“სოფელი ინგრევა, ჩვენი არჩეული მთავრობა გვერდით დაგვიდგეს”

პროტესტი რომელიც რამდენიმე თვის წინ ჭიათურის მუნიციპალიტეტის სოფელ შუქრუთში დაიწყო, რამდენიმე დღეა პარლამენტთან გრძელდება. აქ სხვადასხვა ასაკის ადამიანებს შეხვდებით, ზოგიერთმა მათგანმა კი პროტესტის უმწავეს ფორმასაც მიმართა და პირი ამოიკერა. ასე ცდილობს მოსახლეობა სოფელში შექმნილი პრობლემის შესახებ ხმა გააგონოს ხელისუფლებას, რომელიც რამდენიმე წლის წინ თვითონვე აირჩია. “ჩვენ ვითხოვთ ყურადღებას სხვას არაფერს, ჩვენი არჩეული მთავრობა უნდა დაგვიდგეს გვერდით და უნდა დაგვეხმაროს ჩვენი სიმართლის დამტკიცებაში. ამიტომ ვდგავართ პარლამენტთან. შუქრუთი არის ერთი დიდი კარიერი. ინგრევა ყველაფერი, ძალიან ცუდი მდგომარეობაა”,- ამბობს აქციის ერთ-ერთი მონაწილე ” გურია ნიუსთან” საუბრისას.

სოფელში შექმნილი რთული მდგომარეობის და ხელისუფლების უყურადღებობის შესახებ საუბრობს “გურია ნიუსთან” აქციის ერთ-ერთი მონაწილე ეთერ გაფრინდაშვილი. “ვაპროტესტებთ იმ გულგრილობას, რასაც იჩენს ცენტრალური ხელისუფლება და რასაც ეწირება ჩვენი სახლ-კარი, ჩვენი კერძო საკუთრება, ჩვენი ჯანმრთელობა, ჩვენი უსაფრთხოება და ჩვენი კონსტიტუციური უფლება. უკვე ნახევარ წელზე მეტია რაც ჩვენი აქცია დაიწყო სოფელ შუქრუთში. ასე უშედეგოდ ვიბრძვით და იქედან გამომდინარე რომ ამდენი ხანი ვცდილობდით ყურადღების მიპყრობას უშედეგოდ და რადგან ჭიათურა ისე შორს აღმოჩნდა ცენტრალური ხელისუფლებიდან რომ ვერ მოგვაწვდინა ხმა, ჩვენ თვითონ ჩამოვედით პარლამენტთან, მივუახლოვდით, რომ უფრო იოლი საკონტაქტოები ვყოფილიყავით მათთვის, თან ერთი კვირა გახდება რაც აქ ვართ, მოშიმშილე პირამოკერილ ბიჭებთან ერთად.

გუშინ, პირდაპირი ჩართვის დროს აქციის ერთ-ერთი მონაწილე ცუდად გახდა და საავადმყოფოში გადაიყვანეს, მისი მდგომარეობაც ახლა მძიმეა, რადგან მკურნალობის კურსი არ დაასრულა და ისევ აქციას შემოუერთდა. ჩვენ კიდევ გვაწვიმს აქ, ზამთარი რომ იყოს ალბათ დაგვათოვდა კიდეც, ღია ცის ქვეშ ვართ და ვითხოვთ, გაგვიშალონ კარავი და ამასაც კი არ გვაშლევინებენ ახლო მახლო ტერიტორიაზე. გუშინ როგორი წვიმა იყო და პარკები გადავაფარეთ ამ ადამიანებს, მართლა რამე რომ დაგვემართოს რა უნდა ვქნათ ? უნდა შევეწიროთ ამ ყველაფერს. სახლ-კარი გვექცევა. პრობლემა ეხება გზასაც, ეკლესიასაც, ყველაფერს რაც კი სოფელში არსებობს, საფლავებს. სკოლა სხვათაშორის უკვე აღარ გვაქვს.სასწავლო პროცესი შეწყდა საერთოდ, დემონტაჟს ექვემდებარებაო”,- ამბობს აქციის მონაწილე.

აქციის კიდევ ერთი მონაწილე გიორგი ცარციძე გვეუბნება , რომ სანამ მათი მოთხოვნა არ შესრულდება აქცია არ შეწყდება არც თბილისში და არც შუქრუთში. _ 13 მარტიდან მიმდინარეობს ჩვენი პროტესტი, შიმშილობის მე-17 დღეა. 6 ბიჭს პირი აქვს ამოკერილი და ისე შიმშილობს, ხოლო 2 ისე. რაც შეეხება ჩვენს გეგმებს, ვითხოვთ სახელმწიფოს ჩართულობას ამ საქმეში.ვიქნებით იქამდე სანამ არ გადაწყდება ეს საკითხი და არ მოგვარდება საბოლოოდ.ვთხოვთ სახელმწიფოს დახმარებას.

კომპანია ჯორჯია მარგანეცი 2019 წლიდან გვატყუებს. სოფელი ინგრევა, დახსნილია და დაბზარულია სახლები, ჩავარდნილია მიწები. გუშინ 16 სექტემბერს, საქართველოს ყველა სკოლაში განახლდა სწავლა, შუქრუთის საჯარო სკოლაში სასწავლო წელი არ განახლებულა. რამდენიმე ათეულ ბავშვს მოუწია სხვა სოფელში გადასვლა და იქ სწავლის გაგრძელება,_ ამბობს ცარციძე.