სამების საკათედრო ტაძრისთვის “პატრიოტთა ალიანსის” მიერ ცოტა ხნის წინ შეწირული ხატი, რომელზეც სტალინია გამოსახული საზოგადოების ნაწილის აღშფოთების მიზეზი გახდა.
როგორც ცნობილია, ხატი რუსეთში შექმნილი იმ ხატის ზუსტი ასლია, სადაც ნეტარი მატრონა აკურთხებს იოსებ სტალინს.
სამების საკათაედრო ტაძარში აღნიშნული ხატის არსებობის შესახებ ინფორმაცია სოციალურ ქსელში ჯერ დეკანოზმა ილია ჭიღლაძემ გაავრცელა, ხოლო ცოტა ხანში საბჭოთა კვლევის ლაბორატორიის მკვლევარმა გიორგი კანდელაკმაც.
“საბჭოთა წარსულის კვლევის ლაბორატორია გმობს სტალინის განმადიდებელი შინაარსის შემცველი ხატის – „წმინდა მატრონა მოსკოველი აკურთხებს სტალინს” ქართული ვერსიის სამების საკათედრო ტაძარში განთავსებას. საქართველოს საბჭოთა რუსეთის მიერ ოკუპირების (რომლის ინიციტორიც სწორედ იოსებ სტალინი იყო) 103 წლისთავამდე სულ მცირე ხნით ადრე ამ ხატის სამების ტაძარში არსებობა საბჭოთა რუსული ტოტალიტარიზმის მსხვერპლთა ხსოვნის შეურაცხყოფაცაა.
იოსებ სტალინის მმართველობის დროს საქართველოში სიკვდილით დასაჯეს ასეულობით სასულიერო პირი, მათ შორის უმეტესწილად – საქართველოს მართლმადიდებელი ეკლესიის იერარქები და მრევლი, განსაკუთრებით 1924 წლის ანტისაბჭოთა აჯანყებისას და შემდეგ 1937-1938 წლების სტალინური ტერორის დროს. მთელს სსრკ-ში სტალინის მმართველობის დროს სიკვდილით დასაჯეს დაახლოებით 80,000 სასულიერო პირი და მილიონამდე მოქალაქე, მხოლოდ და მხოლოდ მათი რელიგიური რწმენისთვის.
საბჭოთა წარსულის კვლევის ლაბორატორია მოუწოდებს საქართველოს საპატრიარქოს მკაფიოდ დააფიქსიროს პოზიცია იოსებ სტალინის ფიგურასთან დაკავშირებით. მოვუწოდებთ საქართველოს საპატრიარქოს უზრუნველყოს აღნიშნული ხატის შემომწირველთათვის დაბრუნება და სამების საკათედრო ტაძრიდან გატანა.
განსაკუთრებით პრობლემურად მიგვაჩნია, საშობაო ლიტურგიისას ამ ხატის განთავსების სივრცეში საქართველოს მთავრობის და პარლამენტის წევრების, რეაქციის გარეშე დგომა, რომლებიც საქართველოს ყველა მოქალაქეს წარმოადგენენ და კანონით განსაზღვრულ ფარგლებში (იხ. თავისუფლების ქარტია) უნდა რეაგირებდნენ საჯარო სივრცეში ტოტალიტარული სიმბოლოების გამოფენაზე და კაცობრიობის ისტორიაში ერთ-ერთი ყველაზე სისხლიანი დიქტატორის და მასობრივი მკვლელობების ორგანიზატორის დადებით კონტექსტში წარმოჩენაზე. მოვუწოდებთ საქართველოს მთავრობას, იმოქმედოდნ კანონის შესაბამისად და შესრულონ მათზე დაკისრებული მოვალეობა, რაც საბჭოური და ნაცისტური ტოტალიტარული სიმბოლოების საჯარო სივრცეში დემონსტირების აღკვეთაში მდგომარეობს”,_ აცხადებენ საბჭოთა წარსულის კვლევის ლაბორატორიაში.
“პატრიოტთა ალიანის” ლიდერის, ირმა ინაშვილის თქმით კი:
_რას ვიზამთ, ასეთი ეპოქაა, ასეთ ეპოქაში მოგვიწია ცხოვრება, რომ სულ თავი უნდა იმართლოს ჩვენნაირმა ხალხმა და სულ უნდა ვიყოთ თავის მართლების რეჟიმში თურმე. არ ვაპირებთ თავის მართლებას, არაფერი არა გვაქვს თავის სამართლებელი. ჩვენ შევწირეთ ეს ხატი სამების ტაძარს…ძალიან დიდმა პროფესიონალმა, ცნობილმა ხატმწერმა, არაჩვეულებრივმა ადამიანმა დაწერა ეს ხატი, რომელსაც ცოდნაც გააჩნია სათანადო და ცხოვრების წესითაც პასუხობს ხატმწერის კრიტერიუმებს, – ამბობს ირმა ინაშვილი ვიდეომიმართვაში, თუმცა არ აკონკრეტებს, ვინ შექმნა მათი დაკვეთით მატრონას ხატი.
