თვითმმართველობის კოდექსი დასახევი და თავიდან დასაწერია, არა მარტო საკანონმდებლო ლაფსუსების გამო, იმიტომაც, რომ ცუდ აურას ტოვებს ყველა დონეზე და ეგებ გამართულად დაწერამ გვიშველოს (ყველაფერი შეიძლება მოხდეს ჩვენთან, გარდა თვითმმართველობის გაძლიერებაზე ფიქრისა), _ ამის შესახებ პოლიტიკის მეცნიერებების მაგისტრატურის სტუდენტი, საარჩევნო სისტემების სპეციალისტი მამუკა მამალაძე ქსელში წერს.
“საქმე იმაში კი არ არის, რატომ?! რადგან, ნებისმიერი საქციელისთვის აქვს კაცობრიობას გამართლება მოძებნილი… უბრალოდ, თუ ვინმეს ილუზია აქვს, რომ აღმაშენებელი ისევ “დაგვეცემა თავში“ (ერთხელ კი იყო მაგის ილუზია, მაგრამ დაღმაშენებელი გამოდგა) ან ვაცლავ ჰაველი და მსგავსი, სამწუხაროდ, ცდება. თანამედროვე სახელმწიფო ვერაფრით ვერ აეწყობა “ზემოდან”. ჩვენს რეალობაში ვერ ნახავთ 80-100 ჭკვიან, მოაზროვნე, პატრიოტ, ფინანსური შესაძლებლობების, უცხოური გავლენების მქონე და ქვეყნისთვის გულანთებულ ადამიანთა ჯგუფს, რომელიც გაერთიანებული ძალით მხოლოდ სამშობლოს წინსვლაზე იფიქრებს.
არც გვაცდიან და ასეთი კონსოლიდაცია ილუზიაა. ქვეყანა გაიმართება წელში, როცა რამის ან ვინმეს მოლოდინში დაღლილი ხალხი, ინდივიდები, მე, შენ, ჩვენ, ისინი, თქვენ და ა.შ. დაიწყებენ ფიქრს, როგორ გავხდეთ უკეთესი, მიუხედავად იმისა, ვინ არის მთავრობაში და რის უფლებას მივცემთ მათ ისევ ჩვნგან გადახდილი ხელფასების სანაცვლოდ…
თვითმმართველობის კოდექსი დასახევი და თავიდან დასაწერია, არა მარტო საკანონმდებლო ლაფსუსების გამო, იმიტომაც, რომ ცუდ აურას ტოვებს ყველა დონეზე და ეგებ გამართულად დაწერამ გვიშველოს (ყველაფერი შეიძლება მოხდეს ჩვენთან, გარდა თვითმმართველობის გაძლიერებაზე ფიქრისა).
სანამ ჩვენი ღობის მახლობლად მომხდარი ჩვენი გასაკეთებელი და გადასაწყვეტი არ იქნება, თუ როგორ გაკეთდეს, ვინ გააკეთოს, როდის და რა ფინანსებით, მანამდე წვიმაში პირღია ბავშვებივით ვივლით. ეს ქმედებები კი უნდა იწყებოდეს “ქვემოდან”, ცოტა მეტი შრომა, მონდომება, ერთგულება საქმის და პრინციპულობა და ეგ არის.
ჩვენ ყველაფერი სწრაფად გვინდა, მაგრამ დღეს რომ გადავდგათ სწორი ნაბიჯი, შეიძლება 10-15-20 წლის მერე გამოიღოს საბოლოო შედეგი და სწორ გზაზე დავდგეთ. დღეს კი დაღამდა უკვე და ხვალ მაინც თუ გადავდგამთ, ეგეც კარგი იქნება. რომ იკითხო ამ ქვეყანაში 70-80% შვილების გამო აკეთებს ყველაფერს _ ისინი მოესწრონ მთავარიაო. გული შეიძლება დაგწყდეთ, მაგრამ ასე არა მგონი მოესწრნონ იმას, რაც თქვენ გინდათ მათთვის. ჯერ ერთი, მარტო ახალი თაობა რატომ? რაც უფრო მეტი თაობა მოესწრება, მით უკეთესი.
მამებმა, დედებმა, ბაბუა-ბებიებმა რა დააშავეს და მეორეც, თუ ეგ პრინციპია, მაშინ, რასაც ახლა ჩვენ ვიზამთ, იმის შესაფერის “ნათელ მომვალს” რომ მოესწრებიან, ეგ უფრო რეალური არ არის, ვიდრე შვეიცარიის დონის ქვეყანაში ცხოვრებას?! ვიღაც რომ “მოგაწვება“, იმაზე რაც იცი, რომ არასწორია და თავისას გაიტანს (არ აქვს მნიშვნელობა მიზეზს), შენი შვილიც 15- 20 წლის მერეც რომ იგივე უსამართლობას შეხვდეს, ვისი ბრალი იქნება _ გაუნათლებელი, ხეპრე,ფულზე დახამებული ჩინოვნიკების თუ შენი?!
სახელმწიფოს ისედაც იმდენი რამ აქვს აღებული საკუთარ თავზე, მართლა რაც მისი პირდაპირი მოვალეობაა, იმას რომ გაუმკლავდეს 60-70%-ით, ჩვენს ბედს ძაღლი არ დაჰყეფდა. ნუღარ დავუმატებთ საზრუნავს და ვეცადოთ, ჩვენს თავს ჩვენ მოვუაროთ. დღეს არ გამოვა ყველაფერი, ხვალ გამოვა, ის ახალი თაობაც დაინახავს, ისწავლის და მერე ჩვევაშიც გაჯდება.
ამას თუ დავუმატებთ მარტივ მათემატიკას, როგორიც არის:10-დან 7 რომ ცუდ საქმეს აკეთებს, იქ ძნელია სიმართლის დანახვა (ბახმაროში უკანონო მშენებლობების არ იყოს, მთავრობის უაზრო პოლიტიკის გამო) ან ყველას უნდა მიადგე ან, უბრალოდ, მიუშვა. ვიღაცას დაუნგრიო და ვიღაცას არა, ეგ რა სამართალია?!!. აბა, 10-დან 7 კარგად იქცეოდეს, როგორ უცებ მოგვხვდება თვალში ის 3 რას “მახინაციობსო“! თვითმმართველობა არის ის, რაზეც უნდა იდგეს ქვეყანა მივალთ მაქამდეც! ოდესმე… _ წერს მამუკა მამალაძე.
