ლანჩხუთის მუნიციპალიტეტის მერიის წინადადების საფუძველზე, ლანჩხუთის საკრებულოში დეპუტატებს რიგგარეშედ მოუხდათ შეკრება და სხდომის გამართვა. სხდომას საკრებულოს თავმჯდომარე ბესიკ ტაბიძე უძღვებოდა.
სხდომის დღის წესრიგი კი ორი საკითხისგან შედგებოდა.
პირველი საკითხი, 2021 წლის ბიუჯეტის დამტკიცების შესახებ, ლანჩხუთის-საკრებულოს 2020 წლის 25 დეკემბრის დადგენილებაში ცვლილების შეტანას ეხებოდა და ის დეპუტატებს მერის მოადგილემ ბიძინა იმნაიშვილმა გააცნო.
მეორე საკითხის შესაბამისად კი, საკრებულოს წევრებმა განკარგულება დაამტკიცეს და “ევროპის მუნიციპალიტეტთა და რეგიონთა საბჭოს მიერ მიღებულ _ “ევროპული ქარტია ადგილობრივ ცხოვრებაში ქალთა და მამაკაცთა თანასწორობის შესახებ” შეთანხმების ხელმოწერაზე ლანჩხუთის მუნიციპალიტეტის მერიას თანხმობის მისცეს.
როგორც პირველი საკითხის მომხსენებელმა ბიძინა იმნაიშვილმა აღნიშნა, რეგიონებში გასახორციელებელი ფონდიდან ლანჩხუთის მუნიციპალიტეტს 2 719 106 ლარი გამოეყო, საიდანაც 48 315 ლარი ნიგვზიანის ადმინისტრაციულ ერთეულში შიდა სასოფლო გზების რეაბილიტაციას უნდა მოხმარდეს.
დარჩენილი თანხა, მერიის მხრიდან გაჟღერებული განმარტებების მიხედვით, მუნიციპალიტეტის რიგ ადმინისტრაციულ ერთეულებზე გადანაწილდება და ისიც შიდა გზების რეაბილიტაციისთვის გაიხარჯება.
სწორედ ბიუჯეტში შესაბამისი ცვლილების ასახვის მიზნით დაიწყო საკითხთან დაკავშირებით ადმინისტრაციული წარმოება. თუმცა, მანამ საკითხს დასტურს მისცემდნენ, დეპუტატებმა საკუთარი მოსაზრებებიც დააფიქსირეს.
უმრავლესობის წევრმა და “ოცნების” ფრაქციის თავმჯდომარის მოადგილემ ციცი ჩხაიძემ აქცენტი სანახევროდ რეაბილიტირებულ, განსაკუთრებით კი, ქალაქის ტერიტორიაზე,-გააკეთა და ინფრასტრუქტურის სამსახურისგან ამასთან დაკავშირებით განმარტებებიც მოითხოვა.
“ერთი რამ მაინტერესებს ამ გზებთან დაკავშირებით _ ქალაქში გადმოსასვლელი რომ არის, იქ სულ მოუწესრიგებელია; ჩიბათში მივდივარ _ გზა სოფელში შეწყვეტილია; გვიმბალაურში თუ აგარაკში ავდივარ _ გზა ბოლომდე მიყვანილი არაა; თამარ მეფის ქუჩაზე გავდივარ _ საშინელი მდგომარეობაა.
ერთხელ და სამუდამოდ, რა აფერხებს ამის დასრულებას, რა ხდება ან რატომ?! თანხა არყოფნის?! გათვალისწინებული არაა პროექტში, თუ რატომ ვაწყდებით ასეთ პრობლემას?!” _ აღნიშნა “ოცნების” ფრაქციის თავმჯდომარის მოადგილემ.
ციცი ჩხაიძე: “რატომ ვაწყდებით ამდენ პრობლემას?!”
კითხვები სხვა დეპუტატებსაც გაუჩინა წარმოდგენილმა საკითხმა. მათი არგუმენტით, ზემოთ ნახსენები დაფინანსება რამდენიმე ადმინისტრაციულ ერთეულს არ მოიცავს და მათთვის გაუგებარი რჩება, თუ რატომ.
“ლესა სად არის? გვიმბალაური სადაა? სხვა რამდენიმე ადმინისტრაციული ერთეული სადაა? თუ იქ არ არის შიდა გზების პრობლემები?!” _ იკითხა დეპუტატმა ამირან გიგინეიშვილმა.
პასუხად კი საკითხის მომხსენებლისგან მიიღო, რომ ზემოთ ნახსენები თანხა იქ გამოიყო, სადაც უკვე მზა პროექტები არსებობდა.
ლესის მაჟორიტარის, ელისო ჭიჭინაძისთვის პრიორიტეტების შერჩევამ ბუნდოვანება შექმნა: “საინტერესოა, როგორ შეირჩა პრიორიტეტები?! სულ გზას ვიძახით და ვინ უნდა გაამზადოს ეს პროექტები?! ჩვენ თავად თუ, რა ხდება, ვერ გავიგე! ხომ ამბობენ, რომ ეს წინასწარ გამზადებული პროექტებიაო, გვაჩვენონ, ინფრასტრუქტურის სამსახურში, ვის რამდენი განცხადება აქვს შენატანი გზების თაობაზე. თუ არ ვცდები, სულ 16 ადმინისტრაციული ერთეულია და აქ 11-ია ასახული, ანუ 11 უკიდურესად მძიმე მდგომარეობაში მყოფი და ის დანარჩენი ხუთი უკეთეს მდგომარეობაშია?!”
საფინანსო კომისიის ხელმძღვანელმა ალექსანდრე მახათაძემ მერიის ინფრასტრუქტურული სამსახურისგან სრული ჩამონათვალი მოითხოვა, თუ რომელ ადმინისტრაციულ ერთეულში რა თანხა გაიხარჯა რეგფონდიდან 2017 წლიდან მოყოლებული დღემდე:
“საკრებულოს მომავალი სხდომისთვის, როცა ბიუჯეტში ცვლილება უნდა დავამტკიცოთ, მერიის ინფრასტრუქტურის სამსახურმა წარმოგვიდგინოს 2017 წლიდან დღემდე ადმინისტრაციული ერთეულების მიხედვით რეგიონული განვითარების ფონდიდან რა თანხებია გახარჯული. გზა იქნება, პარკი იქნება თუ რაც იქნება”, _ საკუთარი მოთხოვნა დააყენა საფინანსო კომისიის თავმჯდომარემ.-
დეპუტატთა მხრიდან გაჟღერებული პრეტენზიების საპასუხოდ განმარტებების გაკეთება მერიის ინფრასტრუქტურის სამსახურის პირველ პირს ლევან ჩხაიძეს მოუხდა. მისი თქმით, ლესაში გზა წინსწრებით დაიგო და ამიტომაც ვერ მოხვდა ის ახლანდელ ჩამონათვალში:
“ლესაში წელს გასაკეთებელი გზა, შარშან, წინსწრებით დაიგო. 2020 წელს ლესაში 250 ათასი ლარი დაიხარჯა. იგივე მოხდა გვიმბალაურში. აქედან გამომდინარე, თანხები იმდენი არაა, რომ ყველა ადმინისტრაციულ ერთეულს ეყოს, ამიტომ გავათანაბრეთ.
ღრმაღელეში რეგფონდიდან უკვე მიმდინარეობს გზის დაგება. მაჩხვარეთში კი, მომზადებულია საპროექტო დოკუმენტაცია და გამოცხადდება ტენდერი”, _ განმარტა ჩხაიძემ.
რაც შეეხება სანახევროდ გაკეთებულ ქუჩებს, ლევან ჩხაიძის თქმით, ინფრასტრუქტურული პროექტების გახორციელებისას პრიორიტეტი ისეთ ქუჩებს ენიჭება, სადაც ინტენსიური მოძრაობაა.
ინფრასტრუქტურის სამსახურის უფროსის მიერ გაკეთებულმა განმარტებებმა ლესის მაჟორიტარის უკმაყოფილება კიდევ უფრო გაზარდა:
“სულ საუბარია, რომ ლესაში კეთდება სკოლა, გაკეთდა საბავშვო ბაღი, გაზი, მაგრამ მე ვკითხულობ _ ამ ფონდის თანხებიდან რა გაკეთდა ჩემს სოფელში?! რატომ მიდებთ საპირწონედ სკოლას და ასე შემდეგ… არ უნდა გაკეთებულიყო?! რაც არ გაკეთდა, ის რატომ არ გახსოვთ და არასწორად რომ შეირჩა პრიორიტეტები?! საექიმო უბანი არაა სოფელში და ადამიანები ოჯახში აკითხავენ ექიმს…
არასწორად იყო შერჩეული პრიორიტეტები და ახლაც არასწორადაა. მე ამ საკითხს მხარს დავუჭერ სხვა სოფლების განვითარებისთვის, მაგრამ არასწორად გაქვთ პრიორიტეტები!” _ დასძინა ელისო ჭიჭინაძემ.
ცხარე დებატების შემდეგ ჯერი საკითხის კენჭისყრაზეც მიდგა და ბიუჯეტში ცვლილების გახორციელების თაობაზე ადმინისტრაციული წარმოების დაწყებას, მიუხედავად აზრთა სხვადასხვაობისა, სხდომაზე მყოფებმა ერთსულოვნად დაუჭირეს მხარი.
ავტორი: სოფო წილოსანი
