დღეს, ოზურგეთში, ერთი კილოგრამი ნედლი, ახალი თხილის ფასი სამი ლარი და ათი თეთრია.
როგორც გავარკვიეთ, მოსახლეობის დიდი ნაწილი ჩქარობს, როგორმე მოახერხოს, გაარჩიოს ჯერ კიდევ ვეგეტაციის პროცესში მყოფი თხილის ნაყოფი და მოასწროს აღნიშნულ ფასად ჩაბარება.
_ ამ ჭყაპ თხილს, რაცხა, ძაან ეტანებიან. არავინ გეკითხება, რანაირია. მთავარია მიიტანო კარგად გარჩეული, მაშინვე იბარებენ. მტეხლაობა აგვისტოს შუა რიცხვებს მერე იწყება და მანამდე თუ ასე გაგრძელდა, კი უნდა ჩააბარო ყველა. ახლა სამ ლარად ჩაბარებული, ხუთი ლარის ტოლფასია, _ თქვეს „გურია ნიუსთან“ თხილის ჩასაბარებლად სოფლებიდან ჩამოსულმა ქალბატონებმა.
_ წელს თხილს, რომ იტყვიან, უაზროდ ასხია. მოსახლეობის დიდ ნაწილს პლანტაციები არ შეუწამლავს. ამიტომ თხილის ნაყოფი დიდხანს თავს ვერ შეინახავს. გასული წლების გამოცდილებამ ხალხს აჩვენა, რომ ვინც სრულფასოვნად შეწამლა, საუკეთესო შედეგი მიიღო. ამიტომ უფრო ისინი ცდილობენ, ახლავე „გაიცალონ ხელი“, ვისაც უფრო უჭირს და თხილის შეწამვლაც სწორედ ამიტომ ვერ მოახერხა.
თხილის ფასი მარტო იმიტომ არ იწევს დაბლა, რომ ვიღაცას გატეხვა და შიგ ჩახედვა მოესურვა. უნდა ნახოთ, აგვისტოს ბოლოსკენ განსაკუთრებით, ხალხს რანაირი თხილი მოაქვს. შარშანდელი და შარშანწინდელი მონაფოცხი ნაგავი. სანამ წესიერი პროდუქციის მოტანას არ მიეჩვევა ყველა, მანამ იქნება გატეხვა და გულის შემოწმება. ახლა მხოლოდ ხეზე კრეფენ და ნედლი კი არის ნაყოფი, მაგრამ თქვენ წარმოიდგინეთ, უფრო საიმედოა, _ გვეუბნებიან თხილის მიმღებ პუნქტებში.
აქვე ისიც გვითხრეს, რომ მომდევნო დღეებში, ადვილი შესაძლებელია, თხილის ფასმა კიდევ მოიმატოს.
ავტორი: მარინა ჩიხლაძე
