„გამარჯობა და გამარჯვება“ _ ასე დაიწყო, ამ დილით, ოზურგეთის მეორე საჯარო სკოლის დირექტორმა, ფატი სიორიძემ თავისი მისასალმებელი სიტყვა, სკოლის წინ შეკრებილი უამრვი მოსწავლისა და მათი მშობლების წინაშე.
_გილოცავთ ახალ სასწავლო წელს. უდიდესი სიხარულია სწავლის პირისპირ დაწყება! _ სრულიად საქართველოსთვის ყველაზე სასურველი ფრაზით დაიწყო მან და მიანიშნა, თუ რაოდენ დიდი ბედნიერებაა, პანდემიიის საკმაოდ მძიმე პერიოდის უკან მოტოვება. შემდეგ კი სწავლის თავისუფლად, პირბადეების და სხვადასხვა რეგულაციების გარეშე დაწყება.
ქალბატონმა ფატიმ ისაუბრა მეორე საჯარო სკოლის ტრადიციულ წარმატებებზე. წამყვან და მენტორ მასწვლებლებს გამარჯვება მიულოცა. ასევე გზა დაულოცა ახალბედა მასწავლებელს გიორგი თოიძეს, რომელმაც ახლახან მიიღო უფროსი მასწავლებლის სტატუსი.
მან ასევე საგანგებოდ აღნიშნა ახლახან გარდაცვლილი სკოლის ყოფილი დირექტორის , ლიანა იმედაშვილის უდიდესი დამსახურების შესახებ და წუთიერი დუმილით პატივი მიაგეს დამსახურებული აღმზრდელის და ხელმძღვანელის ხსოვნას.
_მინდა დიდი სიყვარულით მოგილოცოთ ეს დღე. როგორც დირექტორმა აღნიშნა, სწავლის პირისპირ დაწყება, ეს არის დიდი შესაძლებლობა! ვიმედოვნებ, ჩვენ აწი არცერთი ონლაინ რეჟიმი არ გვექნება და ამისთვის გისურვებთ, პირველ რიგში, ჯანმრთელობას! ვისურვებდი, ყველა წარმატებული აღზრდილი, ვინც სტუდენტი გახდა ან არის, დაუბრუნდეს თავის მშობლიურ ქალაქს! _თქვა თავის მისასალმებელ სიტყვაში, ოზურგეთის სასკოლო რესურსცენტრის უფროსმა ლელა იმედაშვილმა.
სწავლის დაწყების ზეიმზე შესრულდა საქართველოს ჰიმნი.
ახლაგაზრდა პედაგოგმა გიორგი თოიძემ და მეექვსე კლასელმა დამირი შალიკაშვილმა კი საქართველოს დროშა აღმართეს.
მშობლებს, პედაგოგებს, მოსწავლეებს მიესალმნენ მშობელი მარიკა ჩხიკვიშვილი, სტუდენტები, ვინც წელს წარმატებით ჩააბარეს ეროვნული გამოცდები და სასწავლო გრანტი მოიპოვეს.
დაწყებითი კლასების მოსწავლეებმა მარიამ ჩანქსელიანმა და ლიკა სირაძემ გვითხრეს, რომ სულ ათიანებზე ისწავლიან.
_ასიანებსაც მივიღებთ“ – დადეს ბავშვური პირობა!
სკოლის მუსიკალურმა და ქორეოგრაფიულმა ანსამბლებმა, (ხელმძღვანელები მაია თოთიბაძე და კობა დუნდუა) სიმღერითა და ცეკვით, კიდევ უფრო მეტი საზეიმო ელფერი შესძინეს სასწავლო წლის დაწყებას .
„მზეო, ცისკარი იხსნება, ვხედავ“- წკრიალით გასცდა სკოლის სივრცეს მოსწავლეთა ხმა და ლაჟვარდებს მიეახლა…
მარიამ ქორიძემ და შალვა ვადაჭკორიამ სწავლის მაუწყებელი ზარი დარეკეს.
ოზურგეთის მეორე საჯარო სკოლაში, წელს, 110-მა პირველკლასელმა შეაღო საკლასო ოთახის კარი.
ავტორი
