ახლახან ისეთი ამბის მომსწრე გავხდით “გურია ნიუსის” ოზურგეთის განყოფილების ოფისში, სხვას რომ მოეყოლა, დაჯერება გაგვიჭირდებოდა.
რედაქციის კარი შემოაღო გამხდარმა, წელში ოდნავ მოხრილმა ქალბატონმა და დამფრთხალი ხმით იკითხა: “თქვენთან მოვედი, შემომიშვებთ? სათხოვარი მაქვს, რომ ცოტა წამომეშველოთ… აქ მომასწავლეს, რომ რედაქციაა. პატარა გოგო მომყვა სადარბაზომდე… ტელეფონით ვერ დაგირეკეთ. მე წერა–კითხვა არ ვიცი… ღმერთმა მიმატოვა პატარაობიდანვე. ხუთიოდე წლისა მამამ ჭაში ჩამაგდო (!!!)… ბიცოლამ გადამარჩინა და გამზარდა. მეხსიერება მღალატობს. წერა–კითხვა ვერ ვისწავლე. მაინც ვწვალობ და ვიბრძვი…”
ჯერ პირადობის მოწმობა მომაწოდა, ეს ვარო. მერე _ ცალკე ბარათი, სადაც ტელეფონის ნომერი ეწერა. თან ისევ განმარტა, სულ ასე დავდივარ, წამლებს ვსვამ. ძლივს ვარსებობ, ჩემი სიცოცხლე განა სიცოცხლეაო…
პირადობის მოწმობას დავხედე. მანანა გოგუაძე (აწ უკვე გარდაცვლილი მეუღლის გვარი მარგველაშვილი), 59 წლის…
საკმაოდ დამთრგუნველი ბიოგრაფიის მოყოლისას, ჯერ იმის კითხვა მოვახერხეთ, სასჯელი მოიხადა თუ არა იმ სასტიკმა კაცმა, ვინც 50-ზე მეტი წლის წინ ასე მოექცა. კიო, _ დაგვიდასტურა. უკვე დიდი ვიყავი, ციხიდან რომ გამოვიდა და გარდაიცვალა, არ დავიტირეო. ან რატომ უნდა დამეტირაო?
უკვე გასაგები გახდა ქალბატონის მდგომარეობის თავისებურება და მისი მდგომარეობის და გასაჭირის შესახებ მოსმენის სურვილიც გაორმაგდა.
გვიამბო, რომ ოზურგეთში, სოფელ ნატანებში დაიბადა. მამას რატომღაც არ მოსწონდა. ერთხელაც ასეთი უმძიმესი რამ ჩაიდინა _ ბავშვი ჭაში ჩააგდო. გადაარჩინეს და ბიცოლამ იკისრა მისი გაზრდა. ზრდასრულ ასაკში დაქორწინდა. სამი შვილი გაზარდა. მერე მეუღლე გარდაეცვალა და დღემდე მუდმივად გასაჭირშია.
მანანა გოგუაძე (პირადობის მოწმობით აწ გარდაცვლილი მეუღლის გვარით, მარგველაშვილით ფიგურირებს) 59 წლისაა. ცხოვრობს სოფელ მერიაში, სოციალურ თავშესაფრად ცნობილ ბინაში. ეს არის მრავალსართულიანი კორპუსი, რომელიც კომუნისტურ ეპოქაში სამხედრო აეროდრომის სიახლოვეს, იქ მომუშავეთა საცხოვრებელს წარმოადგენდა.
მოგვიანებით, როცა საბჭოთა კავშირი დაიშალა, იქ ხშირად სხვადასხვა სოფლიდან (რაიონებიდანაც) ჩამოსული ადამიანები ცხოვრობდნენ. მოგვიანებით, ხელისუფლების ინიციატივით, გაარემონტეს და სოციალურად დაუცველი პირები, უმეტესად უსახლკაროები, შეასახლეს.
მანანა გოგუაძე, როგორც თავად გვიყვება, შვილებთან ერთად, ერთოთახიან ბინაში ცხოვრობს, სადაც სისტემატურად ჩამოდის წყალი:
_ არ არსებობს გაწვიმდეს და სამზარეულო წყლით არ გაივსოს. პირდაპირ “სინკარს” მოყვება. ახლა, ერთი ტომარა პურის ფქვილი რომ ძლივს ვიყიდე, მთლიანად დამისველდა. მომდევნო დახმარებამდე ვერ ვიყიდი და მეზობლები მეხმარებიან. თითო პურს ყიდულობენ. ნახევარჯერ მშიერი ვარ, _ გვეუბნება ის.
მისივე ნაამბობით, ბინაში, რომელიც სოციალური თავშესაფრის სახელითაა ცნობილი, მანანა გოგუაძე-მარგველაშვილი მესამე სართულზე ცხოვრობს. ასაკობრივი პენსია ჯერ არ მიუღია. ავადმყოფობის გამო ასლარიან პენსიას იღებს. ასევე 50 ლარის ოდენობით ეძლევა სოციალური დახმარებაც. თუმცა 150 ლარით ცხოვრება, როგორც თავად ამბობს, ძალიან უჭირს:
_ თვიდან თვემდე ამ თანხით თავის გატანა როგორია? თუმცა, ამაზე არაფერს ვამბობ. აქამდე მუშაობდა ჩემი შვილი. მერე მშენებლობაზე დაიმტვრა. ნეკნები დაუზიანდა და დღემდე მოძრაობა უჭირს. გაჭირვებულს ქვა აღმართში წაეწიაო, ისე ვართ. ნამუშევარი, ხუთი ათას ლარამდე ასაღები აქვს და ესეც პრობლემა გაუხდა. ახლა იქეთ ვეხმარები. მეორე ვაჟიშვილი ბათუმში, მეუღლესთან ერთად ცხოვრობს, მის სახლში. ახლა მეორე შვილს ელოდება და თავისი საქმე აქვს. მესამე შვილი, ჩემი ქალიშვილი თბილისშია გათხოვილი და ოღონდაც თავის თავს მიხედონ, მე ვერ შევაწუხებ, _ გვეუბნება ის და რასაც ითხოვს, ეს არის ახალი თავშესაფარი ან ბინის ისე გარემონტება, რომ წყალი არ ჩამოვიდეს.
ის მადლიერებასაც გამოთქვამს იმის გამო, რომ ერთხელ მეზობლებმა მოინდომეს. სოფლის გამგებელიც დაეხმარა, ცემენტი შეუძინეს და კონკრეტულ ადგილზე ბეტონის საფარი დაასხეს, შელესეს… თუმცა, ახლახან, ძლიერი წვიმის დროს წყალი მაინც ჩამოვიდა და საკვები პროდუქტებიანად ყველაფერი დაუსველა.
როგორც ოზურგეთის მუნიციპალიტეტის მერის მიერ გაცემული ბრძანებიდან ირკვევა, გოგუაძეს დროებით სარგებლობაში, თხოვების ფორმით გადასცეს, სოფელ მერიის ადმინისტრაციულ ერთეულში მდებარე მრავალბინიანი საცხოვრებელი სახლის, პირველ სადარბაზოში, მესამე სართულზე მდებარე ერთოთახიანი ბინა. ეს მოხდა 2024 წლის 26 ივლისის ბრძანების შესაბამისად.
“გურია ნიუსი” სოფელ მერიის ადმინისტრაციულ ერთეულში, მუნიციპალიტეტის მერის წარმომადგენელს დაუკავშირდა. გვესაუბრა თანაშემწე ნანული ხურციძე, რომელმაც გვითხრა, რომ საქმის კურსში არიან, იციან მანანა გოგუაძის მდგომარეობის შესახებ:
_ მეც იმავე სოციალურ თავშესაფრად წოდებულ ბინაში ვცხოვრობ ჩემი ოჯახით, რადგან ადრე, სტიქიის დროს, სახლი ისე დამიზიანდა, რომ საცხოვრებლად ვარგისი აღარ იყო. ამიტომ მუდმივად როცა აქ ვარ, თითოეული ოჯახის მდგომარეობა ვიცი და მაქსიმუმს ვაკეთებთ, რომ პრობლემები არანაირი კუთხით არ შეექმნათ. წყალი ნამდვილად ჟონავს და არა მარტო მასთან. ეს კორპუსი გარედან არ არის თუნუქის ან სხვა მეტალით დაფარული და ამიტომ, ძლიერი წვიმის დროს, სამწუხაროდ, წყალი ჟონავს…
_ ქალბატონი ნანული ამბობს, რომ კი არ ჟონავს, სახლი წყლით ივსება. ყველაზე მეტად კედლებში ატანს…
_ მთლად მასე არაა _ გაზვიადებულია ეს ამბავი. ისე კი მანანა გოგუაძის შესახებ ჩვენ ოზურგეთის მუნიციპალიტეტის მერიას მივმართეთ და ამ ეტაპზე არ არის თავისუფალი ფართი. 2024 წელს გადასცეს მას ეს ბინა. მანამდე ის ფაქტობრივი მისამართით ნატანებს ეკუთვნოდა. ცხოვრობდა ავარიულ ბინებში. ეს ორსართულიანი ძველი სახლებია სოფელ თხინვალის გადასახვევთან, მერიას ეკუთვნის. თუ რამ შეიძლებოდა, მაშინ მერიამ დახმარება გაუწია. ახლაც საქმის კურსში ვართ და არ დარჩება უმეთვალყურეოდ, _ გვითხრა ქალბატონმა ნანულიმ.
ოზურგეთის მუნიციპალიტეტის მერიის ჯანმრთელობის დაცვის და სოციალური სერვისების სამსახურის უფროსი მაიზერ ცელაძე “გურია ნიუსთან” ამბობს, რომ აღნიშნული სამსახურისთვის ცნობილია ამ ქალბატონის შესახებ:
_ ეს ქალბატონი, მანანა გოგუაძე, ცხოვრობდა ძველ ბინებში. არის მანდ, სოფელ მერიაში, ორსართულიანი, ძველი, საკმაოდ დაზიანებული ბინები. როგორც მახსოვს, მან დაწერა განცხადება და შესაბამისმა კომისიამ იმუშავა. 2024 წელს გადაიყვანეს აღნიშნული კორპუსის ბინაში. რაკი ასეთი პრობლემა შეექმნა, მომართვის საფუძველზე ვესაუბრე დეპუტატს. დადასტურებულია, კორპუსის რომ გვერდითა მხრიდან, ძლიერი წვიმის დროს, ჩადის წყალი. არც ერთჯერადად შეკეთებამ გამოიღო შედეგი. რას უზამ, კორპუსის ბინაა. ცალკე ხომ ვერ გადახურავ? მე ვურჩიე, რომ რაკი სხვებიც უჩივიან მსგავს პრობლემას, ერთობლივი განცხადება დაწერონ და მოხდება განხილვა. შემდეგ კი დადგენილების საფუძველზე შეკეთება თუ ზოგადად ღონისძიების გატარება მოხდება. ხაზგასმით გეტყვით, რომ საქმის კურსში ვართ ამ ქალბატონის მდგომარეობის შესახებ და არ დარჩება უყურადღებოდ, _ გვითხრა მაიზერ ცელაძემ.
“გურია ნიუსი” მიადევნებს თვალს ამ პროცესს. ქალბატონი, რომლის ცხოვრების გზა ბავშვობიდანვე ტრაგიკულია, მაინც გამორჩეულ ყურადღებას ითხოვს…
