ლიფტების თემა მთელ ქვეყანაში, პრობლემურობიდან გამომდინარე, მუდამ აქტუალურია. თუმცა ბოლო დროს, ასევე ძალიან გახმაურებულია, ცნობილი ტრაგიკული ამბავის გამო.
რამდენად უსაფრთხო ლიფტებით სარგებლობენ ჩვენი მოქალაქეები? არსებობს თუ არა საშიში ლიფტები ჩვენს ქალაქში, ოზურგეთში?
აქ, მაღალსართულიან სახლებში მცხოვრები მოქალაქეები ამბობენ, რომ უმეტესად სატვირთო ლიფტები არ მუშაობს. ქალაქში ყველაზე მაღალი თორმეტსართულიანი საცხოვრებელი კორპუსებია. აღნიშნული საცხოვრებელი კორპუსების მცხოვრებთაგან , „გურია ნიუსთან“ ბევრი საუბრობს, რომ გადასაადგილებლად განკუთვნილი ლიფტები ყველგან წესრიგშია. თუმცა უმეტესად არ მუშაობს (და არც არასდროს უმუშავია) ავეჯის, სხვადასხვა ტვირთის გადასატან ლიფტებს, რომელთა კაბინა, ყველა სადარბაზოში არსებული პატარა ლიფტის პარალელურად არის განთავსებული .
_რა შეიძლება ვთქვათ, სირცხვილია, როცა 21-ე საუკუნეში როცა მეათე და მეთორმეტე სართულიდან მიცვალებული წამოყუდებული ჩამოგვყავს. ზოგს ეცინება კიდეც ამაზე. შეიძლბა მიცვალებული კუბოზე მიაბა და ისე ჩამოიყვანო? ეს ხომ ახალი პრობლემა არ არის? კი, ბატონო, უამრავი პრობლემა არსებობს. ფასადები გაკეთდა, რაც კარგი საქმე გაკეთდება ყველას გვიხარია, მაგრამ ამ ტვირთის გადასატანი თუ ავადმყოფის ან მიცვალებულის გადასაყვანი ლიფტების მოწესრიგებას საშველი არ დაადგა, _ გვეუბნებიან იოანე პეტრიწის ქუჩაზე მდებარე, 12 სართულიანი სახლის მცხოვრებლები.
მათივე თქმით, იყო შემთხვევა, როცა სასწრაფო სამედიცინო დახმარების ბრიგადამ, გულით ავადმყოფი პაციენტი საავადმყოფოში ვერ გადაიყვანა და ადამიანი გარდაიცვალა. აღნიშნულ პრობლემაზე, ვრცლად, მალე „გურია ნიუსში“ გიამბობთ.
ავტორი
