მედიისა და აქტივისტების ინფორმაციით, შვედეთში ჩეჩენი ოპოზიციონერი ბლოგერი ტუმსო აბდურახმანოვი მოკლეს. ინფორმაციას ტელეგრამ არხი 1 ADAT ადასტურებს.
ტელეგრამ არხი, რომელსაც ჩეჩენი ოპოზიციონერები მართავენ, წერს, რომ აბდურახმანოვის მოკვლის შესახებ გავრცელებული ინფორმაცია სიმართლეა. თუმცა ინფორმაცია ჯერჯერობით ოფიციალურად არ დადასტურებულა.
ჩეჩნური ოპოზიციური Telegram არხი სხვა დეტალებს არ აკონკრეტებს, თუმცა ავრცელებს ინფორმაციას, რომ სპეცსამსახურებმა ტუმსო აბდურახმანოვის ძმა, მუჰამედი გადამალეს.
“რაც არ უნდა გაგვიჭირდეს მომხდარის აღიარება, სამწუხაროდ, მისი გარდაცვალების შესახებ ჭორები სიმართლე აღმოჩნდა.
რამდენიმე დღეა ჩვენ ვაწარმოებთ შიდა გამოძიებას ტუმსოს მკვლელობის საქმეზე. თავიდან ვერ ვიჯერებდით მომხდარს, მაგრამ ამ ეტაპზე, როგორც ყოვლისშემძლე ალაჰმა ისურვა, მისი გარდაცვალების დამადასტურებელი საკმარისი ინფორმაცია გვაქვს და მისი ძმა, მუჰამედი სპეცსამსახურებმა დამალეს.
ჩვენს მასალები, რომელიც ალაჰის ნებით იქნა მოპოვებული ევროპიდან და ჩეჩნეთის მამხილებელთა ქსელის მეშვეობით, ჩვენ არ შეგვიძლია გამოვაქვეყნოთ ჩვენი უსაფრთხოებისთვის და მამხილებელების გამო.
ტუმსოს ადამიანთა ჯგუფმა ღამით ესროლა, ამ წუთებში მკვლელობის დეტალებს იძიებენ.
ჩვენ ღრმა მწუხარებას გამოვთქვამთ ამ ამბის გამო და ვუსამძიმრებთ ტუმსო აბდურახმანოვის ახლობლებს, ღმერთმა მიუტევოს მას ცოდვები,“ – წერს 1ADAT ტელეგრამ არხზე.
2 დეკემბერს აბდურახმანოვმა შეწყვიტა კონტაქტზე გამოსვლა. უფლებადამცველები ამბობდნენ, რომ ის დაიკარგა. ასევე გავრცელდა ინფორმაცია მისი მკვლელობის შესახებ, რომელიც ამ დრომდე დაუდასტურებელი იყო.
ტუმსო აბდურახმანოვი ცნობილია ჩეჩნეთის ხელისუფლების კრიტიკით. 2015 წელს მან დატოვა რუსეთი მას შემდეგ, რაც კონფლიქტი ჰქონდა ჩეჩნეთის ხელმძღვანელის რამზან კადიროვის ნათესავებთან. მან მიიღო პოლიტიკური ლტოლვილის სტატუსი შვედეთში. ჩეჩნეთში აბდურახმანოვს ისლამურ სახელმწიფოსთან კავშირში ადანაშაულებენ. 2020-2021 წლებში იყო მცდელობა აბდურახმანოვისა და მისი ძმის, მუჰამედის მკვლელობის. 2021 წლის დეკემბერში ტუმსო აბდურახმანოვმა განაცხადა, რომ ჩეჩნეთში მისი ცხრა ნათესავი გაიტაცეს.
ავტორი
