ლანჩხუთში, სუფსის მოსახლეობამ ავტობანთან დაკავშირებით დღეს საპროტესტო აქცია გამართა. როგორც ამბობენ, თანხა, რომელიც სახელმწიფომ მათ კუთვნილი მიწების დათმობის სანაცვლოდ გადაუხადა მიზერულია და ქვეყნის ხელისუფლებისგან საკითხით დაინტერესებას ითხოვენ.
საქმე სუფსის ადმინისტრაციული ერთეულის საზღვრებში მოქცეულ კერძო საკუთრებაში არსებულ სასოფლო-სამეურნეო დანიშნულების მიწის იმ ნაკვეთებს ეხება, რომლებიც “ფოთი-გრიგოლეთის” 14-კილომეტრიანი მონაკვეთის საზღვრებში ავტობანის მშენებლობის პროექტში მოხვდა. სუფსის ადმინისტრაციის მოსახლეობის ნაწილისთვის კატეგორიულად მიუღებელია სახელმწიფოს მიერ ერთ კვ/მეტრზე შეთავაზებული ფასი.
„ჩვენი კერძო საკუთრება (მიწის ნაკვეთები) მიზერულ ფასებად მუქარითა და იძულებაში ჩაყენებით დაგვათმობინეს. დღემდე ვითხოვთ სამართალს, გენპროკურატურასაც მივმართეთ საქმის ჯეროვანი გამოძიების მოთხოვნით, რამდენიმე თვის წინ ჩვენთან შესახვედრად ჩამოსული იყო კიდეც საავტომობილო გზების დეპარტამენტის წარმომადგენელი. ფართობების კომპენსირების თანხის თაობაზე სუფსის მოსახლეობის მხრიდან ინფორმირებულია პარლამენტის თავმჯდომარის მოადგილე გია ვოლსკი და იუსტიციის მინისტრი თეა წულუკიანიც, ადგილობრივ ხელისუფლების წარმომადგენლებზე აღარაფერს ვამბობთ, თუმცა ფაქტია, რომ ყველაფერ ამას არანაირი შედეგი არ მოჰყოლია. ვოლსკი და წულუკიანი კი , დაგვპირდნენ საკითხით დავინტერესდებითო, მაგრამ საქმე ამის იქეთ არ წასულა“ _ საკუთარ უკმაყოფილებას „გურია ნიუსთან გაკეთებულ კომენტარში აფიქსირებენ მიწის იმ მესაკუთრეები, რომელთა ნაკვეთებიც მოექცა გრიგოლეთი-ქობულეთის საავტომობილო გზის პროექტში.
მოსახლეობის თქმით, ზემონახსენები ტერიტორია მდებარეობის მიხედვით, პრესტიჟულია ნებისმიერი ბიზნესსაქმიანობისთვის და ქონდათ დიდი მოლოდინი, რომ ამ ნაკვეთებში სახელმწიფო სოლიდურ თანხას გადაუხდიდა, თუმცა, როგორც თავად ამბობენ, მოხდა პირიქით.
„სუფსის საზღვრებში განლაგებული მიწის ნაკვეთები (ე. წ. “ნაოჩვანი”), რომლებიც წარმოადგენს 32 ოჯახის კერძო საკუთრებას, მდებარეობს პრესტიჟულ ადგილზე, დანიშნულებით _ სასოფლო-სამეურნეო, მოხვდა ავტობანის მშენებლობის პროექტში. ამ შემთხვევაში მიწის მესაკუთრეებთან მთავრობის, არასამთავრობო ორგანიზაციების და არც გზის დეპარტამენტის მხრიდან არანაირ შეხვედრას, შემოთავაზებას და კონსულტაციას ადგილი არ ჰქონია.
დეპარტამენტის წარმომადგენლები გვაძალებდნენ ხელშეკრულებაზე ხელის მოწერას და ჩვენი საკუთრების დათმობას ასეთ მიზერულ ფასად და მოსახლეობაში ავრცელებდნენ ხმებს, რომ წინააღმდეგ შემთხვევაში მესაკუთრეს სახელმწიფო ჩამოართმევდა საკუთრებას _ პროექტის განხორციელების ხელის შეშლასთან დაკავშირებით.
ჩვენ გვქონდა სიტყვიერი ინფორმაცია, რომ იმ მონაკვეთში, ე.წ. “ლოტში”, რომელიც, დაახლოებით, 10-კილომეტრიან ზოლს მოიცავს, ჩვენი ნაკვეთების შემდეგ განლაგებულ ნაკვეთებში (რომელიც შედის, ლანჩხუთის და ოზურგეთის მუნიციპალიტეტის საზღვრებში), მესაკუთრეებს გადაუხადეს გაცილებით სოლიდური თანხები 1კვ. მეტრში. ზოგან 25-60 ლარი ერთ კვ, მეტრში, ზოგან კი 40-დან 120 ლარამდე,მ ჩვენთვის კი 5 ლარი და 80 თეთრი გამოიმეტეს“, _ ამბობს მიღებული კომპენსაციით უკმაყოფილო მოსახლეობა და ხელისუფლებას საკითხით დაინტერესებას სთხოვს, წინააღმდეგ შემთხვევაში ადგილობრივები პერნამენტური აქციების გამართვით იმუქრებიან.
