“სოხუმის აეროპორტში ფრენის გახორციელებით რუსეთს აქვს ორი მიზანი”- ილია ღლონტი

ბოლო 30 წლის განმავლობაში პირველად, სოხუმის აეროპორტში სამოქალაქო თვითმფრინავი დაჯდა. ფაქტს სოციალურ ქსელში ჯგუფის “დაიტოვე” დამფუძნებელი ილია ღლონტი გამოეხმაურა.

“საქართველომ სოხუმის აეროპორტზე კონტროლი დაკარგა!

საქმე იმაშია, რომ 7 თებერვალს პირველად 30 წლის განმავლობაში, სოხუმის აეროპორტში ფრენა გახორციელდა, რასაც პირდაპირ თუ ირიბად საქართველოს ხელისუფლებამ ხელი შეუწყო. თვითფრინავი მოსკოვიდან გამოფრინდა და მასზე 21 მგზავრი იყო, მათ შორის, ე.წ. საპრეზიდენტო არჩევნებზე დარეგისტრირებული კანდიდატი ბადრა გუნბა მგზავრობდა.

1993 წლიდან სოხუმის აეროპორტი დახურული იყო ფრენებისთვის ქართული მხარის მოთხოვნით და ამას სრული საერთაშორისო მხარდაჭერა ქონდა.

აეროპორტის დახურვას დამატებით ლეგიტიმაციას ანიჭებდა 1993 წელს რუსეთის ეფექტური კონტროლის ქვეშ მყოფი შეიარაღებული ფორმირებების მიერ სამგზავრო თვითმფრინავების ჩამოგდება სოხუმში, რასაც მოყვა მსხვერპლი (მათ შორის „უოლ სტრიტ ჯორნელის“ჟურნალისტი და აშშ-ს მოქალაქე ალექსანდრა ტატლი).

რუსეთი წლები ცდილობდა, რომ ეს აეროპორტი გახსნილიყო. ეს იმისთვის უნდოდა, რომ საქართელოს ტერიტორიული სუვერენიტეტი საერთაშორისო დონეზე მოერყია და კიდევ გაემტკიცებინა თავისი პოზიცია აფხაზეთის დამოუკიდებლობის მიმართებით. მეტიც, ეს პირველი ფრენა იმისთვისაც გამოიყენა, რომ მისთვის სასურველი საპრეზიდენტო კანდიდატი გაეპიარებინა. აქამდე ამას ვერ ახერხებდა იმიტომ, რომ საქართელოს ქონდა მკაცრი პოზიცია, რომელსაც საერთაშორისო ავიაციის ყველა ორგანო იზიარებდა და პატივს სცემდა. თუ დახურული აეროპორტი გაიხსენბოდა, ყველა კომპანია, რომელიც იქ იფრენდა შავ სიაში შევიდოდა. უფრო მეტიც, თუ რუსული რომელიმე კომპანია გაბედავდა ამას და საქართველო შესაბამის ორგანოებს მიმართავდა, შეიძლება თავად ამ სახელმწიფოს შექმნოდა დიდი პრობლემები, რომელმაც ეს კომპანია ან ბორტი დაარეგისტრირა.

ფაქტია, რომ რეისი განხორციელდა, ხოლო საქართველოს მხრიდან შესაბამისი რეაგირება არ მოყვა, ან თავად საქართველოს მთავრობის თანხმობით მოხდა ეს. ორივე შემთხვევაში ეს კატასტროფაა.

აბა ომი გინდათ?”_ წერს ილია ღლონტი ჯგუფ “დაიტოვეში”.

 “გურია ნიუსი” აღნიშნული პოსტის გამოქვეყნების შემდეგ ილია ღლონტს დაუკავშირდა და ჰკითხა, თუ რატომ არის საშიში სოხუმის აეროპორტში გახორციელებული ავიარეისი.

 “სოხუმის აეროპორტში ფრენის გახორციელებით რუსეთს აქვს ორი მიზანი:

1. შეარყიოს ჩვენი სუვერენიტეტი,
2. გაამყაროს აფხაზეთის აღიარების ლეგიტიმაცია.

30 წელია სოხუმის აეროპორტი დახურული იყო ფრენებისთვის ქართული მხარის მოთხოვნით და ამას საერთაშორისო მხარდაჭერა ჰქონდა. ამას დამატებით ლეგიტიმაციას ის ფაქტი ამყარებდა, რომ რუსეთის ეფექტურ კონტროლის ქვეშ მყოფმა ძალებმა ჩამოაგდეს სამოქალაქო თვითფრინავი, რასაც მოჰყვა ასევე მსხვერპლი. შესაბამისად, აეროპორტის დახურვა ამყარებდა რუსეთის, როგორც აგრესორის და ოკუპანტის იმიჯს. ასევე, აეროპორტის ჩაკეტვა ჩვენი ამ აეროპორტზე ძალაუფლების და ზოგადად ტერიტორიული სუვერენიტეტის გახორციელების ბერკეტიც იყო, რადგან საქართველოს მოთხოვნით იყო ეს აეროპორტი ჩაკეტილი და ამ გადაწყვეტილებაზე კოტროლი საქართველოს ხელისუფლებას ჰქონდა. ეს ყველაფერი ამ მოქმედებით ჩამონგრეულია”, _ ამბობს ილია ღლონტი.