სტიქია და მისგან მიყენებული სერიოზული ზარალი, უკვე თითქმის ჩვეულებრივ მოვლენად იქცა ჩვენი ქვეყნის ყველა კუთხეში. თუმცა, შესაბამისი ყურადღების გამოჩენა და ფხიზლად ყოფნა, როგორც გურულები ამბობენ, მაინც ვერ ვისწავლეთ.
გურიაში, ბოლო წლებში, სტიქიის ისეთი შეტევებია, მსგავსი უხუცეს ადამიანებსაც რომ არ ახსოვთ. ყველაზე მეტად კოკისპირული წვიმების შედეგი აზიანებს ოზურგეთის მუნიციპალიტეტის სოფლებს და განსაკუთრებით, ქალაქ ოზურგეთის მოსახლეობას. ბოლო წლებში უამრავი ფაქტია, როცა სახლები, მაღაზიები, ბაზრის ტერიტორია, ცენტრალური ქუჩების უმეტესობა ისე ძლიერ იტბორება, რომ ზარალი დიდია და აუნაზღაურებელი.
28 ივლისის ღამეს, მოულოდნელმა კოკისპირულმა წვიმამ, ოზურგეთში, სოფლების და თვით ქალაქის არაერთი ოჯახი დააზიანა.
და მაინც, ახლა კონკრეტულ ფაქტზე შევჩერდებით. ეს არის სიკო დოლიძის ქუჩის ის მონაკვეთი, რომელიც ჭავჭავაძის ქუჩის მიმდებარედ, ოზურგეთის პოლიციის პირდაპირ მდებარეობს.
ეს არის ჩიხი, ასე ვთქვათ, სადაც ექვსი ოჯახი ცხოვრობს და ექვსივე თვლის, რომ მერამდენე წელია, სასტიკად ზარალდებიან.
მიქატაძეები, კვაჭანტირაძეები, მშვიდობაძეები, ბილიხოძეები და ერქომაიშვილები, ამ ჩიხის ერთ მხარეს, ნახევარწრიული განლაგებით ცხოვრობენ. ხოლო სამი მიმართულებით გამავალი არხი, ცხაურებით კარგად დაფარული, თავს იყრის ერთ დიდ წყალგამტარ მილთან, მეორე საჯარო სკოლის უკან. ამ მილის დიამეტრი საკმაოდ დიდია და წესით, წყლის გატარება არ უნდა გაუჭირდეს. თუმცა, ამ ჩიხში ყოველი გაწვიმებისას ტბა დგება და აქ მცხოვრებლები მუდამ ზარალდებიან. პირველ სართულზე მუდამ უფუჭდებათ ტექნიკა, პროდუქტი.
_ იქნებ, გაგიკვირდეთ, ახლა რასაც გეტყვით. ჯერ იმას გკითხავთ, დღეს აქ მოსული ადამიანები, როცა უკვე წყალი დაწრეტილია, წარმოიდგენთ, წუხელ რა ხდებოდა ამ სივრცეში? კი, ბატონო, ვიდეომასალა გავრცელდა, თუმცა, ეს ზღვაში წვეთია. საქმე იმაშია, რომ აქ ერთგვარი არხშემკრები სივრცეა, პირობითად რომ ვთქვათ. მერე კი ერთ უფრო დიდი ზომის მილში გადის ეს წყალი. თუმცა რომ შეხედავთ აქაურობას, მაშინვე მიხვდებით, რომ მილი, რომელშიც ეს თავმოყრილი წყალი უნდა გავიდეს, უფრო მაღლაა, ვიდრე დანარჩენი სამი მიმწოდებელი არხი. შარშან განცხადება დავწერეთ, მივიტანეთ მერიაში, თუმცა დღემდე დაპირების იმედად ვართ. ჩვენთვის უბრალოდ, გაუგებარია, სანამ უნდა ვიყოთ ასე. ყოველ გაწვიმებაზე, ტბა დგას. კიდევ კარგი, წუხანდელი კოკისპირული წვიმა, დიდხანს არ გაგრძელებულა, თორემ ალბათ, სულ დაფარავდა პირველ სართულს. გაგვიფუჭდა სარეცხი მანქანა, მაცივარი…ყველა ერთნაირ მდგომარეობაში ვართ, – ამბობს ამ ქუჩის მცხოვრები ტიფო მიქატაძე.
მან ხაზგასმით აღნიშნა ერთი გარემოების შესახებ _ რომ ინფრასსტრუქტურული მოწყობა როცა ხდება, პროექტებს როცა ადგენენ, მოსახლეობასთან ან არავინ მიდის ან ერთხელ თუ ნახავენ იმ ადგილებს, სადაც წყალგამტარი არხების და მილების დაგეგმარება და დამონტაჟება უნდა მოხდეს.
_საკვირველი ის არის, რომ უბრალო დაკვირვებითაც მიხვდება ადამიანი, როგორ „აძალებენ“ წყალს, სიკო დოლიძის ქუჩაზე, რომ აღმა წავიდეს. ეს ნორმალურია? გეკითხებით, ერთ სიმაღლეზე გაკეთებული სამი არხიდან ჩამონადენი წყალი, მოულოდნელად უფრო მაღლა მდებარე მილს უნდა შეუერთდეს. და მერე ის გაატარებს? წავალ წყალი აღმა? ამის გამკეთებელს დაკვირვების უნარი არ უნდა ჰქონდეს? უბრალო სანტექნიკოსიც მიხვდება ამას. წლების წინ, როცა ეს არხები, ბეგი სიორიძის მერად ყოფნის დროს გააკეთეს, მაშინ საკმაოდ კარგად ატარებდა წყალს. თუმცა იმ დროს დიდი წყალდიდობებიც არ იყო. მერე , ბუნებრივია, არხებში შლ;ამიანკ ნალექიც ბლომად იქნება. აგერ ყრია პლასტმასიხ ბოთლები და რა არ მოჰქონდა… ვინ წმენდს ამ არხებს სისტემატიურად? ხალხის დაუდევრობაც სახეზეა-ნაგავს და ნარცენებს ყრიან. და ,აი, შედეგიც გვაქვს, _ ამბობს ის.
აქ, საყურადღებოა კიდევ ერთი ფაქტი. ჭავჭავაძის ქუჩაზე მდებარე ნომერ სამი კორპუსის საძირკველში, პირველ სადარბაზოსთან, მუდმივად ამოდის წყალი. ეს ადგილობრივებმა იციან და ერთი არხის გაკეთება ადრევე მოითხოვეს. ამ ერთ არხში ისედაც მუდმივად მიედინება აღნიშნული კორპუსის ქვემოდან გამომავალი წყალი. ესეც საფრთხილო თემაა, რადგან მოვარდნილი ღვართქაფის პირობებში, აქ ყოველთვის მეტი რაოდენობით იქნება წყალი. ასეთ დღეში ვართ. ბერმუდის სამკუთხედივით…არაა ჩვენი საშველი. უბრალოდ, გადაიღებს, გავასუფთავებთ ამ დატბორილ სარდაფებს და გვავიწყდება მერე. ერთხელ და სამუდამოდ რომ კარგად გაკეთდეს და ყოველ წელიწადს არ ვიყოთ აწრიალებული, არ შეიძლება? მით უფრო, როცა ვხედავთ, რომ მსოფლიოში როგორი კლიმატური ცვლილებებია. ასეთი თავსხმა და თქეში ნაკლებად გვახსოვს. კიდევ კარგი, მალე ჩერდება. თუმცა სულ ასე ხომ არ იქნება? ახლა მივიტანთ მერიაში განცხადებას და მოვითხოვთ, ხელახლა მოხდეს დაპროექტება. სხვა გზა არაა, – გვეუბნებიან აქ მცხოვრები კვაჭანტირაძეების და ერქომაიშვილების ოჯახების წარმომადგენლები.
ტიფო მიქატაძე ამბობს, რომ შარშან შეტანილ განცხადებაზე, მუნიციპალიტეტის მერიიდან რეაგირება არ ყოფილა. არც არავის გახსენებია, დაპირება კი იყო და სულ ეგ არის.
_ხვალვე რომ დაგვეხმარონ, მთავარი ისა, რომ ვინმე ჭკუათმყოფელმა დააგეგმაროს და ჯერ ის იფიქროს, რა მოცულობის წყალი დგება, რამხელა მილია საჭირო მის გასატარებლად და რა სიმაღლეზე უნდა განთავსდეს ამ სივრცეში. თითქოს, დაწყებითი კლასის მოსწავლის დონეზე გასაგები პრობლემაა და დღემდე არაა გადაჭრილი, _ ამბობს ის.
ოზურგეთის მუნიციპალიტეტის მერიის პრესსამსახურში გვითხრეს, რომ წუხანდელი სტიქიის დროს, ბევრ სოფელში გამოირთო შუქი და ჯერ, პირველ ეტაპზე ხდება აღდგენა და შეკეთება.
_ ისე კი ყველა ოჯახში ხდება ჩამოვლა და აღრიცხვა, სად რა ზარალია. ამ დრომდე გრძელდება ეს პროცესი, _ გვთხრა ნინო ბახტაძემ.
ოზურგეთის მუნიციპალიტეტის მერიის ინფრასტრუქტურის სამსახურის უფროსი გოჩა აბაშმაძე, კონკრეტულად სიკო დოლიძის ჩიხში არსებული მდგომარეობს გამო მოკლე კომენტარს აკეთებს:
_ საქმის კურსში ვართ. ვიცით იქ არსებული მდგომარეობა და აუცილებლად გაკეთდება. ბევრ ადგილზეა სტიქიისგან მიყენებული სერიოზული დაზინება და მოგეხსენებათ, უცებ არ კეთდება. ჩვენ ყველა ქუჩაზე, ყველა სოფელში ვიყავით, საიდანაც ზარი იყო თუ არ იყო. აუცილებლად გავაკეთებთ, _ გვითხრა მან.
ავტორი
