დღეს, ოზურგეთის მუნიციპალიტეტის სოფელ სილაურში, ბალიეთის მოსახლეობასთან ერთად, სილაურელებმა სოფლის ყრილობა დააანონსეს. მიზეზი კვლავ მდინარე სუფსაზე არსებული კარიერზე ქვისა-ღორღის უკანონო მოპოვების საკითხზე საუბარი იყო. კონკრეტულად კი დღეს აქ შპს „სამი ძმების“ წარმომადგენლებს ელოდნენ, რომელთანაც მოლაპარაკება უნდა გაემართათ. თუმცა არავინ გამოჩნდა.
_ჯერ მდინარის კალაპოტში ღამით და მალულად შეიპარნენ. მერე დაიწყეს თავის მართლება, ლიცენზია გვაქვსო. ამის შემდეგ შეგვპირდნენ, მოვალთ და მოგელაპარკებითო. გაყვეს მდინარე შუაზე, ამოაცალეს ფსკერი და ახლა იმ მოგროვებული გორების წასაღებად შემოიპარებიან. ფეხს ვერ შემოდგამენ აქ. ამჟამად სუფსის კარიერში მუშაობს კომპანია „ქიუ ემ სი“, რომლის წარმომადგენელმაც სოფელთან მოლაპარაკება აწარმოა და თითქმის მილიონ ლარამდე ღირებულების სამუშაოს შესრულებას შეგვპირდა. მათ შორის არის 50 ჰა ფართობის მოხვნა და დათესვა. მემორანდუმს ხელი მოეწერა და ეს იქნება საკმარისი სოფლისთვის. მეტს სუფსა ვერ აიტანს და მადლობა გვითხრან, ერთი კარიერი თუ დავატოვებინეთ მდინარის კალაპოტში. ეს ახალ-ახალი მატყუარები მოგვშორდნენ აქედან. აგერ არ ეტყობათ, ვინც არიან? დაიმალნენ კურდღლებივით, სასაცილოა ჩვენი საქმე- განაცხადეს აქ მოსულმა დათო, ელდარ და ზურაბ დარჩიებმა, ბადრი ლომაძემ, მაია ზაქარიაძემ და სხვებმა.
_ ეს სოფელი და ეს მდინარე ჩვენია. 7-8 წელია, მდინარეში პატარები არ ჩასულან და არ უბანავიათ წესიერად, რომ ცურვა ისწავლონ. ქალაქებში ხალხი ფულს იხდის, რომ შვილებს ცურვა ასწავლონ. აქ კიდე დასახრჩობ აუზებს გვიტოვებენ. წაეთრიონ აქედან , არ დავინახოთ ესენი სოფელში შემოსული.. ესაა მაგათი სიტყვა. შესახვედრად დაგვიბარეს და ამდენ ხალხს გვალოდინებენ. სამაგიეროდ, ღამით შეიპარებიან რიყეში ეს კურდღლები, – განაცხადა სილაურელმა ზურაბ დარჩიამ.
რატომ და როდის მოილაპარაკეს სილურის თემში ჩასატარებელი ყრილობის თაობაზე, ვინ არიან უკანონო დოკუმენტაციის მქონე პირები, რომლებიც ინერტული მასალის მოპოვებას ცდილობენ სილაურში სუფსის კარიერზე, რა მემორანდუმი გააფორმა მხოლოდ ერთ კომპანიასთან სოფელმა, ამის შესახებ, ვრცლად “გურია ნიუსი” მალე შემოგთავაზებთ.
