ეს შემთხვევა კანადაში მოხდა, ზამთარში, გზისპირა კაფეში. ფანჯარასთან შეჩერდა მანქანა და ქალმა, რომელიც მრავალი წელია სარგებლობდა ამ კაფის მომსახურებით, შეუკვეთა ყავა. ამასობაში მის მანქანას უკნიდან სხვა მანქანა მოადგა. ეტყობა ქალი კარგ ხასიათზე იყო და გამყიდველს უთხრა, რომ იმ მომდევნო მანქანის დანახარჯსაც ის გადაიხდიდა. გამყიდველმა გაკვირვებით აიჩეჩა მხრები, მაგრამ მერე იფიქრა, ალბათ ნაცნობები არიანო და ფული გამოართვა.
როდესაც მეორე დღეს ქალმა ჩვეულებისამებრ მიაკითხა კაფეს, გამყიდველმა შეაგება: „იცით, მე მგონი თქვენ შეგეშალათ – ყმაწვილი, რომლისთვისაც ფული გადაიხადეთ, თქვენ არ გიცნობდათ“… ქალი ცოტათი შეცბა, მაგრამ შემდეგ აუხსნა, რომ ასეც იყო სინამდვილეში. მაშინ გამყიდველმა მოუთხრო, თუ რა მოჰყვა მის გუშინდელ საქციელს: „მე ვუთხარი იმ ახალგაზრდას, რომ თქვენ გადახდილი გაქვთ მისი ყავის ფული, იმანაც აიღო და შემდეგი მანქანის ფული გადაიხადა. შემდეგი მანქანის მძღოლს ავუხსენი საქმის ვითარება და მანაც შემდეგი მანქანის ფული გადაიხადა და ასე წაეწყო 21-ჯერ! პირდაპირ გაოგნებული დავრჩი!“
21 მანქანა, 21 ყავა და 21 სასიამოვნოდ გაკვირვებული ადამიანი! გამოდის, რომ სიკეთე გადამდებია! თუკი თქვენ გაგაკვირვეს კეთილი საქმით, თქვენც ცდილობთ სხვისთვის კეთილი საქმის გაკეთებას – სულ ერთია, ნაცნობისთვის იქნება, თუ უცნობისთვის. და თუ თქვენ ხდებით პირველმიზეზი ან რიგითი რგოლი სიკეთის ჯაჭვში, სამყარო, შეიძლება ძალიან არა, მაგრამ ცოტათი უკეთესი ხდება.
