ჩოხატაურის მუნიციპალიტეტის სოფელ ბუკნარის მცხოვრებლები ხშირად მომართავენ “გურია ნიუსს” მათი პრობლემების გაშუქების მიზნით. ასე მოხდა ამჯერადაც _ მედიასახლის ჩოხატაურის ოფისს სოფლის წარმომადგენელთა ერთი ჯგუფი ესტუმრა და გვთხოვა, ადგილზე კიდევ ერთხელ გავცნობოდით მათ პრობლემებსა და მოგვესმინა ადგილობრივებისთვის.
_ ბუკნარს პატრონი არ ჰყავს, _ ასე დაიწყეს ჩვენთან საუბარი სოფლის მცხოვრებლებმა.
მათი თქმით, უდიდეს პრობლემას წარმოადგენს ის, რომ სოფელში, გრაფიკიდან გამომდინარე, პრობლემურია ტრანსპორტის საკითხი; არ არის მოწესრიგებული შიდა ინფრასტრუქტურა; დაზიანებულია ქვენობანი-ბუკნარის დამაკავშირებელი გზა; ზოგან გარე განათების ბოძებზე არ არის ნათურები დამონტაჟებული; სოფელს არ მიეწოდება წყალი (თუმცა, როგორც სოფლის მცხოვრებლები ამბობენ, ამის შესაძლებლობა არის, რადგან “მათი წყალი მუნიციპალიტეტს მიეწოდება”. მოსახლეობა, ძირითადად, ჭებზეა დამოკიდებული, რომლებშიც ზაფხულში წყალი, გვალვიდან გამომდინარე, ისე იკლებს ზოგიერთს სასმელადაც კი არ აქვს და სოფლის ერთადერთ მაღაზიაში უწევს ყიდვა. ავტ).
ბუკნარის სასაფლაოსთან მცხოვრები ერთ-ერთი უბნის მოსახლეობა გვეუბნება, რომ მათ უბანში წვიმიან ამინდში გავლა შეუძლებელია, ამ პრობლემასთან დაკავშირებით დაწერეს განცხადება და მუნიციპალიტეტის მერის წარმომადგენელს პაატა ჩხაიძეს სთხოვეს პრობლემის მოგვარება.
_ ჩემმა შვილმა ერთხელ დაწერა განცხადება, ხელმოწერებიც შევაგროვეთ და მივიტანეთ ქვენობნის მერის წარმომადგენელთან, პაატა ჩხაიძესთან. ამის შემდეგ კი მოიტანეს ხრეში, დაყარეს შემოსასვლელში, ვითომ გუბეები ამოავსეს, მაგრამ თქვენი თვალითაც ხომ ნახეთ, რომ გუბეები ისევაა, _ გვითხრა ჩვენმა რესპონდენტმა
სოფელში არსებულ უამრავ პრობლემასა და სურვილზე გვესაუბრა ამ უბნის კიდევ ერთი მცხოვრები თამარ გორგაძე:
_ ეს სასაფლაოს მხარე მოგვიხრეშეთ, გველების საბუდარია აქაურობა-მეთქი, _ ვთხოვე და დაგვპირდნენ… (?) სამი მოსახლე ისეთ ადგილას ვცხოვრობთ, განათება რომ მართლა აუცილებელია, ისიც დაგვამადლეს.
მერის წინა წარმომადგენელმა მოიკლა თავი _ შენ ოღონდ გვერდში დაგვიდექი, გამოდი შეკრებებზე და ყველაფერი იქნებაო. საქმეს ვტოვებდი, მივდიოდი და ბოლოს არაფერი! არც იმან ქნა და არც _ ამან. ამან გუბეებში კი ჩაყარა ორი ფეხის ნაბიჯზე ხრეში, აქეთ არ არსებობს ხალხი თუ რა?! წვიმაში მანქანები რომ გაივლიან, ისე ტალახდება, ვეღარ შემოხვალ. რადგან 3 მოსახლე ვართ უყურადღებობა არ შეიძლება! _ გვითხრა თამარ გიორგაძემ.
სოფლის მცხოვრებთა პრობლემების შესახებ “გურია ნიუსი” ესაუბრა ქვენობანი-ბუკნარის ადმინისტრაციულ ერთეულში მერის წარმომადგენლის თანაშემწეს თეონა ქათამაძეს. როგორც ქათამაძემ გვითხრა, იგეგმება ქვენობანი-ბუკნარის გზის რეაბილიტაცია და დროთა განმავლობაში, ყველა პრობლემის მოგვარდება:
_ იგეგმება ბუკნარი-ქვენობნის დამაკავშირებელი გზის რეაბილიტაცია. ერთი კვირის წინ გაკეთდა ახალი პროექტი. ამ პროექტის ჯამურ ღირებულებაზე ინფორმაცია მე არ მაქვს, თუმცა, მერიის შესაბამის სამსახურებს შეუძლიათ, მოგაწოდონ. რაც შეეხება ბუკნარის სასაფლაოს ტერიტორია, ამ ტერიტორიის გაწმენდა ყოველდღიურად ხდება სოციალურ პროგრამაში ჩართული ადამიანების მიერ და არანაირი სახიფათო სიტუაცია არ არის. რაც შეეხება მიმდებარე ტერიტორიას, ის არის პატარა ჩიხი, სადაც ცხოვრობს 3 ოჯახი. გასული წლის სოფლის პროგრამების ფარგლებში, დაახლოებით, 10 კბმ ხრეშის შეტანა მოხერხდა ამ კონკრეტულ მონაკვეთზე. თუმცა, მოგეხსენებათ, ეს იყო ზედაპირული ამოვსება და დამატებით ნამდვილად საჭიროებს ეს უბანი ისევ ხრეშის შეტანას.
გარე განათებებს რაც შეეხება, ეს ყველა სოფლის ყველა უბანს სჭირდება, არა მარტო მაგ უბანს. ყველა შიდა გზაზეა საჭირო განათების დაყენება, ამიტომ, კონკრეტულად მარტო მაგ უბნისთვის ვერ გამოვყოფთ ნათურებს. გარე განათებასთან დაკავშირებით წელს სოფლის პროგრამის ფარგლებში გათვალიწინებული გვაქვს. ასევე, კონკრეტული სანიაღვრე არხების გაწმენდა და რამდენიმე კბმ ხრეშის შეტანა. დანარჩენი პრობლემების მოგვარება პროგრამის ფარგლებში ვერ მოხერხდება.
დიახ, გეთანხმებით, სოფელს არ მიეწოდება ცენტრალური წყალი, სოფელი ჭებზეა დამოკიდებული და რამდენადაც ჩემთვის არის ცნობილი, ამ ეტაპზე ამ პრობლემის აღმოფხვრაზე არ მიმდინარეობს მუშაობა. ეს ყველაფერი ძალიან დიდ ხარჯებთან არის დაკავშირებული, რომელიც ცენტრალური ხელისუფლების მიერ უნდა გამოიყოს და 2024 წლიდან ვვარაუდობთ ამ პროგრამის გახორციელებას, _ გვითხრა თეონა ქათამაძემ.
