თურქეთი, საქარიაში, შავი ზღვის ფსკერზე მილსადენის აშენებას აპირებს. მშენებლობას საფუძველი უკვე ჩაეყარა.
მილსადენი, დაახლოებით 170 კილომეტრზე იქნება გადაჭიმული და რეგიონის ჭაბურღილებს მთავარ ქსელთან დააკავშირებს, წყლის 2200 მეტრის სიღრმეზე გაიყვანება.
გაზის ამოტუმბვა კი პრეზიდენტ ერდოღანის განცხადებით, 2023 წლის პირველი კვარტლიდან დაიწყება.
გავრცელებული ინფორმაციით, თურქეთის სანაპიროდან დაახლოებით 150 კილომეტრში (93 მილი) შავ ზღვაში მდებარე გაზის საბადო არის ქვეყნის ყველაზე დიდი ბუნებრივი აირის აღმოჩენის ადგილი. მისმა საბურღმა Fatih-მა 2020 წლის აგვისტოში იქ 540 მილიარდი კუბური მეტრი გაზი აღმოაჩინა.
„საქარიას გაზის საბადო 2026 წლიდან პიკს მიაღწევს“, – განაცხადა ერდოღანმა.
ასევე მიმდინარეობს მუშაობა ფილოსში გაზის გადამამუშავებელ ქარხანაზე. ამბობენ, რომ მისი მშენებლობის პროცესში 4200-მდე მუშაა ჩართული.
“თურქეთი ენერგეტიკას რეგიონული თანამშრომლობის გასაღებად მიიჩნევს და არა დაძაბულობისა და კონფლიქტის ზონად“, – თქვა ერდოღანმა.
„ჩვენ გავაგრძელებთ ჩვენს ბრძოლას მრავალმხრივად, სანამ თურქეთს არ ვაქცევთ ქვეყნად, რომელმაც მთლიანად გადაჭრა ენერგომომარაგების უსაფრთხოების პრობლემა“, – დასძინა მან.
ასევე ღონისძიებაზე სიტყვით გამოსვლისას, ენერგეტიკისა და ბუნებრივი რესურსების მინისტრმა ფატიჰ დონმესმა თქვა, რომ გაზის საბადო ისტორიაში დარჩება, როგორც მსოფლიოში ყველაზე სწრაფი ოფშორული საბადოების განვითარების პროექტი გამოკვლევიდან პირველ წარმოებამდე.
