გუშინ გამოცემამ „Basketnews“ საინტერესო ინფორმაცია გაავრცელა. აღმოჩნდა რომ საქართველოს ეროვნული გუნდისა და იტალიური „ვირტუსის“ მოთამაშე თორნიკე შენგელია კარიერის აშშ-ში გაგრძელებას გეგმავს და NBA-ის რომელიმე გუნდში ჩარიცხვას იმედოვნებს.
„ბოლო თვეებია ბევრი იწერება იმის შესახებ, რომ შენგელია კონტრაქტს გააგრძელებს „ვირტუს ბოლონიასთან“ ან „ბარსელონას“ შეუერთდება, თუმცა, ჩვენი წყაროს ინფორმაციით, საქმე სხვაგვარადაა. ახლა, ქართველს ყველა ევროპულ კლუბთან მოლაპარაკება შეჩერებული აქვს, რადგანაც მისი მთავარი მიზანი NBA-ში დაბრუნებაა“, – დაიწერა ვებ-გვერდზე.
შენგელია 2012 წლის NBA-ს დრაფტზე 54-ე ნომრად აირჩიეს და „ბრუკლინისა“ და „ჩიკაგოს“ მაისურით ჩატარებულ 45 მატჩში საშუალოდ 5.5 წუთში 1.3 ქულასა და 0.9 მოხსნას აგროვებდა.
იტალიის პირველობის ფლეი ოფის პირველი წრის მატჩში თორნიკე შენგელიამ ტრავმა მიიღო – ბოლონიურმა კლუბმა „პეზარო“ 82:76 დაამარცხა და მეოთხედფინალურ სერიაში დაწინაურდა.
იტალიური მედიის ინფორმაცია დამაიმედებელი არ არის: – „დიდი ალბათობით, კოჭის ტრავმა სერიოზულია. ის „პეზაროსთან“ სერიას ნამდვილად გამოტოვებს და არა მარტო“. „ვირტუსის“ ექიმები ამ დღეებში უფრო კონკრეტულად განსაზღვრავენ, რამდენად სერიოზულია თორნიკეს ტრავმა.
ქართველი ჩოგბურთელი, ეკო გორგოძე „როლან გაროსის“ საკვალიფიკაციო ეტაპზე ჩაერთო და მეორე რაუნდის საგზური მოიპოვა. ქართველმა პირველი შეხვედრა ფრანგი ლუ ბოისონის წინააღმდეგ გამართა, გამოკვეთილი ფავორიტი გახლდათ და ორ სეტში იმარჯვა.
„როლან გაროსის“ ძირითად ბადეში მოხვედრის შანსი მარიამ ბოლქვაძესაც ჰქონდა, თუმცა ქართველმა ჩოგბურთელმა სეონე მენდესის წინააღმდეგობა ვერ გადალახა და სამ სეტში 6:3, 4:6, 2:6 დამარცხდა.
ესპანური გამოცემა „Mundo Deportivo“-ს მტკიცებით, „ბარსელონას“ რობერტ ლევანდოვსკის გადაბირება სერიოზულად სურს. კატალონიური გუნდი „ბაიერნისგან“ მოლაპარაკების დაწყებაზე თანხმობის მიღებას ელის და ეს უახლოეს დღეებში უნდა მოხდეს. „ბარსელონას“ პოლონელის ტრანსფერისთვის 30 მილიონი ევრო აქვს გამოყოფილი და თუ „ბაიერნი“ ვერ დაიყოლია, გამოსასყიდი თანხის 5 მილიონით გაზრდაც შეუძლია.
ესპანური გამოცემის ცნობით, კატალონიელები მზად არიან, ტრანსფერში მემფის დეპაიც ჩართონ და „ბაიერნს“ ნიდერლანდელი ფეხბურთელისა და ლევანდოვსკის გაცვლა შესთავაზონ.
ტურინის „იუვენტუსმა“ კი პაულო დიბალას შემცვლელი იპოვა, რომელსაც მიმდინარე წლის ზაფხულში კონტრაქტი უსრულდება. გამოცემა „Goal“-ის მტკიცებით, „იუვენტუსმა“ არგენტინელ ანხელ დი მარიასთან შეთანხმებას უკვე მიაღწია. დი მარია კლუბთან კონტრაქტს 1+1 სისტემით გააფორმებს და მომდევნო უქმეებზე, საფრანგეთის პირველობის ბოლო ტურში, „პარი სენ-ჟერმენის“ მაისურს უკანასკნელად მოირგებს.
დი მარიას სტაბილური სათამაშო დრო სურს, რათა მსოფლიო ჩემპიონატს ფორმაში შეხვდეს. „პარი სენ-ჟერმენში“ ეს გაუჭირდება და ცვლილებები გადაწყვიტა, რაც იტალიურ გუნდთან შეთანხმებაში გამოიხატა.
„პარი სენ-ჟერმენის“ არგენტინელი თავდამსხმელი ლეო მესისთვის მომავალი სეზონი ევროპაში ალბათ ბოლო აღმოჩნდება, – მესი 2023 წლის ზაფხულში აშშ-ის საფეხბურთო ლიგაში გადასვლას აპირებს.
როგორც ირკვევა, 34 წლის თავდამსხმელი თავის მომავალს „ინტერ მაიამის“ დაუკავშირებს და მას არამხოლოდ მოედანზე გააძლიერებს. იგი კლუბის აქციონერობას აპირებს და მისი 35%-ის მფლობელი გახდება.
მესი შეუერთდება იმ ბიზნესპროექტს, რომელიც ინგლისის ნაკრებისა და „მანჩესტერ იუნაიტედის“ ყოფილ ფეხბურთელს დევიდ ბექჰემს ეკუთვნის.
აშშ-ში გადაბარგებამდე კი მესი „პარი სენ-ჟერმენთან“ გაფორმებულ კონტრაქტს არ დაარღვევს, რომელსაც ვადა 2023 წლის ზაფხულში გასდის.
ავტორი
