15 ივნისს, ოზურგეთის მუნიციპალიტეტის საკრებულოს სხდომაზე, ყბადაღებულ თემაზე, კარიერებზე ინერტული მასალის უკანონო მოპოვებასთან დაკავშირებით, ნაციონალმა ბესო ქათამაძემ სიტყვა ითხოვა:
_უნდა ვთქვა, ქვა-ღორღის მოპოვებასთან დაკავშირებით რა ვანდალიზმი და საზიზღრობა ხდება ჩვენს მუნიციპალიტეტში. პრაქტიკულად მდინარე არ რსებობს, რომელიც აოხრებული არ იყოს. ბახვისწყალი, ნატანები, სუფსა… ამ ადამიანებმა ჩაიდინეს დანაშაული მუნიციპალიტეტში. მე როცა ვსაუბრობდი, რომ სილაურში, სუფსაზე ახორცილებდა კომპანია მოპოვებას და არანაირი ლიცენზია არ გააჩნდა, მათ ულიცენზიოდ გაზიდეს და მოიპარეს მილიონობით ლარი. ჩვენ ევროპისკენ გვინდა და ევროპაში ყოფნა გვინდა. ეს იმას ნიშნავს, პირველ რიგში, გარემოს, ბუნებას გავუფრთხილდეთ. აოხრებულია მდინარეების კალაპოტები, წყლის ნაკლებობა უკვე იგრძნობა, _ ხმამაღლა, გაბრაზებული საუბრობდა ქათამაძე.
მან კვლავ გააგრძელა: „რაც ხდება გურიანთაში, ქვა-ღორღის მოპოვების გამო, ეს ვანდალიზმია. პირდაპირ სხდომაზე მოვიდა ხალხი და გვითხრეს, რომ საფრთხე ექმნება ჭაბურღილებს. ლაითურის წყალის პროექტი 5 მლნ დაჯდა. გეოლოგები გვეუბნებიან, რომ აქ საფრთხე შეიქმნება. მაინტერესებს, ეს ხალხი ვინ არის, ვინ მფარველობს, ასე ველურად რომ ექცევიან გარემოს. მილიონობით ლარს რომ იდებენ ჯიბეში, პასუხს ვინ თხოვს? რას ჰგავს ჩვენი წყალი და მდინარეები?“
„ქართული ოცნების“ წევრმა ქეთევან ხომერიკმა ქათამაძეს რეპლიკა ესროლა, ეს ამბავი კოტე შარაშენიძეს მოჰკითხეო.
_რა შუაშია კოტე? პრობლემაზე ვსაუბრობ და კოტეო…, ახლა მერი კოტეა? ლაითურს , ნასაკირალს წყალი არ ექნება_თქო და კოტეო… რა კოტე? ვინ მფარველობს მაგ ხალხს? ათობით ტენდერი აქვთ მოგებული კომპანიებს და ქვა-ღორღს ადგილზე იპარავენ. არ იცით ეს? მივმართავთ პროკურატურას და მე მინდა პასუხისმგებლობა აიღოს მუნიციპალიტეტმა. 112-ს, გარემოს დაცვის სამსახურს როცა ვურეკავთ, პასუხს არავინ არ გვცემს, _ არ ცხრებოდა ქათამაძე.
_მე როგორც ინფორმაცია მაქვს, სხვა ლოკაციებზე არ მიმდინარეობს მასალის მოპოვება. გურიანთაში ხდება ეს, ავტობანი უნდა აშენდეს. ლიცენზია აქვს მაგ კომპანიას. თანხმობა კი 2021 წელს აქვს მიღებული მუნიციპალიტეტის მერიისგან და ამაზე მე ნუ მომთხოვთ პასუხს. თუ გაქვთ ინფორმაცია., შეგიძლიათ დარეკოთ მუნიციპალურ ინსპექციაში და შესაბამისი შეტყობინება გააკეთოთ, ერთად ვაკონტროლოთ, ჩვენი ინტერესიც არის, გარემოს დაცვა, კანონის შესაბამისად ვიმოქმედოთ, _ უპასუხა ქათამაძეს მუნიციპალიტეტის მერის პირველმა მოადგილემ გიორგი ღურჯუმელიძემ.
აქვე შევნიშნავთ, რომ კარგი იქნება თუ საკრებულოს წევრი პოზიცია-ოპოზიციის წარმომადგენლები კარგად გაიხსენებენ, ვინ შეუშვა ულიცენზიოდ გურიანთის კარიერზე თურქული კომპანია. ეს მოხდა პირდაპირ პრემიერის, ირაკლი ღარიბაშვილის ინიციატივით, რომ ავტობანის მშენებლობა არ შეფერხებულიყო.
ამის თაობაზე „გურია ნიუსი“ არაერთხელ იმყოფებოდა აღნიშნულ სოფელში. სტატიებიც არაერთხელ გამოქვეყნდა. ამიტომაც არც ყოფილი მერია აქ შუაში და არც მოქმედი!
ამავე თემაზე:
ნაკალაპოტარი მდინარე ნატანები და „მწყემსის კარავი“ : რა ხდება გურიის მდინარეების კარიერებზე
ავტორი
