გურიაში ახალი სასწავლო წლის მაუწყებელი ზარი მოკრძალებულად დაირეკა.
ამ ყველაფერს აქვს თავისი მიზეზი- სტიქიურმა უბედურებამ , შოვის შემდეგ, გაგრძელება გურიაში ჰპოვა.
_ მსურს წუთიერი დუმილით პატივი ვცეთ სტიქიით დაღუპულთა ხსოვნას, – ასე დაიწყო დღეს ოზურგეთის მეორე საჯარო სკოლის დირექტორმა, ფატი სიორიძემ თავისი მისალმება სკოლის მოსწავლეებთან, მათ მშობლებთან და პედაგოგებთან.
_და მაინც, სიცოცხლე გრძელდება. მსურს, მოგილოცოთ ახალი სასწავლო წლის დაწყება და გისურვოთ კიდევ და კიდევ წარმატებები, – თქვა მან.
ქალბატონმა ფატიმ ისაუბრა გასული წელს სკოლის განსაკუთრებული წარმატებების შესახებ. ასევე თქვა, რომ სკოლაში სიახლეებია, ოთხი ახალი პედაგოგი შეეემატება მათ კოლექტივს, ხოლო ქართული ენისა და ლიტერატურის მასწავლებელს, მაია ღლონტს მიენიჭა წამყვანი მასწავლებლის სტატუსი და მიულოცა.
სკოლის წინ, განსაკუთრებულ საზეიმო განწყობას სამი და-ძმა: მარინა , ლუკა და ელენე გამოხატავდნენ.
_ჩვენი ყველაზე უცროსი და, ელენე ახლა შედის პირველ კლასში და გვიხარია, ძალიან გვიყვარს, _ თქვეს ლუკამ და მარინამ.
_ეს თაიგული ჩემი საყვარელი მასწავლებლისთვის, მაია თოთიბაძისთვის მიმაქვს, – თავმომწონედ გაგვანდო და ყვვილების დიდი შეკვრა გვაცვენა მეექვსეკლასელმა ანასტასია გორდელაძემ.
_მეექვსე კლასი ყველაზე მაგრი კლასია! სულ 30 ვართ. სულ. ძალიან მიხარია სწავლის დაწყება, აი, შევალთ ახლა და „შევუბერავთ“ და ვიქნებით საუკეთესოზე საუკეთესოები, – მკვირცხლად, ენამოსწებულად , შინაურულად ჩაგვერთო საუბარში მეექვსეკლასელი ანა ზაქარიაძე.
რაც შეეხება პირველკლასელ ემილი გარგალას, ის საჰაერო ბუშტებით ხელში, ცისკენ იცქირებოდა და აშკარად ეტყობოდა, ჯერაც ფერადი ოცნებების ტყვეობში იყო.
_დიახ, პირველ კლასში მივდივარ, გარგალა ვარ გვარად, ბერძნული წარმოშობის გვარია, _ ლამაზი ქართულით და ღიმილით გვითხრა, როცა გვარის გამეორება ვთხოვეთ.
მალე სკოლის წინ საქართველოს დროშა აღმართეს და შესრულდა სახელმწიფო ჰიმნი.
ფატი სიორიძემ, მოკრძალებული ზეიმის დასასრულს, მოსწავლეებს დავით გურამიშვილის სიბრძნე შეახსენა:ყმაწვილი უნდა სწავლობდეს საცნობლად თავისადაო:
ვინ არის, სიდამ მოსულა, სად არის, წავა სადაო?“
ავტორი
