“თქვენი ხელისუფლების დროს “უპრაგონოდ” გაყიდული მიწების გამოა ურეკში პრობლემები!”

5 ივლისს, ოზურგეთის მუნიციპალიტეტის საკრებულოს მორიგი სხდომა გაიმართა. “ერთიანი ნაციონალური მოძრაობის” დეპუტატებმა, როგორც კი, საკრებულოს თავმჯდომარემ, დავით დარჩიამ სხდომის დღის წესრიგი წაიკითხა, სასწრაფოდ დაიწყეს პრობლემებზე საუბარი. ამჯერად, ტურისტულ სეზონთან დაკავშირებით, ურეკში არსებულ მდგომარეობაზე, საკრებულოს წევრმა, თათია ნიკოლაშვილმა, ტრადიციულად, ფოტოები წარმოადგინა.

_ ურეკში, საკურორტო სეზონია და ხალხს გზა არ აქვს. ურეკის რეალობა ეს კადრებია! ტურისტებს ვერ იღებენ! დატბორილია ყველაფერი. არ აქვთ გარე განათება! სანიაღვრე არხები ავსებულია და იტბორება ყველაფერი. ზაფხულია ამ ხალხისთვის შემოსავლის წყარო. როდის ექნება ამ ადამიანებს ნორმალური ყოფა?! _ არ ცხრებოდა თათია ნიკოლაშვილი.

ნიკოლაშვილის “შეტევას” მოჰყვა ტრადიციული დაპირისპირება _ “ქართული ოცნების” დეპუტატებს სასაცილოდ არ ეყოთ ნიკოლაშვილის განცხადება და ტაში დაუკრეს.

_ მე მოგიწოდებთ, პრობლემების მოგვარებისკენ. დაბა ურეკში საშინელი მდგომარეობაა. შეხედეთ ამ ფოტოებს. რამდენჯერ გავიმეორო?

არ არის სანიაღვრე არხები და ამის გამო იტბორება ყველაფერი. ირგვლივ ანტისანიტარიაა. ამაზე ბევრი ადამიანი საუბრობს, მიბრძანდით და მოუსმინეთ. სხვათა შორის, ისინი არ არიან “ნაციონალური მოძრაობის” მომხრეები _ თქვენი ამომრჩევლები არიან, _ აგრძელებდა ყვირილს და ფოტოების ფრიალს ნიკოლაშვილი.

_ როცა ტურისტულ სეზონზე საუბრობთ, მაცალეთ საუბარი! გამოვალ ახლა და გეტყვით! როდის დაიკეტა სანიაღვრე არხები? 2008 წელს, როცა თქვენმა ხელისუფლებამ კერძო საკუთრებაში მოაქცია ყველაფერი. გეყოფათ! ულტიმატუმებით ნუ საუბრობთ! გამოვალ და მიიღებთ არგუმენტირებულ პასუხს! ცუდია, რომ ვერ ხედავთ ურეკში გახორციელებულ ინფრასტრუქტურულ პროექტებს. გიმეორებთ, ეს პრობლემები წინა ხელისუფლების დროს, 2008 წლამდე წარმოიქმნა დაბა ურეკში, კერძო ნაკვეთების არასწორი განაწილების დროს დაიკეტა სანიაღვრე არხები, _ უპასუხა ნიკოლაშვილს ოზურგეთის მუნიციპალიტეტის მერის პირველმა მოადგილემ გიორგი ღურჯუმელიძემ.

_12 წელი რას აკეთებდით? მილიონები დაიხარჯა და არაფერია გაკეთებული. არ მაინტერესებს _ ამ ხალხს გაეცით პასუხი, _ აცხადებდა ნიკოლაშვილი.

_ რომ არ გაინტერესებთ და ისე ყვირით, ვიცი. ეს არის იაფფასიანი შოუ. რასაც ჩაგძახებენ, იმას ამოიძახებთ. თქვენი ხელისუფლების დროს “უპრაგონოდ” გაყიდული მიწების გამოა ურეკში ეს პრობლემები! ესაა სიმართლე. გყავთ თქვენი ტელევიზიები მოყვანილი და დგამთ შოუებს. რატომ არ გაინტერესებთ, როგორ ვასუფთავებთ ურეკის სანაპირო პლაჟს? ნულპროცენტიანი პოლიტიკოსის საუბარი არავის აინტერესებს. კლოუნები ცალკე დასხედით. თქვენი შოუების დადგმამ ყოველგვარ ზომას გადააჭარბა. საზოგადოება ხედავს ამას და ხალხი გაგცემთ პასუხს, ჩვენგან კი ამ პროვოკაციებზე აწი პასუხს ვერ მიიღებთ! _ კვლავ გაუმეორა ღურჯუმელიძემ ნიკოლაშვილს და ურჩია, რომ შეეძლო წასულიყო, დასუფთავებულ პლაჟზე გარუჯულიყო და ცოტა სიმშვიდე შეენარჩუნებინა.

ნიკოლაშვილი არ გაჩერდა და ყოფილი პრეზიდენტი, სააკაშვილი ახსენა _ ის რომ ყოფილიყო, “ვალინკებით” ჩადგებოდა არხშიო. ამის საპასუხოდ, “ქართული ოცნების” დეპუტატებმა შეახსენეს, ვინ იყო მათი ლიდერი.

ეს იუკადრისა “ნაციონალმა” დეპუტატმა, გოჩა შარაშენიძემ:

_ თქვე მამაცხონებულებო, ჯერ იყო და გახარიას მამას ეძახდით და ახლა დედის სულს აგინებთ, მერე სალომეა ჩვენი დედოფალიო და ახლა კეტით დასდევთ! კიდევ ჩვენ ვერ გაგვირკვევია, ვინაა ჩვენი ლიდერი?! ჩვენ ოპოზიცია ვართ და იმაზე უნდა დავსვათ კითხვა, რაც არ გაკეთებულა. ჩვენს ქცევაზე რომ აკეთებთ აქცენტს, როგორ იქცევიან თქვენი პარლამენტარები, თქვენც ისევე იქცევით აქ. დასვა დეპუტატმა კითხვა და გაეცით პასუხი, _ ხმამაღლა მიმართა საკრებულოს შარაშენიძემ.

_ რა გაყვირებს?! ყურს არ გვაკლია და დაუწიე ხმას! _ შეეპასუხა მას “ქართული ოცნების” დეპუტატი ტარიელ აროშიძე.

_ რა გინდა, გოჩა, შენ? თათია ნიკოლაშვილია ის ადამიანი პირადად, ვინც ბიუჯეტის დამტკიცებას ბოიკოტი გამოუცხადა. სპორტის და ლიფტების დაფინანსებაზე წინააღმდეგი წავიდა, არაა საჭიროო. რა უნდა გელაპარაკოთ თქვენ? წადით და თქვენს ტელევიზიებს ესაუბრეთ! ისე კი, ჯერ ის გაარკვიეთ, ვინაა თქვენი თავმჯდომარე და მერე ილაპარაკეთ. ესეც კი ვერ გაგირკვევიათ, _ გასცა პასუხი შარაშენიძეს ღურჯუმელიძემ.

დღის წესრიგით გათვალისწინებულ პირველ საკითხზე, გიორგი ღურჯუმელიძემ ისაუბრა.

_ ოზურგეთის მუნიციპალიტეტის საკუთრებაში არსებული, რუსთაველის ქუჩაზე მდებარე უძრავი ქონების, 9351 კვ.მ. არასასოფლო-სამეურნეო მიწის ნაკვეთი, შპს “ოზურგეთის სატრანსპორტო კომპანიას” გადაეცეს უფასოდ, უზურფრუქტის ფორმით, უკვე ნაყიდი ავტობუსების ავტოფარეხის მოსაწყობად, _ განაცხადა ღურჯუმელიძემ.

საკითხს პოზიციიდან ყველამ და ოპოზიციის ნაწილმა კენჭი დადებითად უყარა.

საკრებულოს გადაწყვეტილებით, ცვლილება შევიდა 2023 წლის ბიუჯეტით გათვალისწინებული ჯანმრთელობის დაცვის და სოციალური დახმარების გაცემის და მიღების წესის დამტკიცების შესახებ დადგენილების პროექტშიც.

აღნიშნულ საკითხზე მოკლედ ისაუბრა და დააკონკრეტა ცვლილების არსი, შესაბამისი სამსახურის განყოფილების უფროსმა მაიზერ ცელაძემ. კერძოდ, აუტისტური სპექტრის აშლილობის პროგრამის მიხედვით, მუნიციპალიტეტში მცხოვრები ორიდან ჩვიდმეტ წლამდე ასაკის ბენეფიციარებს დაუწესდებათ ყველა გაუმჯობესებული რესურსით სარგებლობის უფლება. უბრალოდ, სიტყვა “მცხოვრები” იქნება ამოღებული პროგრამიდან და ვინც კი რეგისტრირებულია ოზურგეთში და ამ დროისთვის არ ცხოვრობს აქ, მაინც ისარგებლებს აღნიშნული პროგრამით.

გახარიას პარტიის წარმომადგენლები დაინტერესდნენ, ეს ჯანდაცვის პროგრამით ხდება თუ მუნიციპალიტეტის ბიუჯეტიდან იქნება დაფინანსებული.

_ 40 ბენეფიციარზეა ეს გათვალისწინებული და მხოლოდ მუნიციპალური პროგრამით ხდება, ოზურგეთის მუნიციპალიტეტის მერია აფინანსებს, _ უპასუხა მაიზერ ცელაძემ და კიდევ განმარტა, რომ ეს პატარა ცვლილება შევიდა 2023 წლის ბიუჯეტით გათვალისწინებული ჯანმრთელობის დაცვის და სოციალური დახმარების გაცემის და მიღების წესის დამტკიცების შესახებ, დადგენილების პროექტში.

ამავე სხდომაზე, საკრებულოს თავმჯდომარის პირველმა მოადგილემ, ლავრენტი ბიგვავამ, საკრებულოს რეგლამენტში ცვლილება შეიტანა და გადაწყდა, რომ ამიერიდან ოზურგეთის მუნიციპალიტეტის საკრებულოს სხდომები ყოველი თვის ბოლო ოთხშაბათს გაიმართება.

სხდომის დასასრულს, განცხადება გააკეთა “ნაციონალმა” დეპუტატმა თორნიკე გოგუაძემ.

მან ძიმითი-ნასაკირალის გზაზე უპატრონოდ მიტოვებულ ძაღლებზე ისაუბრა.

_ გუშინ 25-მდე მიტოვებული ძაღლი დავთვალე ძიმითის გზაზე. ისინი არ არიან “დაჩიპულები” და შესაბამისად, არც სტერილიზაცია აქვთ ჩატარებული. ეს კი ქმნის იმის საშიშროებას, რომ ისინი გამრავლდნენ და მათმა რაოდენობამ მოიმატოს. მუნიციპალიტეტის ბიუჯეტს ამ კუთხით კი, თანხები აქვს გამოყოფილი, _ განაცხადა გოგუაძემ

გოგუაძეს გიორგი ღურჯუმელიძემ განუმარტა, რომ ბიუჯეტი წლიურად 350 ძაღლის ეტაპობრივ გაყვანა-მომსახურებას და შემდეგ მათ ადგილებზე დაბრუნებას ითვალისწინებს.

საკრებულოს სხდომაზე განიხილეს ასევე და დაამტკიცეს განკარგულება დაბა ნარუჯაში საქართველოს ტერიტორიული მთლიანობისთვის დაღუპული მებრძოლების ხსოვნის უკვდავსაყოფად მემორიალური ობიექტის განთავსების თაობაზე.