ამერიკის შეერთებული შტატების პრეზიდენტი დონალდ ტრამპი აცხადებს, რომ უკრაინაში ომი მალე უნდა დასრულდეს და ამ საკითხზე შეხვედრას რუსეთის პრეზიდენტ ვლადიმერ პუტინთან აპირებს. თუმცა, ტრამპს ჟურნალისტებთან არ დაუკონკრეტებია შეხვედრის დრო.
აშშ-ს პრეზიდენტმა დონალდ ტრამპმა თქვა, რომ პუტინი “არ შეიძლება აღფრთოვანებული იყოს ომით”, რადგან “ის არც ისე კარგად მუშაობს”.
ტრამპის თქმით, ბევრს სჯეროდა, რომ ომი ერთ კვირაში დამთავრდებოდა, მაგრამ ის თითქმის სამი წელი გაგრძელდა.
ტრამპმა განაცხადა, რომ ბევრი ადამიანი დაიღუპა, როგორც რუსულ, ისე უკრაინულ მხარეზე, ამიტომ ”ძალიან კარგი იქნება, რომ ეს ომი დასრულდეს”.
მან ასევე გამოთქვა რწმენა, რომ ვოლოდიმირ ზელენსკის ომის დასრულების შეთანხმების დადება სურს. თუმცა, აშშ-ის პრეზიდენტის თქმით, უცნობია სურს თუ არა პუტინს ეს.
თეთრი სახლის ახალმა ხელმძღვანელმა განაცხადა, რომ პუტინს სჭირდება გარიგება და დასძინა, რომ ამით ის ანადგურებს რუსეთს. მან ხაზგასმით აღნიშნა, რომ რუსეთის წინაშე დგას მნიშვნელოვანი პრობლემები და მიუთითა მისი ეკონომიკის მდგომარეობაზე და ქვეყანაში მზარდ ინფლაციაზე.
ამასთან, ტრამპმა იმედი გამოთქვა, რომ საბოლოოდ შეთანხმება შედგება.
