დღეს, ოზურგეთში, აგვისტოს ომში დაღუპულ გმირთა ხსოვნას პატივი მიაგეს. მათ საფლავებთან თაიგულებით მივიდნენ გურიის სამხარეო და ოზურგეთს მუნიციპალიტეტის მერიის დასაკრებულოს ხელმძღვანელი პირები: გუბერნატორი, ზურა ნასარაია, ოზურგეთის მუნიციპალიტეტის მერი, კოტე შარაშენიძე, საკრებულოს თავმჯდომარე, დავით დარჩია, მოადგილე გიორგი ღურჯუმელიძე. დაღუპული გმირების: თემურ ჭიტაძე (სოფელი გურიანთა), თამაზ ნიკიტინი (ქალაქი ოზურგეთი) და ზაურ თენიეშვილი (ქალაქი ოზურგეთი), საფლავებთან ასევე მივიდნენ გურული ომის ვეტერანები, საქველმოქმედო ასოციაცია „გურიას“ ბენეფიციარები, მონიკა ახვლედიანი და თამარ ლურსმანაშვილი.
ოზურგეთის ცენტრში მათ თავდაპირველად გმირთა მემორიალი შეამკეს. შემდეგ კი იქვე, ეროვნული გმირის, ზაზა დამენიას საფლავს მიაგეს პატივი და გვირგვინი დადეს.
_12 წელი გავიდა აგვისტოს ომიდან. გურიიდან ცხრა ჯარისკაცი დაიღუპა ამ ომში. დილიდან მოვედით აქ, რათა შევამკოთ მემორიალი. მოვივლით გმირთა საფლავებს. დიდება გმირებს! მჯერა, მათი ბრძოლა უკვალოდ არ ჩაივლის და საქართველო გაერთიანდება, _ თქვა გურიის გუბერნატორმა ზურაბ ნასარაიამ.
ეროვნული გმირის ზაზა დამენიას დედამ, ქალბატონმა ციური წერეთელმა, როგორც ყოველთვის, ცრემლიანმა ისაუბრა:
_ტრაგიკული დღეა, უსაზღვროდ ტკივილიანი. ამ დღის აღნიშვნა აუცილებელია. ღმერთმა ყველა გმირი ნათელში ამყოფოს, ჩემი შვილის თამადობით, _ თქვა მან.
მამას იგონებს გიორგი დამენია, ამჯერად სტუდენტი :
_ძალიან რთული დღეა. ვერ გეტყვით, ეს სასიხარულოა თუ სამწუხარო. თუმცა, თუ საქართველო კაშკაშებს მსოფლიო რუკაზე, ასეთი გმირების წყალობითაა. მჯერა, საქართველო იქნება ერთიანი, _ გვითხრა გიორგი დამენიამ.
აგვისტოს გმირის, თამაზ ნიკიტინის საფლავის თაიგულებით შემკობის მერე, გუბერნატორი ზურაბ ნასარაია ესაუბრა ნიკიტინის დედას, რომელმაც მორიდებით გამოთქვა საყვედური იმის გამო, რომ მას და მის მცირეწლოვან ბიჭუნას ოზურგეთში ერთი ოთახი არ აქვთ, რომ ღამე გაათიონ.
_ჩვენ ქუთაისში გადავედით საცხოვრებლად. აქ თამაზის საფლავია. ძალიან გვიჭირს სიარული. ნება რომ იყოს, შეიძლებოდა ხელისუფლებას ერთი ოთახი გამოეყო ჩვენთვის სადმე, რომ როცა ჩამოვდივართ საფლავის მოსანახულებლად, ღამის გათევა შეგვეძლოს, _ უთხრა მან გუბერნატორ ნასარაიას. თავის მხრივ, ზურაბ ნასარაიამ გამოკითხა, თუ ჰქონდა ვინმესთან კომუნიკაცია აღნიშნულის თაობაზე ან განცხადებით თუ მიმართა.
სოფელ გურიანთაში ეროვნული გმირის, თამაზ ჭიტაძის საფლავის შემკობის შემდეგ, გმირის ბავშვობა გაიხსენეს მშობელბმა და ახლობლებმა.
_ეს უაზრო ომი იყო, ვინც კი, სამშობლოსთვის დაიხოცნენ ბიჭები, გმირებად რჩებიან, მაგრამ შეიძლებოდა ამ ომის თავიდან აცილება, _ საკუთარი გულისტკივილი გამოხატა თემურ ჭიტაძის მამამ, თამაზ ჭიტაძემ.
