“თბილისის წიგნის დღეების” ფარგლებში კამპანიას _ „სინათლე არ უნდა ჩაქრეს“ 13 გამომცემლობა შეუერთდა.
„სინათლე არ უნდა ჩაქრეს“ _ 22 დამოუკიდებელი ონლაინ გამოცემის ერთობლივი კამპანიაა, რომლის მიზანიც დამოუკიდებელი მედიის მხარდამჭერების გაერთიანებაა.
პლატფორმის _ sinatle.media ანგარიშზე თანხის ჩარიცხვით გამოცემების მხარდაჭერაა შესაძლებელი და სამი დღის განმავლობაში, წიგნების გაყიდვიდან შემოსული თანხის ნაწილი მათ გადასარჩენად ჩაირიცხება _ ეს ინიციატივა ახალდაფუძნებულ გამომცემლობას „მატარებელს“ ეკუთვნის.
„სინათლე არ უნდა ჩაქრეს“ _ ჩვენ, დიდი სიამოვნებით და სიხარულით ვუერთდებით ამ კამპანიას. მიგვაჩნია, რომ დამოუკიდებელი მედიის მხარდაჭერა მნიშვნელოვანია იმ დროს, როდესაც პროპაგანდა ცდილობს, თავისუფლების კუნძულები გააქროს და საქართველოს მოსახლოებას მიაწოდოს გაყალბებული ინფორმაცია, დაუმალოს ის უსამართლობა, რაც საქართველოს ხდება, ის დანაშაულებები, რასაც ოლიგარქის ხელისუფლებაა ჩადის აგერ რამდენი წელია.
ამასთან ერთად, დამოუკიდებელი მედიები მხარს უჭერენ ჩაგრულ ადამიანებს, აჩვენებენ მათ სიმართლეს, რომელსაც მალავს პროპაგანდა.
პროპაგანდა საერთოდ ცდილობს, რომ ადამიანები გააქროს“, _ აღნიშნა ჩვენთან საუბრის დროს გამომცემლობა „ინტელექტის“ დამფუძნებელმა ზვიად კვარაცხელიამ.
მისივე თქმით, დამოუკიდებელი მედიების არსებობა ნიშნავს, რომ ქართველ ხალხს ეცოდინება, რა ხდება ქვეყანაში და ეს კამპანიაც ამას ემსახურება.
„ეს კამპანია ემსახურება იმას, რომ დამოუკიდებელი მედიასაშუალებისთვის შეიქმნას მორალური და ფინანსური მძლავრი საყრდენი, რომ მათ შეძლონ მუშაობა, რომ ხვალ ან ზეგ არ ემუქრებოდეთ გაქრობა, არ იყვნენ გადარჩენის რეჟიმში და, რაც მნიშნველოვანია, როგორც თბილისში ასევე, რეგიონებში დაიცვან დაჩაგრული ადამიანები, მოხდეს ამბების მიუკერძოებელი გაშუქება.
მოთვინიერებული მედია არ უნდა არსებობდეს, ჩვენ ეს არ დავუშვათ, რადგან ამის დაშვება ნიშნავს თავისუფალი საზოგადოების გაქრობას“, _ გვითხრა ზვიად კვარაცხელიამ.
მისივე თქმით, მსგავსი კამპანიები აუცილებლად უნდა გაგრძელდეს და სხვადასხვა სფეროს წარმომადგენლების ჩართულობა უნდა გაიზარდოს.
წიგნის დღეებზე „გურია ნიუსი“ მწერალ გიორგი კეკელიძეს ესაუბრა:
„ეს წამოწყება უკიდურესად მნიშვნელოვანია იმიტომ, რომ ნებისმიერი მედია, ვინმეს მოსწონს თუ არ მოსწონს, რეალურად არის პროცესის ამსახველი და პროცესის ასახვა ნებისმიერი რაკურსით სჭირდება თავისუფალ საზოგადოებას. შესაბამისად ამ მედიებს სჭირდებათ სიცოცხლისთვის აუცილებელი სახსრები.
მივესალმები ქართული გამომცემლობების და კერძო ავტორების ინიციატივას, რომ გაყიდული წიგნებიდან შემოსული თანხის ნაწილი გადაურიცხონ ონლაინ მედიებს“.
„სინათლე არ უნდა ჩაქრეს, წინააღმდეგ შემთხვევაში ჩვენ სრულ ვაკუუმში აღმოვჩნდებით“, _ გვითხრა ფსიქოლოგმა, მარინე ჩიტაშვილმა.
თბილისის წიგნის დღეები 14 ნოემბერს დაიწყო და 16 ნოემბერს დასრულდება.
ავტორი
