გურიაში მომხდარი სტიქიური უბედურების შემდეგ, ადგილობრივი მოსახლეობის არაერთი წარმომადგენელი, რომელთა უმეტესობა მდინარეების სანაპიროებთან ახლოს ცხოვრობს, ძალიან დაფრთხა და ყველასგან ყურადღებას ითხოვს.
ერთ-ერთი მათგანია ოზურგეთის მუნიციპალიტეტის სოფელ ლიხაურის მკვიდრი, მდინარე აჭისწყლის სანაპიროსთან მცხოვრები, გოჩა ცეცხლაძის ოჯახი. მისი სახლი აჭისწყლის ნაპირთან, ე. წ. გაბმულ ხიდთან, ორმოცდაათიოდე მეტრის დაშორებით მდებარეობს. მდინარის ნაწილი, არხის სახით, რომელიც უფრო დაბლა მდებარე საკალმახე მეურნეობას ამარაგებს, სახლთან კიდევ უფრო ახლოა და ოჯახი სწორედ ამაზე დაობს.
_ ამ არხის მეშვეობით, მდინარე კიდევ უფრო დაახლოებულია ჩვენს სახლს. მე ჩხუბი და დავა არ მინდა. უბრალოდ, ხომ კარგად ხედავთ, არხი სულ ახლოსაა. უკვე ყველამ დაინახა, რა სტიქიური უბედურება დაატყდა გურიას და არავინ იცის, რა მოხდება უახლოეს მომავალში. აჭისწყალი მთის გავეშებული მდინარეა. წლების წინ, ამ მდინარეზე არსებული ხიდი, მოგლიჯა ადიდებულმა წყალმა და ჩემი სახლის ღობეს შემოანარცხა. რა შიში მაშინ გავიარეთ… შემდეგ ხელისუფლებამ მართლაც სასწრაფოდ იმოქმედა. ხიდის სიმაღლე ასწიეს და ახლა საუკეთესო, მავთულბადით შემორაგვული ბონდის ხიდია გაკიდული და სოფლის მეორე ნაწილთან დაკავშირება ადვილია. თუმცა, ახლა ეს არხი, პირდაპირ საფრთხეს უქმნის ჩემს სახლს. ახლახან საკალმახე მეურნეობის პატრონმა მოიყვანა ტრაქტორი და კალაპოტი ისე გაწმინდა, მარჯვენა ნაპირის გასწვრივ ხრეშის გორები გაჩნდა. მარცხენა ნაპირზე კი, ანუ ჩემს მხარეს არაფერი დაუყრია და მხოლოდ მიწის ჩაქცეული ადგილებია. არანაირი დამცავი კედელი აქეთ არ არის. ეს აშკარაა, ნაპირს თანდათან მიიტაცებს წყალი და სახლში იქნებ არ ამოვიდეს, თუმცა, მიწის ზოლს, სიგრძეზე მთლიანად მიიტაცებს. აქ დამბა თუ არ გაკეთდა, ან რაიმე ღონისძიება თუ არ გატარდა… მე ახლახან გადმოვედი ჩემს სახლში, აქ, საცხოვრებლად და ვაკეთებ, ვალამაზებ, რომ სიცოცხლის ბოლომდე აქ ვიცხოვრო. აქამდე ქალაქში ვცხოვრობდი და აქ მხოლოდ დედაჩემი ცხოვრობდა, _ ამბობს გოჩა ცეცხლაძე.
როგორც ადგილზე ვნახეთ, მდინარე აჭისწყლის კალაპოტი, ხიდის ზედა მხარეს, გაყოფილია და საკმაოდ დიდი არხი მარცხნივ არის გადაგდებული, რომელიც სოფელში არსებულ საკალმახე მეურნეობის აუზში მიედინება.
_ ჩვენ მეურნეობის პატრონს კი არ ვებრძვით, ვითხოვთ, აქ დამცავი საშუალება გაკეთდეს. ასეთ ამბებს რომ ვუყურებთ სტიქიაზე, შიშით ვცხოვრობთ. რა გარანტია გვაქვს, რომ ასე ადიდებას მიჩვეული მთის მდინარე, უარესად არ ადიდდება და არ დაგვაზარალებს? სტიქიური საფრთხის პირისპირ ვდგავართ. ეს არხი, რომლის საშუალებითაც ისედაც ახლოს მდებარე კალაპოტი, ეზოსთან კიდევ უფრო დააახლოვა, რომელ ჭკუათმყოფელს არ შეაშინებს? _ ამბობს გოჩა ცეცხლაძის დედა, ნაზიკო ცეცხლაძე.
“გურია ნიუსი” საკალმახე მეურნეობის ამჟამინდელ მფლობელს, ელგუჯა ჩანტლაძეს ესაუბრა.
_ მე ინდმეწარმე ვარ და იჯარით მაქვს აღებული ეს საკალმახე მეურნეობა. არანაირ ზიანს ჩვენ ცეცხლაძის ოჯახს არ ვაყენებთ. ეს არხი ახლა დაინახეს? 1976 წლიდან აქ არის და კომუნისტების დროიდან იყო გაკეთებული. მერე ვიღაცამ იყიდა და გააკეთა. ორი წელია, რაც მე იჯარით მაქვს აღებული ეს მეურნეობა. თვეში ერთხელ ყოველთვის მომყავს ტრაქტორი, რათა ნალექისგან, შლამისგან და მდინარის ჩამოტანილი სხვადასხვა ნარჩენებისგან გავასუფთავო კალაპოტი. კალმახს, ზოგადად თევზს, თუ არ მიეწოდა სუფთა წყალი, კალმახი იღუპება! იცით, გასულ წელს რამხელა ზარალი ვნახე? ათიათასი ლარის! ღმერთმა დაიფაროს და ეს მდინარე ისე თუ ადიდდება, როგორც არასდროს, ჯერ მე და ჩემს საკალმახეს წაგვიღებს და მანდ წყალი მაინც არ ავა. არანაირი საფრთხე არ არსებობს. ტყუილად მედავებიან…
_ ბატონო ელგუჯა, გოჩა ცეცხლაძე ამბობს, რომ საკუთარ სახლში საცხოვრებლად ახლახან დაბრუნდა და არემონტებს. ხედავს საფრთხეს და ითხოვს დაცულად ყოფნას.
_ მერე, მე რას მერჩის? ხომ დადიოდა ამ სახლში. ეს არხი ახლა დაინახა? მე გავჭერი? ნახევარი საუკუნეა, აქ არის! მე მხოლოდ სიბინძურისგან, ნარჩენებისგან გავასუფთავე და მასაც უნდა უხაროდეს, რომ სახლის წინ სუფთა წყალი და არხი იქნება. საშუალება რომ იყოს, კი, ბატონო, ავაგებ ნაპირის გასწვრივ დამბას, მაგრამ თუ იცის, ეს რამდენი ღირს? _ გვითხრა ელგუჯა ჩანტლაძემ და კვლავ გაიმეორა, რომ მისი მხრიდან ცეცხლაძეებს არანაირი საფრთხე არ ემუქრებათ.
აქვე აღვნიშნავთ, რომ სახლის სიახლოვეს არსებულ გაბმულ ხიდთან, მარჯვნივ, საუკეთესო დამბაა გაკეთებული. ცეცხლაძეები, დაახლოებით, ასეთივე დამბის გაკეთებას ითხოვენ. ამაზე კი ჩანტლაძე ამბობს, რომ დამბა სამთავრობო პროგრამით გაკეთდა და მას ასეთივეს გაკეთების საშუალება არ აქვს. არც ხედავს ამის აუცილებლობას, რადგან არხიდან არასდროს არავის არანაირი ზიანი არ მიდგომია.
“გურია ნიუსი ” ოზურგეთის მუნიციპალიტეტის მერის წარმომადგენელს ლიხაურში, ნანა წითლიძეს ესაუბრა. მან გვითხრა, რომ აქ გარემოს დაცვის სამსახურიდან ჰყავდა ჯგუფი გამოძახებული:
_ მე დავურეკე გურიის გარემოს დაცვის სამსახურის წარმომადგენელს. ადგილზე მოვიდნენ. დაათვალიერეს გარემო, მდინარის კალაპოტი. ესაუბრნენ გოჩა ცეცხლაძეს. შემდეგ შედგა ოქმი და ამის თაობაზე ორივე მხარე საქმის კურსშია. ჩვენ ყველანაირად მივაქცევთ ყურადღებას, რომ მდგომარეობა არ გართულდეს, _ გვითხრა ნანა წითლიძემ.
“გურია ნიუსი” მაქსიმალურად ეცდება, თვალი მიადევნოს აქ არსებულ მდგომარეობას.
ავტორი
