კი არ არის, ასევე, სხვა ბევრი რამეც არის მოსაწესრიგებელი.
ოზურგეთის მუნიციპალიტეტის მერიის საფინანსო სამსახურის უფროსმა გია მამაკაიშვილმა განმარტა, რომ ამ კუთხით უკვე დაწყებულია მუშაობა.
_ მთლად ასეც არ არის. იყო პრობლემა. ჩვენ მივმართეთ იმ პირებს, მრავალსართულიანი ბინების ლიფტების რეაბილიტაცია ვინც გააკეთა, თუმცა, მათ განაცხადეს, რომ კონკრეტულად ასეთი საჭიროების ლიფტების პრაქტიკა მათ არ ჰქონიათ. თუმცა, შემდეგ მოვიძიეთ რამდენიმე პირი და წლის ბოლომდე პროექტს შევადგენთ, _ თქვა მან.
საქველმოქმედო ასოციაცია “გურიას” აქტიურმა წევრმა თამუნა ლურსმანაშვილმა თავის გამოსვლაში დიდი ხნის წინ დასმული და მაინც მოუწესრიგებელი პრობლემის შესახებ ისაუბრა:
_ ჩვენ, დიდი ხანია, ვითხოვთ, რომ ოზურგეთში, როგორც ქალაქს შეეფერება, იყოს სველი წერტილი, მაგრამ, ჯერჯერობით, ამას ვერ მივაღწიეთ. თუმცა, საკითხი არაერთხელ დავსვით.
მრგვალი მაგიდის ერთგვარი ფინალი იყო, ევროპის ფონდის მიერ ორგანიზებული კვლევის, “საჯარო ფინანსების გამოყენება, შეზღუდული შესაძლებლობის მქონე პირთა ინკლუზიისა და თანამონაწილეობისათვის”, შედეგებზე და კვლევაზე დაფუძნებული რეკომენდაციების მოსმენა, რომელიც მოძრაობა “ხელმისაწვდომი გარემო ყველასთვის” _ გამგეობის წევრმა გიორგი ალავიძემ წარმოადგინა:
_ მინდა ვთქვა, რომ სოფლებში ძალიან ბევრი უხილავი შშმ პირი არსებობენ. აუცილებლად უნდა მოვძებნოთ და აღმოვაჩინოთ ეს პირები. შშმ პირთათვის ადაპტირებული გარემოს შექმნა სახელმწიფოს ერთ-ერთი უმთავრესი საზრუნავი უნდა იყოს. აქ ითქვა, რომ გუბერნიაში არ არის ადაპტირებული გარემო. ზემოთ იქნებ ავიდე, მაგრამ ხანძრის შემთხვევაში, დაბლა როგორ უნდა ჩამოვიდე? სწორედ ასეთი არადაპტირებული გარემო ქმნის პრობლემებს. არც ერთი შენობა არ არის ადაპტირებული. ჩვენი თემის მოთხოვნები, სრულად უნდა იქნეს გათვალისწინებული, თუ არადა, მაშინ რა გვინდა ამ საბჭოში? _ თქვა მან.
ღონისძიების მსვლელობისას სლაიდების მეშვეობით აჩვენეს, ქვეყნის სხვადასხვა კუთხეში როგორ არის ან არ არის შექმნილი ადაპტირებული გარემო. ისაუბრეს უნივერსალურ დიზაინზე, რომელიც დამოკიდებულია ადამიანის ფანტაზიასა და აღქმაზე. აჩვენეს პანდუსებისა და კიბეების შერწყმის საუკეთესო ნიმუშები, შადრევნები და მათი მოხერხებული განლაგება საზოგადოების თავშეყრის ადგილებში, ქუჩებში საგანგებოდ შექმნილი ადაპტირებული კუთხეები. ასევე, ხაზი გაუსვეს ქვაფენილის მოუხერხებლობას ადაპტირებულ გარემოში.
