„სიკვდილს ელოდება ადგილობრივი ხელისუფლება თუ რა ხდება?! ამდენ ხანს როგორ ვერ მოაგვარეს ეს პრობლემა?! სანამ დიდი უბედურების მომსწრე არ გავხდებით, მანამდე არ გამოიფხეკავენ ყურებს?! მაინცდამაინც მსხვერპლს ელოდებიან, რომ რამე ზომები მიიღონ?! სიცოცხლე უკან არ ბრუნდება. კვირაში 2-3 მანქანა სულ იმტვრევა ამ ადგილას, მისახედია აქაურობა“, _ საკუთარ გულისტკივილსა და წყრომას უკვე მერამდენედ ხმამაღლა აფიქსირებენ ლანჩხუთელები გზის იმ მონაკვეთთან დაკავშირებით, რომლითაც ავტობანი ცენტრალურ ავტომაგისტრალს უკავშირდება.
აღმოსავლეთ-დასავლეთის E60 ჩქაროსნული ავტომაგისტრალის სამტრედია-გრიგოლეთის მეორე მონაკვეთის ჯაპანა-ლანჩხუთის 14 კმ-იან ახალ გზაზე ავტოტრანსპორტის მოძრაობა გასული წლის ივნისში გაიხსნა. გზა ქალაქ ლანჩხუთის გარკვეულ მონაკვეთსა და მუნიციპალიტეტის სოფლებს: ჯაპანას, ქვიანს, ნიგოითს და შუხუთს გაივლის.
პროექტის მიზანი, ქვეყნის მასშტაბით ყველაზე მაღალი ინტენსივობის საერთაშორისო მნიშვნელობის გზაზე, მზარდი სატრანსპორტო ნაკადების გამტარუნარიანობის გაზრდა, უსაფრთხო მგზავრობისა და შეუფერხებელი სატრანზიტო მიმოსვლის უზრუნველყოფა გახლდათ.
ის, რომ ავტომაგისტრალის ჯაპანა-ლანჩხუთის მონაკვეთის გახსნით მზარდი სატრანსპორტო ნაკადების გამტარუნარიანობა გაიზარდა და შეუფერხებელი სატრანსპორტო მიმოსვლის უზრუნველყოფაც მოხდა, ამაზე მოქალაქეები დიდად არ დაობენ. მათთვის მთავარ პრობლემას ის ქმნის, რომ ეს გზა, ფაქტობრივად, ქალაქის ცენტრში, პირველი საჯარო სკოლისა და „მედალფას“ კლინიკის მიმდებარე ტერიტორიაზე ამოდის და გახშირებული ავტოსაგზაო შემთხვევებიდან გამომდინარე, საფრთხის შემცველია.
გზის აღნიშნულ მონაკვეთზე ავარია რამდენიმე დღის წინაც მოხდა. „ტოიოტა ქამრი“ ჯერ „ტოიოტას“ ჯიპს შეეჯახა, შემდეგ განათების ბოძს. თავის მხრივ, წონასწორობა დაკარგული ჯიპი კი იქვე ხუთსართულიანი ბინების ეზოში შევარდა და ტაქსს დაეჯახა. საბედნიეროდ, შემთხვევას მსხვერპლი არ მოჰყოლია. თუმცა, სამივე ავტომობილი ძალიან დაზიანდა.
თვითმხილველთა თქმით „ქამრი“ ავტობანიდან მთავარ მაგისტრალზე ამოდიოდა და მარჯვნივ სვლის ნაცვლად „პირდაპირ გააჭრა“, რასაც ცენტრალურ გზაზე მოძრავ ჯიპთან შეჯახება მოჰყვა. „ქამრის“ მგზავრების თქმით, ისინი ცენტრალურ გზაზე ბათუმის მიმართულებით მოძრაობდნენ.
„დაწერეთ, ყურადღება მოგვაქციონ. რა უბედურებაა, უკვე რამდენი ავარიაა, როდემდე უნდა ვუყუროთ ამ საშინელებას?! აქ პატრული ჯარიმებზე ნუ ფიქრობს, პრობლემის მოგვარებაზე იზრუნონ!
ხომ შეიძლება ერთი შუქნიშანი გააკეთონ, სანამ ვინმეს სიცოცხლე შეეწირება?! ყველაზე სახიფათო მონაკვეთია.
ბევრჯერ გადავრჩით, ღმერთმა დაგვიფარა ცუდისგან, მაგრამ ხვალ ან ზეგ რა მოხდება, ვინ იცის, რისგან ვართ დაცულები?! სანამდე უნდა ვიყოთ ბედის ანაბარად?! ყურადღებაა საჭირო! სანამ გვიან არ არის, სანამ რაიმე სავალალო არ მოხდება, მანამდე მიაქციონ ყურადღება ამ მდგომარეობას! არ ყავს ამ რაიონს პატრონი!
დადგით შუქნიშანი?! მერამდენედ ვწერთ ხალხი ამაზე და არავითარი შედეგი არაა. მეტი გამოსავალი არაა, გზა უნდა გადავკეტოთ! ვინმემ უნდა ითავოს ეს საქმე, სანამ ვინმე მოკვდებოდეს! ურემი რომ გადაბრუნდება გზა მერე გამოჩნდებაო. წერე და იკითხეს პრინციპია, თუ რა არის?! მგონი, ჯობია, ხალხმა გზა გადავკეტოთ! თუ არ შეიძლება ცენტრალური გზაა?! აბა, ის შეიძლება, ამდენი ადამიანი რომ ზიანდება, თუ მაინდამაინც ვიღაც უნდა დაიღუპოს…
მერამდენე ავარიაა ერთსა და იმავე ადგილას. ვიცით, კიდევ მოხდება. ღმერთმა ნუ ქნას და ვიღაცა შეიძლება დაიღუპოს. ეს იცის შესაბამისი სამსახურების მესვეურებმაც თბილისშიც, აქაც. მიკვირს რას ელოდებიან?! ასეთი ყურწაგდებულობა შეიძლება?!
შუქნიშანი ვერ დაკიდეს, შუქნიშანიიი! ეჰჰ სადაა ახლა გოგიე წულაია.
პატრული მაინც დააყენონ, თუ სხვა გამოსავალი არაა, დარბიან გიჟებივით. მარა, პატრულიც წესების დარღვევით მოძრაობს მაქ, სხვას რა უნდა მოსთხოვო. ვინ ვის უთმობს და ვინ არ უთმობს, ვერ გაიგებ. ფეხით გადასვლაც საშიშია უკვე. საგზაო ნიშანს არავინ უყურებს, სანამ ავტობანის გაგრძელება არ გაიხსენება, უნდა დაიდგას შუქნიშანი ან დადგეს მარეგულირებელი და გააკონტროლოს! უამრავი ბავშვი მოძრაობს დღის მანძილზე ამ ტერიტორიაზე. არ მესმის საქმისადმი ასეთი უპასუხისმგებლობა და ინერტული დამოკიდებულება“, _ ამბობენ გზის აღნიშნულ მონაკვეთზე არსებული მდგომარეობით შეწუხებული მოქალაქეები.
ლანჩხუთელთა მეორე ნაწილი თვლის, რომ შუქნიშანი არსებულ პრობლემას ვერ მოაგვარებს, პირიქით, მათი აზრით, უფრო ქაოტური სიტუაცია შეიქმნება და მდგომარეობა კიდევ უფრო გართულდება. მათი აზრით, შეცდომა თავშივე, პროექტის გაკეთებისას დაიშვა. ისინი, ასევე, აქცენტს მძღოლების უყურადღებობაზე აკეთებენ, რომლებიც მოძრაობის წესებს არ იცავენ:
„შუქნიშანი ვერ უშველის, უფრო მეტი ქაოსი შეიქმნება. მე წრიულით ვხედავ მაქ გამოსავალს, წრიულზე მოძრაობა მეტ-ნაკლებად ყველამ იცის და თავისით დარეგულირდება ნაკადი. მაგის გამკეთებლებს არ უნდათ ცვლილება, რადგან შეცდომის აღიარება გამოუვათ, არადა, ეს აღარ არის შეცდომა… დრონით გადაღებულზე შედგენილმა ნახაზმა იცის ეს, ჩამობრძანდნენ და ნახონ, რა ხდება!
არავითარი შუქნიშანი არაა საჭირო მაქ. მაგას სჭირდება ტვინი, რომ ცენტრალურ გზაზე მიმავალ მანქანას გზა უნდა დაუთმო. ცენტრალურზე მიმავალმა ამ მონაკვეთში უნდა შეანელოს სვლა, ვინაიდან კვეთაა და ორი გზა შემოდის სამხრეთიდან და ჩრდილოეთიდან. უაზროდ არ უნდა გავარდე ცენტრალურ გზაზე და არც იქიდან არ უნდა შემოვარდეს უაზროდ, აქ ყოველდღე ირღვევა საგზაო მოძრაობის წესები და მარტო მაგ მონაკვეთზე კი არა _ თავისუფლების ქუჩაზე, თბილისის ქუჩაზე ისე დაფარფატებენ, ზოლს არ იცავს, არც ამავალი და არც ჩამომავალი მანქანა. მოკლედ, ტვინია საჭირო და არა შუქნიშანი!
შუქნიშანი კარგია შეიძლება ავარიისთვის, მაგრამ ახლა რა ხდება და შუქნიშანი რომ დააყენო, პარალიზებული გახდება მთლიანი ქუჩა საცობებისგან.
დიდად წერია იქ ბათუმი მარჯვნივ, ბათუმიდან რომ მოდიხარ თბილისი მარცხნივ, დადიან 200-ით, არავინ უყურებს მაგ ტრაფარეტს. ჯერ მოძრაობის წესების დაცვა უნდა ვისწავლოთ და თუ არ გაამართლებს, მერე ვისაუბროთ უნდა შუქნიშანზე.
10 წუთის განმავლობაში ვუყურე მაქ მოძრაობას, პატრულიც იქ უთმობდა გზას, სადაც არ უნდა დაეთმო და ხალხს რა უნდა მოსთხოვო?!
არ უნდა გახსნილიყო ავტობანის ჯაპანა-ლანჩხუთის მონაკვეთი. უბრალოდ, ამის არც აუცილებლობა იყო და არც მნიშვნელოვანი შეღავათი მიუცია გზის ამ მონაკვეთს მძღოლებისათვის! “ _ ამბობენ ლანჩხუთელები.
მოსახლეობის მხრიდან მრავალჯერ გაჟღერებული პრეტენზიების გასაცნობად „გურია ნიუსი“ საავტომობილო გზების დეპარტამენტს დაუკავშირდა. უწყების პრესსამსახურში გვითხრეს, რომ პროექტის მიხედვით, რაც იყო გათვალისწინებული საგზაო უსაფრთხოების კუთხით, ყველაფერი შესრულებულია და მთავარი პრობლემა მძღოლების მხრიდან დაწესებული საგზაო წესების დაუმორჩილებლობაა. თუმცა, როგორც გზების დეპარტამენტში გავარკვიეთ, შექმნილი ვითარებიდან გამომდინარე, შესაბამისი სამსახურის წარმომადგენლები, საპატრულო პოლიციის წარმომადგენლებთან ერთად უახლოეს დღეებში ადგილზე შეისწავლიან საკითხს და დაიგეგმება, რა შეიძლება გაკეთდეს საგზაო უსაფრთხოების პარამეტრების გასაუმჯობესებლად.
