საწვავის ფასი ბოლო პერიოდში განსაკუთრებით მატულობს.
ამის გამო, ერთნაირად იზრდება ვნებათაღელვა. მოსახლეობა. მძღოლები, პროტესტს გამოთქვამენ… უკვე სოციალურ ქსელში აანონსებენ აქციებსაც, აქციზის გაუქმების მოთხოვნით.
ჯერჯერობით კი, რეალობა არ იცვლება _ ერთი ლიტრი დიზელის ფასი 4 ლარს მიუახლოვდა, ცოტათი ნაკლებია ბენზინის ფასი.
საწვავის ფასის ზრდის პარალელურად, მგზავრობის ფასის ზრდაც მოსალოდნელია, რაზეც განსაკუთრებით მტკივნეულად ხალხი, რიგითი ადამიანები რეაგირებენ.
ოზურგეთში აქტიურად საუბრობენ მგზავრობის საფასურის მოსალოდნელ გაზრდაზე.
სოფლების რეისების მიკროავტობუსების ზოგიერთმა მძღოლმა უკვე გამოუცხადა მგზავრებს, რომ მგზავრობის საფასური მოიმატებს, რადგან საწვავის ფასი, 4 ლარამდე გაიზარდა.
_ რა ქნან მძღოლებმა? ერთი ლიტრი დიზელის საწვავის ფასი 4 ლარზე ავიდა. 2 თეთრი აკლია _ 3,98 ლარი ღირს. ბენზინი 3,70 ლარი ღირს. წყალს ხომ არ ჩაასხამენ? _ გვითხრეს ოზურგეთის ავტოსადგურში.
აქვე გვითხრეს, რომ, ჯერჯერობით, მგზავრობის საფასური, საქალაქთაშორისო ტრანსპორტზე არ გაზრდილა, თუმცა, სავარაუდოდ, ესეც გაიზრდება.
რაც შეეხება რიგით მოქალაქეებს, ყველა ბრაზობს:
_ დიზელის საწვავის ფასი რომ ასე “გაფრინდა”, ეს სხვა ჩანაფიქრითაც ხდება _ ხვნა-თესვის სეზონი მოდის და შაქრის ფასის არ იყოს, რაღაც ხომ უნდა მოიფიქრონ ხალხის წასახრჩობად?! ახლა არ დაგვიწყოს ვინმემ, ბიზნესია და როგორც გაუხარდებათ, ფასს ისე დაადებენო. როგორც სურთ, ისე რომ გვექცევიან, კი ვხედავთ. ამიტომაა პროტესტი საჭირო, _ გვითხრეს ოზურგეთის ავტოსადგურში დილაადრიან მოსულმა მგზავრებმა, რომლებიც თბილისისკენ მიმავალ ავტობუსს ელოდებოდნენ.
_ შვილებს ხანდახან ერთი ჩანთით სოფლის ნობათს ვუგზავნით. ადრე 5 ლარს ვიხდიდით, ახლა კი ათი ლარიც სახვეწარია, ერთი ათკილოგრამიანი ჩანთა რომ გაგზავნო დედაქალაქში. ესაა საქმე?! მძღოლმაც რა ქნას, მაგრამ 21-ე საუკუნეში ასე საცოდავად თუ ვიცხოვრებდით, აღარ გვეგონა, _ წუხდნენ რიგითი ოზურგეთელები, რომლებმაც ვინაობის დასახელება რომ ვთხოვეთ, საყვედურით გვითხრეს: “მოძებნეთ, კმაყოფილი ვინაა, იმის გვარ-სახელი ჩაწერეთო”…
ორშაბათს, 21 მარტს, ოზურგეთის სამგზავრო ავტოსადგურში, “გურია ნიუსს” უთხრეს, რომ ოფიციალურად ჯერ არც ერთ მარშრუტზე მგზავრობის საფასური არ გაზრდილა. თუმცა, ამ კვირაში, საწვავის ფასის ასე ზრდის პირობებში, აუცილებლად მოიმატებს.
_ რა ქნან მძღოლებმა? თბილისის მძღოლს 750 ლარის დიზელი სჭირდება. ერთი ლიტრის ფასი როცა 4 ლარზე ავიდა, წარმოუდგენელია, მგზავრობის ფასი არ გაიზარდოს, _ ამბობენ აქ.
_ ახლა გავდივარ თბილისის მიმართულებით. 800 ლარის საწვავი მჭირდება. ადით და ნახეთ _ ავტობუსში ორი მგზავრი ზის. რა ვქნა? _ გვითხრა ოზურგეთი-თბილისის მძღოლმა.
_ თუ საწვავის ფასი არ დაიკლებს, 1 აპრილიდან მგზავრობის ფასი გაიზრდება, _ გვითხრეს ავტოსადგურის დირექციის წარმომადგენლებმა.
ოზურგეთის ავტოსადგურის დირექტორი შალვა ორაგველიძე, როგორც თავად აღნიშნა “გურია ნიუსთან”, საწვავის ფასის ზრდის გამო მძღოლებსა თუ თითოეულ მოქალაქეზე არანაკლებ შეწუხებულია.
_ საწვავის ფასი ძალიან იმატებს და როგორ ფიქრობთ, ვინმეს უხარია ან უნდა, მგზავრობის ფასი გაიზარდოს? პირველ რიგში, ეს იწვევს მძღოლისთვის მგზავრების დაკარგვას. კიდევ ვიტოვებ მცირე იმედს, რომ იქნებ, როგორმე, საქალაქთაშორისო ტრანსპორტზე მაინც დარეგულირდეს მგზავრობის ფასი, _ გვითხრა ორაგველიძემ.
კითხვაზე, რაში მდგომარეობს ეს იმედი, მან გვიპასუხა, რომ იქნებ, საწვავის ფასმა საერთაშორისო ბაზარზე დაიკლოს.
_ მოგვდის ინფორმაცია, რომ მსოფლიო ბაზარზე ნავთობის ფასი დაიწევს. მანამდე კი მძღოლები იჭირვებენ და უძლებენ ასეთ მდგომარეობას. ან სხვა რა გზაა?! _ თქვა შალვა ორაგველიძემ.
_ ბატონო შალვა, ახლა განსაკუთრებით წუხან სოფლების მცხოვრებლები. ბევრი რეკავს რედაქციაში და გვთხოვენ, ხომ არ ვიცით რაიმე საიმედო ინფორმაცია, რომ მგზავრობის ფასი არ გაიზარდოს…
_ როგორც გითხარით, იმავეს ვფიქრობთ და გვსურს ჩვენც. გვეკარგება მგზავრები, თუ ფასი მოიმატებს. ამ დროისთვის, დღეისთვის უფრო სწორად, მინიმალურად გაზარდეს სოფლების მძღოლებმა მგზავრობის საფასური. ყველა მოვიდა აქ, წუხდნენ, გაგვაცნეს თავიანთი მოსაზრება. საშუალოდ, ფასი 20-50 თეთრით გაიზარდა. მაგალითად, ოზურგეთიდან ბახვში მგზავრობა 1,30 ლარი იყო, ახლა არის 1,50 ლარი. მთისპირამდე კი ორი ლარი ღირდა, ახლა 2,50 ლარი, რადგან შორსაა ეს სოფელი და სხვანაირად არ ხერხდება. ასევე, მოვიდნენ ნატანების თუ შრომის ავტობუსების მძღოლები. მათ ვთხოვე, რომ ჯერჯერობით გაეძლოთ ამ მდგომარეობისთვის და არ გაუზრდიათ ფასი.
_ კონკრეტულად ხომ ვერ გვეტყვით, მგზავრობის ფასს რის მიხედვით უმატებენ. ხალხს ეს ძალიან აინტერესებს. მიიჩნევენ, რომ ყველა საკუთარი ნება-სურვილის მიხედვით მოქმედებს.
_ არაა ასე. ადამიანი როცა განერვიულებულია, შესაძლოა, ბევრი რამ თქვას. პირობითად, საწვავმა ფასი მოიმატა 20%-ით. პროცენტულად, მგზავრობის ფასიც, ასე ვთქვათ, უნდა აჰყვეს ამ პროცესს. ვიმეორებ, მძღოლები, მაქსიმალურად ცდილობენ, ძალიან არ მოხდეს სამგზავრო ფასის ზრდა.
შალვა ორაგველიძემ, ასევე, გვითხრა, რომ თუ საწვავის ფასი არ დაიკლებს, სამწუხაროდ, საქალაქთაშორისო მგზავრობაც გაძვირდება.
