“თქვენ შორის არიან ადამიანები, რომლებიც „თვალს ხუჭავენ“ უკრაინის ტანჯვაზე” – ზელენსკი

CNN-ის ინფორმაციით, უკრაინის პრეზიდენტმა ვოლოდიმირ ზელენსკიმ  არაბ ლიდერებს უთხრა, რომ „აქ თქვენ შორის არიან ადამიანები, რომლებიც „თვალს ხუჭავენ“ უკრაინის ტანჯვაზე და მოუწოდა  მათ „პატიოსნად შეხედონ“ ვითარებას.

როგორც ამერიკული ტელეკომპანია იუწყება, სირიის პრეზიდენტი ბაშარ ალ-ასადი პირველად დაესწრო არაბთა ლიგის სამიტს ბოლო ათწლეულის განმავლობაში და ზელენსკის გამოსვლამდე რამდენიმე წუთით ადრე საკონფერენციო დარბაზში კამერით ნახეს. სირია იყო მხოლოდ ერთ-ერთი იმ ორ ქვეყანას შორის მსოფლიოში (ჩრდილოეთ კორეასთან ერთად), რომელმაც აღიარა რუსეთის მიერ შარშან უკრაინის ოთხი რეგიონის ანექსია.

ინგლისურად საუბრისას ზელენსკიმ თავის კოლეგებს უთხრა: „ნახეთ, რამდენი ტანჯვა მოუტანა ხანგრძლივმა ომებმა ლიბიას, სირიას, იემენს, რამდენი სიცოცხლე შეიწირა სუდანსა და სომალის წლების ბრძოლებმა, ერაყსა და ავღანეთში.

იმედი მაქვს, რომ  უმეტესობა აქ ვართ მშვიდობისა და სამართლიანობისთვის.

მაშინაც კი, თუ აქ სამიტზე არიან ადამიანები, რომლებსაც განსხვავებული შეხედულებები აქვთ ომზე, ჩვენს მიწაზე და ამას კონფლიქტს უწოდებენ, დარწმუნებული ვარ, რომ ჩვენ, ყველას, შეგვიძლია გავერთიანდეთ ხალხის რუსული ციხეების გალიებიდან გადასარჩენად. სამწუხაროდ, მსოფლიოში და აქ თქვენ შორის, არიან ისინი, ვინც თვალს ხუჭავს იმ გალიებსა და უკანონო ანექსიებზე.

და მე აქ ვარ, რათა ყველამ შეძლოს გულწრფელად შეხედოს, რაც არ უნდა ეცადონ რუსები გავლენის მოხდენას. დამოუკიდებლობა მაინც უნდა იყოს. მე მინდა მადლობა გადავუხადო საუდის არაბეთს, მინდა მადლობა გადავუხადო თქვენს უმრავლესობას საერთაშორისო პოზიციებისა და გაეროს წესდების მხარდაჭერისთვის”,_ განაცხადა ზელენსკიმ.

„ასევე დარწმუნებული ვარ, რომ ყველა თქვენი ერი გაიგებს მთავარ მოწოდებას, რომლის დატოვებაც მინდა აქ, ჯედაში, კეთილშობილური მოწოდება ყველას მიმართ, რათა დავეხმაროთ ჩვენი ხალხის, მათ შორის უკრაინელი მუსლიმური თემის დაცვას“, – თქვა მან. ”ჩემთან ერთად არის მუსტაფა ჯემილევი, ყირიმელი თათრების ლიდერი, უკრაინის ერთ-ერთი ძირძველი ხალხის, რომლის სახლია ყირიმი, უკრაინის მუსულმანური კულტურის ცენტრი.

საუკუნეების მანძილზე ყირიმელი თათარი იყო და უნდა დარჩეს მსოფლიოს მუსლიმური საზოგადოების განუყოფელი და ძლიერ  ნაწილად“, – დასძინა ზელენსკიმ, „მაგრამ ყირიმი პირველი იყო, რომელიც დაზარალდა რუსული ოკუპაციისგან.  ამ დრომდე, უმეტესობა, ვინც ოკუპირებულ ყირიმში რეპრესიებს ექვემდებარება, მუსლიმები არიან“.