ლანჩხუთის მუნიციპალიტეტის სოფელ ნიგოითში მცხოვრები კინწურაშვილების მრავალშვილიანი ოჯახი, სადაც, ამავდროულად, სამი უმწეო ხანდაზმული ცხოვრობს, სოციალური შემწეობის მოხსნას აპროტესტებს და შესაბამის რეაგირებას ითხოვს.
ოჯახის დიასახლისი ვარდო კინწურაშვილი “გურია ნიუსთან” საუბარში ამბობს, რომ მისი ოჯახი სოციალურ შემწეობის, წლებია იღებდა, თუმცა, იმის გამო, რომ მისმა შვილმა ქვეყნის საზღვარი გადაკვეთა და თურქეთში გადავიდა დროებით სამუშაოდ, 2016 წელს დახმარების მიღება შეუწყვიტეს.
“2006 წელს დაგვენიშნა სოციალური შემწეობა _ 380 ლარს ვიღებდით ყოველთვიურად. მერე ჩემმა შვილმა გადაკვეთა ქვეყნის საზღვარი, რის გამოც შემიჩერეს დახმარება. 2016 წლის 24 აპრილი იყო, მამაჩემის სახელზე დაწერილი განცხადებით ისევ რომ მივმართე სოციალურ სააგენტოს. თუმცა, ამას არანაირი რეაგირება არ მოჰყოლია. გასული წლის სექტემბერში კვლავ დავწერე განცხადება სოციალური დახმარების დანიშვნის მოთხოვნით. მოვიდნე გადამოწმებაზე, შედეგად კი მაღალი ქულა მომანიჭეს _ 77 ათასზე მეტი. დახმარების სახით მხოლოდ 10-10 ლარი დამენიშნა ორ მცირეწლოვან ბავშვზე და ახლა თვეში დახმარების სახით 20 ლარი მეძლევა. რა უნდა ვქნა ამ 20 ლარით?!” _ კითხვას სვამს ვარდო კინწურაშვილი, რომლის ოჯახის ერთადერთი შემოსავლის წყარო ხანდაზმულების პენსიაა, მათ კი ჯანმრთელობის სერიოზული პრობლემა აქვთ _ დიასახლისის მამა ეტლსაა მიჯაჭვული, მამამთილი კი _ საწოლს. ისინი ხშირადაც ავადმყოფობენ, რის გამოც ოჯახს ბანკიდან სესხის გამოტანა მოუხდა.
“გარდა იმისა, რომ მრავალშვილიანი დედა ვარ, სახლში სამი მოხუცი მყავს. მამაჩემი წელს ქვემოთ მოწყვეტილია და ეტლსაა მიჯაჭვული. რომ არა ჩემი მეუღლე, მე ვერაფერს მოვუხერხებდი, მას გადმოყავს საწოლიდან ეტლში და პირიქით.
მამამთილი სამი წელია ლოგინადაა ჩავარდნილი, მხედველობაც მთლიანად დაკარგული აქვს. ამათთან შედარებით მხოლოდ დედამთილია შედარებით ჯანმრთელად _ მას მხოლოდ წნევა აწუხებს. მოკლედ, მე და ჩემი ქმარი მოხუცების მოვლას ვუნდებით, სახლში მარტო ვერ ვტოვებთ. ამის გამო ვერ ვახერხებთ სადმე დავსაქმდეთ. რამე შემოთავაზება რომც იყოს, რა უნდა ვქნათ, ხომ ვერ მოვკლავთ მოხუცებს?!
ჩვენი ოჯახის ერთადერთი შემოსავლის წყარო ისევ ამათი პენსიაა, რომლის ძირითადი ნაწილი მათთვის წამლების შეძენას ხმარდება, ნაწილი კი _ ბანკის სესხის დაფარვას, რომელიც მკურნალობის გამო ავიღეთ.
აღარ ვიცი, გამოსავალი სად მოვძებნო. აქამდე მეგონა, რომ გაითვალისწინებდნენ ჩვენი ოჯახის მდგომარეობას და ფულად დახმარებას აღმიდგენდნენ, მაგრამ ახლა ეს იმედიც აღარაა”, _ ამბობს ოჯახის დიასახლისი.
როგორც ის გვიყვება, სახლი, სადაც ისინი ცხოვრობენ, წლების წინ საქველმოქმედო ფონდმა “იავნანამ” შეუძინა და არ გამორიცხავს, რომ მათთვის სოციალური შემწეობის არდანიშვნა სწორედ პოლიტიკასთან იყოს დაკავშირებული:
“დაზუსტებით არაფრის მტკიცება არ შემიძლია, მაგრამ ხანდახან ვფიქრობ, რომ ყველაფერი ეს პოლიტიკას უკავშირდება, რადგან სახლი, სადაც ახლა ვცხოვრობთ მე და ჩემი ოჯახი, წლების წინ ფონდმა “იავნანამ” გვიყიდა, როგორც მრავალშვილიან ოჯახს. პოლიტიკურად აქტიური არც მე და არც ჩემი მეუღლე არ ვართ, მაგრამ 2016 წელს, საპარლამენტო არჩევნების წინ, როცა ლანჩხუთში პაატა ბურჭულაძე იყო ჩამოსული, შეხვედრებზე მეც ვიყავი მისული. მე და ჩემი ოჯახი დავალებულები ვართ ამ ადამიანის წინაშე _ მან სახლ-კარი შეგვიძინა, ახლა კი შემწეობის გარეშე დაგვტოვეს”, _ ამბობს ოჯახის დიასახლისი.
კინწურაშვილების ოჯახის საკითხთან დაკავშირებით “გურია ნიუსი” კომენტარისთვის სოციალური მომსახურების სააგენტოს პრესსამსახურს დაუკავშირდა:
“ვარდო კინწურაშვილი სოციალურად დაუცველთა ბაზაში 2006 წლიდანაა რეგისტრირებული. ოჯახი ყოველი გადამოწმებისას დაბალ სარეიტინგო ქულას იღებდა, თუმცა, ბაზაში რეგისტრაცია ორჯერ გაუუქმდათ, რადგან ოჯახის წევრებმა სოციალური მომსახურების სააგენტოს არ აცნობეს საზღვრის კვეთის, ანუ სამ თვეზე მეტი ხნით უცხოეთში წასვლის შესახებ. რეგისტრაცია მათ ამ მიზეზით გაუუქმდათ 2013 წელსა და 2016 წლის აპრილში. ბაზაში რეგისტრაციის გაუქმების შემდეგ, ოჯახმა კვლავ მომართა სააგენტოს გადამოწმების თხოვნით და გასული წლის სექტემბერში შეივსო ახალი დეკლარაცია. ოჯახის სარეიტინგო ქულა აღემატება ზედა ზღვარს ანუ 65 ათასს და შესაბამისად, ისინი საარსებო შემწეობის მიმღები არ არიან. ოჯახი მხოლოდ ბავშვის 10-ლარიან ბენეფიტს იღებს.
ამჟამად ოჯახის შემადგენლობაში შვიდი წევრია, მათგან სამი პენსიას იღებს, ორი არასრულწლოვანია და ორი შრომისუნარიანი წევრი. ქულის ფორმირებაზე ყველა მონაცემი ახდენს გავლენას, რაც დეკლარაციაში იწერება და ვერ გამოვყოფთ ერთ რომელიმე კონკრეტულ მონაცემს. მათ შორის, ქულას მატებს ოჯახის შრომისუნარიანი წევრების არსებობაც. ასევე, დეკლარაციაში დაფიქსირებულია საკმაოდ მოზრდილი სახლის ფართი. ოჯახს აქვს მიწის ნაკვეთიც და ეწევა შინამეურნეობას. გარდა ამისა, ოჯახის პენსიონერ წევრებს ჰყავთ გარეთ მცხოვრები შვილები. თავად ქალბატონ ვარდოს კი მითითებული ჰყავს ხუთი გარეთ მცხოვრები შვილი, რომლებიც მის პოტენციურ დამხმარეებად ითვლებიან.
ოჯახის უფროსს, ალექსანდრე კინწურაშვილს სოციალური მომსახურების სააგენტომ შესთავაზა გრიგოლეთის გზის მშენებლობაზე დასაქმება, თუმცა, ბენეფიციარმა შეთავაზებაზე უარი განაცხადა. რამდენიმე დღის წინ ოჯახმა კვლავ მომართა სოციალური მომსახურების სააგენტოს დემოგრაფიული ცვლილების გამო და მათი ხელახლა შესწავლა მოხდება”, _ გვპასუხობენ სოციალური მომსახურების სააგენტოში.
