ტენდერი ბენეფიციარების კვებისთვის

ოზურგეთის მუნიციპალიტეტის მერიამ უკვე გამოაცხადა ტენდერი 180 ბენეფიციარის ყოველდღიური კვებითი (დღეში ერთხელ) მომსახურებისთვის.

წინადადებების მიღება 12 დეკემბრიდან დაიწყო და 22 დეკემბერს დასრულდა.

“1. ტექნიკური დავალება

1.1. შესყიდვის ობიექტს წარმოადგენს სოციალურად დაუცველი მოსახლეობის კვებით მომსახურება.

1.2. ბენეფიციართა რაოდენობა: საორიენტაციოდ 180 ადამიანი, აღნიშნული რაოდენობა შესაძლებელია შეიცვალოს შემსყიდველის მოთხოვნის შესაბამისად, რის თაობაზეც მიმწოდებელს ეცნობება 2 (ორი) დღით ადრე მაინც.

1.3. მომსახურების ინტენსივობა და ვადა:

1.3.1. ყოველდღიური ერთჯერადი კვება დანართის სახით ატვირთული ფაილში მითითებული მენიუს, კერძების ჩამონათვალისა და შემადგენლობის (ნორმების მითითებით) შესაბამისად.

2. სანიტარულ-ჰიგიენური ნორმები

2.1. ბენეფიციართა გამოსაკვებად საჭირო პროდუქცია უნდა იყოს ახალი, გაუყინავი, არასასიამოვნო სუნის გარეშე;

2.2. კერძის მომზადებისას მკაცრად უნდა იყოს დაცული სანიტარულ-ჰიგიენური ნორმები;

2.3. საკვები პროდუქტები უნდა შეესაბამებოდეს “სასურსათო ნედლეულისა და კვების პროდუქტების ხარისხისა და უსაფრთხოების სანიტარიული წესებისა და ნორმების დამტკიცების შესახებ” საქართველოს შრომის, ჯანმრთელობისა და სოციალური დაცვის მინისტრის 2001 წლის 16 აგვისტოს #301/ნ ბრძანების მოთხოვნებს”, _ აღნიშნულია სახელმწიფო შესყიდვების სააგენტოს ვებგვერდზე ატვირთულ დოკუმენტაციაში.

ბორშჩი, კოტლეტი გარნირით (პიურე), წვნიანი _ ხორცის გუფთა, წიწიბურა სოსისით, ოსპის წვნიანი, მაკარონი ყველით, ფუნთუშამ პური, ქათმის ჩახოხბილი, ვერმიშელის ფაფა, წვნიანი ბრინჯით, ქათმის კატლეტი მაკარონით, ფლავი ბრინჯის, ქიშმიშითა და შაქრით, ვერმიშელის წვნიანი, შესუნელებული სტაფილო, ლობიო ხმელი, შილა ფლავი ხორცით, კარტოფილის სოუსი, კისელი, ხილის კომპოტი _ ეს არის ის მენიუ, რომლითაც გამარჯვებული კომპანია ბენეფიციარებს უნდა გაუმასპინძლდეს მთელი კვირის განმავლობაში.

შესყიდვის სავარაუდო ღირებულება 265 273 ათასი ლარია. ტენდერში მხოლოდ ერთმა მონაწილემ _ თამარ შარაშიძემ მიიღო მონაწილეობა. ის ოზურგეთის მუნიციპალიტეტის მერიის წარდგენილ პირობებს და მომსახურებას 229 932 ლარად შეასრულებს.

გაფორმდება თუ არა ხელშეკრულება ტენდერში მონაწილე მხოლოდ ერთ მონაწილესთან, ამას რამდენიმე დღეში გავიგებთ.