დღეს, ისევე როგორც მთელ ქვეყანაში, ახალი სასწავლო წელი დიდი სიხარულით დაიწყო გურიაში.
ოზურგეთში, ქალაქის ცენტრალურ ადგილზე მდებარე მეორე საჯარო სკოლა, ყოველთვის ზეიმის დაწყების ათვლის წერტილად მიიჩნევა.
აქ შეკრებილ მოსწავლეებს, მშობოლებს, სტუმრებს, ტრადიციულად მიესალმა სკოლის დირექტორი ფატი სიორიძე.
_ახალი სასწავლო წლის დაწყებას ფეხი უნდა ავუწყოთ, ეს ნიშნავს ფეხი ავუწყოთ სიახლეებს. მუდამ ვისწავლოთ ერთმანეთისგან და განვავითაროთ ახალი უნარ-ჩვევები, _თქვა მან და მოსწავლეებს, მშობლებს, მასწავლებლებს მადლობა გადაუხადა წლების მანძილზე ერთგული და გუნდური მუშაობისთვის.
ფატი სიორიძემ ასევე მუნიციპალიტეტის მერს მადლობა გადაუხადა წარმატებულ კურსდამთავრებულთა დაჯილდოებისთვის.
ახალი სასწავლო წლის დაწყება მიულოცეს მოსწავლეებს მუნიციპალიტეტის მერმა ავთანდილ თალაკვაძემ და რესურსცენტრის უფროსმა ლალი სიჭინავამ.
სკოლაში მოსვლა განსაკუთრებით უხაროდათ პირველკლასელებს.
დემე რიჟამაძემ გვითხრა, რომ მისი ძმა დანი ბაღში მიდის, პაწაწინა დაიკო ნუცა კი სულ ერთი თვისაა და ახლა ყველამ ერთად სკოლაში მოაცილა.
_დღეს დაფაზე ჩემს მეხუთეკლასელებს ორ სიტყვას ვახვედრებ დაწერილს: „სიყვარულით მომავლისკენ“. სწავლასთან ერთად, ჩვენ უნდა ვიყოთ სიყვარულით სავსე და ასე ვიაროთ წინ. მხოლოდ სწავლა და ასევე სხვა ყველაფერი, სიყვარულის გარეშე არაფერია. ამიტომ ჩემს ახალ სადამრიგებლო კლასთან ამ ორი სიტყვით ვიწყებ ურთიერთობას. ისე კი ესენი მომავალი მაიასტომელები არიან, _ გვითხრა მეორე საჯარო სკოლის ქართული ენისა და ლიტერატურის მასწავლებელმა მაია ღლონტმა.
ოზურგეთის საგანმანათლებლო რესურსცენტრის ხელმძღნვანელმა ლალი სიჭინავამ გვესაუბრა სიახლეებზე:
_წელს, ოზურგეთში 42 საჯარო სკოლასა და ორ სასულიეროში წარმატებით დაიწყო სასწავლო წელი. 570 ბავშვი მივიღეთ პირველ კლასში. ამ ახალ სასწავლო წელს სიახლე ინერგება სამ საჯარო სკოლაში. ესენია: ლაითურის, ნასაკირალის და ოზურგეთის პირველი საჯარო სკოლები. მოსწავლეები დაეუფლებიან კომპიუტერული სწავლების სამ მიმართულებას. ამ სამმა სკოლამ გაიარა შესაბამისი ავტორიზაცია. ამ სკოლების კურსდამთავრებულები, ატესტატთან ერთად, პროფესიის დამადასტურებელ დოკუმენტს მიიღებენ. დამეთანხმებით, რომ პროფესიული ინტეგრირებული პროგრამის დანერგვა სკოლებში, წინ გადადგმული დიდი ნაბიჯია, _ თქვა მან.
ლალი სიჭინავამ ასევე განაცხადა, რომ ორ სკოლას, ქალაქის მესამე საჯაროს და მაკვანეთის სკოლას ჩაუტარდა რეაბილიტაცია. მისივე თქმით, მაკვანეთის სკოლაში სამშენებლო კომპანიას, შესაბამისი სამსახურის ექსპერტებმა ხარვეზების გამო მისცეს შენიშვნა, რის გამოც დაწყებულია სამუშაოები. სკოლას 18 დიდი საკლასო ოთახი აქვს, რეაბილიტირებულია უზარმაზარი სპორტული დარბაზი და სასწავლო პროცესს არანაირად არ ეშლება ხელი.
მან ასევე გვითხრა, რომ ოზურგეთის ყველა სკოლაში წარმატებით დაიწყო ახალი საწავლო წელი.
_ ყველგან მობილიზებული იყვნენ მაწავლებლები, მშობლები, მოსწავლეები. მიხარია, რომ ყველა სკოლამ ისე დაიწყო ეს წელი, რომ ერთმანეთს ტოლი არ დაუდეს. განსაკუთრებულ წარმატებულ სასწავლო წელს ვუსურვებ ყველას განაცხადა ლალი სიჭინავამ.
ავტორი
