ჩოხატაურის მუნიციპალიტეტის არქიტექტურის, სივრცითი მოწყობისა და ინფრასტრუქტურის სამსახურის უფროსის გოგი ბოლქვაძის განცხადებას მმართველი პარტიის დატოვებისა და გახარიას გუნდში გადასვლის შესახებ სოციალურ ქსელში მუნიციპალიტეტის მერი, ირაკლი კუჭავა გამოეხმაურა.
კუჭავა ბოლქვაძეს “სიმართლით დაწყებას” ურჩევს და ამბობს, რომ “ოცნების” მიერ “ხალხზე ზრუნვიდან გადახვევა,, არაფერ შუაშია და რომ გოგი ბოლქვაძეს მერობის კანდიდატობა “ოცნებიდან” სურდა, თუმცა, მას უარი უთხრეს.
“ყველა თავის გზას თვითონ ირჩევს, გოგი. არც ვინმე იზღუდება და იჩაგრება საკუთარი არჩევანის გამო, როგორც წინა წლებში, მაგრამ სიმართლე ისაა, რომ ,,ქართული ოცნებიდან,, გინდოდა კენჭის ყრა.
რადგან მერიის სამსახურის უფროსი იყავი, სხვასაც მივცეთ შანსიო გითხრეს…
ასე რომ ,,ხალხზე ზრუნვიდან გადახვევა,, არაფერ შუაშია…
თუ იწყებ სიმართლით დაიწყე, _ წერს ირაკლი კუჭავა, რაზეც ბოლქვაძე იქვე პასუხობს, რომ სიმართლით იწყებს და ასევე გააგრძელებს.
“სიმართლითაც დაწყებულია და სიმართლითვე გავაგრძელებ. მადლობა ყველას დახმარებისთვის”, _ პასუხობს მუნიციპალიტეტის მერს გოგი ბოლქვაძე.
