გუშინ, ტურინის „იუვენტუსის“ ყოფილმა ფეხბურთელმა ალესიო ტაკინარდიმ ხვიჩა კვარაცხელიაზე ისაუბრა და განაცხადა, რომ მას ისეთი თვისებები აქვს, რაც გუნდის ლიდერობისთვის საჭიროა.
„ფეხბურთელის თვისებების დანახვამდე ვაკვირდები მოედანზე მის დამოკიდებულებას და კვარაცხელიას საოცარი თავმდაბლობა აქვს, ასევე ფეხბურთს ვნებით თამაშობს და ამ თვისებებით მხოლოდ გუნდის მამოძრავებელი ძალა, ლიდერი შეიძლება გახდეს. ვულოცავ მათ, ვისაც მისი სჯეროდა და ვინც აირჩია მისი შეძენა. იგივე ეხება კიმსაც, რადგან ამ მცველმაც ჩემზე შთაბეჭდილება მოახდინა“, – განაცხადა ალესიო ტაკინარდიმ.
გუშინ, იაპონიის დედაქალაქ ტოკიოში ძიუდოისტთა „გრანდ სლემ“ დაიწყო. ვაჟთა შორის საქართველოს ერთადერთი წარმომადგენელი ლაშა ბექაური ბრინჯაოს მედალს დასჯერდა.
ლაშამ პირველ ბრძოლაში კორეელი დონ ჰან გვაკი დაამარცხა, შემდეგ კი მასპინძელს, მსოფლიოს ვიცე–ჩემპიონ სოიჩირო მუკაის სძლია და ნახევარფინალში გავიდა, სადაც კიდევ ერთ იაპონელთან, კოსუკე მასიამასთან წააგო და ბრინჯაოს მედალი მოიპოვა, როდესაც ასევე იაპონელი მაშუ ბეიკერი დაამარცხა.
ქალთა შორის ასპარეზობდა ეთერ ლიპარტელიანი, რომელიც პირველივე ბრძოლაში დამარცხდა ცუკასა იოშიდასთან და ასპარეზობას გამოეთიშა.
ნინო ლოლაძემ ჯერ არაბთა გაერთიანებული საამიროების წარმომადგენელ მაიტა მოჰამედს სძლია, ხოლო გერმანელ პაულინე შტარკესთან ვერაფერს გახდა.
ეთერ ასკილაშვილმა პირველ წრეში ავსტრალიელი მევ კუგლანი დაამარცხა, შემდეგი ორთაბრძოლა კი 23-წლამდელებში პოლონელთა ევროპის ჩემპიონ ანგელიკა შიმანსკასთან დათმო.
ევროპის ახალგაზრდული ოლიმპიური ფესტივალის მესამე პრიზიორმა ნინო გულბანმა პირველივე წრეში წააგო რუმინელ სერაფიმა მოსკალუსთან.
საქართველოს თავისუფალი სტილით მოჭიდავეთა ნაკრები 2022 წლის სეზონის ბოლოს მსოფლიოს თასის მოსაგებად იბრძოლებს. გუნდურ ტურნირს 10-11 დეკემბერს აშშ–ს ქალაქი კორალვილი უმასპინძლებს.
მსოფლიოს უძლიერესი ნაკრების ტიტულისთვის ბრძოლაში ექვსი გუნდი ჩაებმება, სადაც ტიტულის მოპოვებას საქართველოს ნაკრების გარდა ეცდებიან აშშ, ირანი, მონღოლეთი და იაპონია, მეექვსე მონაწილე კი მსოფლიოს ნაკრებია, რომელიც მსოფლიო თასს მიღმა დარჩენილი ქვეყნების საუკეთესო ფალავნებით დაკომპლექტდა.
A ჯგუფში საქართველოს ნაკრების მეტოქეები აშშ და მონღოლეთი იქნებიან, B ჯგუფში კი ირანი, იაპონია და მსოფლიოს ნაკრები მოხვდნენ.
ჯგუფებში პირველ ადგილზე გასული ნაკრებები ერთმანეთს ფინალში დაუპირისპირდებიან, მეორეადგილოსნები კი ბრინჯაოს მედლისთვის იჭიდავებენ.
საქართველოს მოჭიდავეთა ნაკრების შემადგენლობა შემდეგია:
ბექა ბუჯიაშვილი (57 კგ.), თეიმურაზ ვანიშვილი (61 კგ.), ბექა ლომთაძე (65 კგ.), გიორგი ელბაქიძე (70 კგ.), გიორგი სულავა (74 კგ.), ვლადიმერ გამყრელიძე (79 კგ.), ტარზან მაისურაძე (86 კგ.), მირიან მაისურაძე (92 კგ.), გივი მაჭარაშვილი (97 კგ.), სოლომონ მანაშვილი (125 კგ.).
საქართველოს საკალათბურთო ნაკრების წევრის დუდა სანაძის „ანორთოსისმა“ კვიპროსის ჩემპიონატში მე-8 ტურში „აპოლონს“ საკუთარ არენაზე უმასპინძლა და მეტოქეს დიდი სხვაობით მოუგო. ქართველმა კალათბურთელმა მოედანზე 35:22 წუთი გაატარა, რა დროშიც 32 ქულას, 2 მოხსნასა, 5 პასს და 3 ჩაჭრას მოუყარა თავი.
დუდამ კვიპროსის ჩემპიონატში მესამე მატჩი ჩაატარა და „ომონიასთან“ დამყარებული რეკორდი (27 ქულა) გააუმჯობესა.
ესპანური „მურსიას“ მთავარმა მწვრთნელმა სიტო ალონსომ კი პრესკონფერენცია ჩაატარა და სხვადასხვა საკითხებთან ერთად გუნდის ახალწვეულ რატი ანდრონიკაშვილზეც ისაუბრა. საქართველოს ნაკრების კალათბურთელი „მურსიაში“ რამდენიმე დღის წინ გადავიდა და დებიუტისთვის ემზადება.
სიტო ალონსო: „სწორედ მისნაირ კალათბურთელს ვეძებდით, რომელსაც ჩვენთან თამაშის დიდი სურვილი ჰქონდა და თანაც ტრანსფერს მურსიას ფინანსური შესაძლებლობები გაწვდებოდა. რატის კარგად ესმის, რამდენად მნიშვნელოვანი შეიძლება იყოს მისი დაცვითი უნარები, რაც მისი მთავარი ღირსებაა. ვარჯიშებზე ის ძალიან მონდომებული და აქტიურია“.
„ბასკონიასა“ და „მურსიას“ შეხვედრა დღეს არის დაგეგმილი და დიდი ალბათობით, ანდრონიკაშვილი ესპანური კლუბის მაისურს პირველად ამ მატჩში მოირგებს.
„მურსიას“ ღირსებას საქართველოს ნაკრების კიდევ ერთი კალათბურთელი თად მაკფადენი იცავს. ამ გუნდს 4 მოგებითა და 5 მარცხით ესპანურ „ლიგა ენდესაში“ მე-11 ადგილი უკავია.
ავტორი
