ჩოხატაურის მუნიციპალიტეტის სოფელ ზემოხეთის საჯარო სკოლა წელს ერთმა მეცხრეკლასელმა დაამთავრა. უჩა თევზაძე ახალი სასწავლო წლიდან მეზობელ სოფელში გააგრძელებს განათლების მიღებას.
“მეორე კლასიდან, შვიდი წლის განმავლობაში ვსწავლობდი მარტო ზემოხეთის საჯარო სკოლაში. ჩვენი სკოლა ცხრაკლასიანია, აქედან გამომდინარე, ახალი სასწავლო წლიდან მომიწევს საჭამიასერის საჯარო სკოლაში სწავლა.
ფეხბურთის თამაშით ვარ დაკავებული. თავისუფალ დროს, მიუხედავად იმისა, რომ ბავშვების ნაკლებობაა, მაინც ვახერხებთ თამაშს. ძალიან კარგი მეგობრობა გვაკავშირებს ერთმანეთთან, და-ძმებივით ვიზრდებით.
სკოლის დამთავრების შემდეგ საერთაშორისო ურთიერთობებზე ან დიპლომატიურზე მინდა ჩაბარება, ეს სამომავლო გეგმები არის და ამისთვის კარგად უნდა მოვემზადო.“- აღნიშნა ჩვენთან საუბრისას უჩა თევზაძემ.
უჩას საყვარელი მწერალია ნოდარ დუმბაძე და ხშირად კითხულობს ქართველი მწერლების შემოქმედებას.
ჰყავს მშობლები და და-ძმა. ძმამ მეოთხე კლასი დაასრულა, დამ _ მერვე.
“მინდა გითხრათ, რომ ჩემი ძმაც მარტო სწავლობს კლასში. რატომღაც ასე მოხდა, მაგრამ ჩვენი ბედით კმაყოფილები ვართ. ძალიან კარგი პედაგოგები და სამეგობრო გვყავს“, _ ამბობს უჩა თევზაძე.
ქართული ენისა და ლიტერატურის პედაგოგის, ერეკლე უღრელიძის თქმით, უჩამ ზემოხეთის საჯარო სკოლა რამდენჯერმე ასახელა.
“უჩა ნიჭიერი ბიჭია და ვამაყობთ მისი ყოველი წარმატებით. შარშან “ეტალონის“ ტური ჩატარდა ჩოხატაურის მუნიციპალიტეტში და საუკეთესო ექვსეულში მოხვდა. ჩვენ გვჯერა, რომ ის ბევრ წარმატებას მიაღწევს ცხოვრების განმავლობაში“, _ თქვა ერეკლე უღრელიძემ.
“უჩა მეორე კლასიდან სწავლობს მარტო და ძალიან მონდომებული მოსწავლეა. მას ძალიან ბევრი გეგმა აქვს და გვინდა, დიდ წარმატებას მიაღწიოს“, _ გვითხრა სკოლის დირექტორმა ვასილ ნიკოლაიშვილმა.
ზემოხეთის საჯარო სკოლაში ამ ეტაპზე 13 პედაგოგი და 10 მოსწავლეა.
