“ტრიბუნას” ლიდერი დავით ჭიჭინაძე განცხადებას ავრცელებს, სადაც ამბობს, რომ ოპოზიციას საზოგადოებისთვის ბოდიში აქვს მოსახდელი. ბოდიშის მოხდის შემდეგ კი ვინც ბრძოლას აპირებს “ქართული ოცნების” წინააღმდეგ პარლამენტი და საკრებულო უნდა დატოვოს.
“ის, ვინც დღეს პარლამენტში დარჩება, ისინი, ვინც საკრებულოებში შევა, ყველა “ქართულ ოცნებას” გაუგრძელებს ქართველი ხალხის, ამ ქვეყნის ძარცვის საშუალებას 2024 წლამდე!
ამ ქვეყნის დაცლას შეუწყობენ ხელს.
მუხტიც ვერასოდეს აგორდება, თუ ფლიდობ და სიმართლეს არ ლაპარაკობ,
ხალხს ერთს ეუბნები და კაბინეტებში, კულუარებში მეორეზე რიგდები.
ამიტომ, ოპოზიციამ ჯერ ბოდიში უნდა მოუხადოს საზოგადოებას, შარშანდელი აქციები ასე რომ მინელდა და მთავარი მიზანი „ოცნებასთან“ შეთანხმებებით და გარიგებებით დაასრულეს.
შემდეგ, ვინც რეალურ ბრძოლას აპირებს, ყველა უნდა გამოვიდეს პარლამენტიდან და საკრებულოებიდან.
არავის უნდა მივცეთ საშუალება ტკბილად და თბილად გამოიზამთრონ კაბინეტებში!
იმიტომ, რომ არც ეს პარლამენტია ლეგიტიმური და არც 30 ოქტომბრის არჩევნების აღიარება შეიძლება.
ბრძოლა კი დაუღალავი უნდა იყოს, ბოლომდე და მხოლოდ ხალხთან ერთად, ყველანაირი მედიატორების გარეშე!
და არა მხოლოდ რუსთაველზე, პროტესტი მთელი ქვეყნის მასშტაბით უნდა გაიშალოს.
მოგებული ქალაქები რომ დავუბრუნოთ ხალხს და ოპოზიციას.
მითუმეტეს, რომ ამ ხელისუფლებასთან ცივილური მეთოდებით ბრძოლა წარმოუდგენელია.
და კიდე, ვის ვინ მოსწონს და არ მოსწონს, ამაზე საუბარი უნდა დასრულდეს.
ჯერ ერთი, ამ ქვეყანაში მოსაწონი აღარავინაა და მთავარი, ქვეყანაა გადასარჩენი, ხალხს სჭირდება გადარჩენა ისეთ უმძიმეს პერიოდში შევდივართ”,_ ამბობს ჭიჭინაძე.
