სოციალური სამართლიანობის ცენტრი ბილაალ დაუშვილის საქმესთან დაკავშირებით განცხადებას ავრცელებს.
“ვიდეოში ჩანს სპეცრაზმელების მიერ სასტიკად ნაცემი ბილაალ დუიშვილი და მისი დაკავების ეპიზოდი.
ბილაალ დუიშვილი სპეცრაზმის თანამშრომლებმა 4 დეკემბერს, გამთენიისას, დაახლოებით 03:42 წუთზე, რუსთაველის გამზირზე მასობრივი მშვიდობიანი დემონსტრაციის თვითნებური დაშლის შემდეგ დააკავეს და მასზე იძალადეს. ნიღბიანი სპეცრაზმელების მხრიდან სასტიკი ფიზიკური ანგარიშსწორების შედეგად, ბილაალს აღენიშნებოდა ცხვირის მოტეხილობა, ტვინის შერყევა და მრავლობითი დაჟეჟილობა სახის არეში.
სპეცრაზმის მიერ ბილაალ დუიშვილზე განხორციელებულ ძალადობას წინ უძღოდა მშვიდობიანი აქციის დაშლის მიზნით სპეციალური საშუალებების, მათ შორის, დიდი რაოდენობით ცრემლსადენი გაზის გამოყენება. ადგილი ჰქონდა სპეცრაზმელების მხრიდან აქციის მონაწილეების დევნასაც რუსთაველის მეტროს მიმართულებით.
მედიის მიერ გავრცელებულ პირდაპირი ეთერის კადრებში ჩანს ბილაალ დუიშვილის მიწაზე დაგდებისა და მასზე ძალადობის ფაქტი, რის შემდეგაც კადრი წყდება.
ბილაალ დუიშვილის თქმით, დაკავების შემდგომ, ის მიკროავტობუსში ჩასვეს, სადაც სპეცრაზმის რამდენიმე თანამშრომელი მას პერიოდულად მონაცვლეობით ურტყამდა სახის, კეფისა და მთელი სხეულის არეში, როგორც ხელით ასევე ფეხით. ძალადობის პარალელურად, ბილაალს ემუქრებოდნენ, აგინებდნენ და ეკითხებოდნენ, კიდევ გამოვიდოდა თუ არა აქციაზე. დაკავებისას მას წაართვეს მობილური ტელეფონი და საფულე.
ბილაალ დუიშვილის მიმართ მიმდინარეობს ადმინისტრაციული სამართალდარღვევის საქმე, პოლიციელის კანონიერი მოთხოვნისადმი დაუმორჩილებლობის და წვრილმანი ხულიგნობის მუხლებით. ამ საქმეზე პროცესი თბილისის საქალაქო სასამართლოში 27 დეკემბერს 14:30 საათზეა ჩანიშნული.
სოციალური სამართლიანობის ცენტრი აგრძელებს ბილაალ დუიშვილის ინტერესების დაცვას და პროცესის მიმდინარეობის შესახებ საზოგადოებას პერიოდულად ვაცნობებთ”,_ აცხადებს სოციალური სამართლიანობის ცენტრი.
