იმ ფონზე, როცა ლანჩხუთში, ქალაქის ტერიტორიაზე, უპირატესად ცენტრალური ნაწილის გაკეთილშობილებაზეა აქცენტი აღებული, საზოგადოებრივი ტრანსპორტით მოსარგებლე მოქალაქეები მოსაცდელის მოწყობას ითხოვენ.
რამდენიმე დღეა, რაც ლანჩხუთში ჯაპანა-ეწერის მარშრუტზე ყვითელი ავტობუსები გამოჩნდა, რომელიც თბილისის მერიამ 2020 წელს ჩამოწერა. მაშინ დედაქალაქის მერიის განმარტებით, ყვითელი ავტობუსის გამონაბოლქვი და განსაკუთრებით, გადატვირთული საზოგადოებრივი ტრანსპორტი თბილისის რუტინად იყო ქცეული. ამის თაობაზე განცხადება ფეისბუქის საშუალებით თვით თბილისის მერმა, კახა კალაძემაც გააკეთა:
“მძიმე სურათია ე. წ. ყვითელი ავტობუსების თვალსაზრისით, რომელიც მართლაც კრიტიკას ვერ უძლებს და ყველანაირი რესურსი ამოწურული აქვს. მათი გამონაბოლქვი სერიოზული პრობლემაა ჩვენი ჯანმრთელობისთვის, ჩვენი შვილებისთვის და მომავალი თაობებისთვის”, _ თქვა კახა კალაძემ.
ძველი ავტობუსების შეფასებისა და ჩამოწერის პროცედურა 2020 წელს დაიწყო. შესაბამისი კომისიის მიერ მათი ჩამოწერა ორ კატეგორიად გაიყო. ტრანსპორტი, რომელიც სრულად გამოუსადეგარი იყო ექსპლუატაციისთვის, გამზადდა როგორც ჯართი და ავტობუსებზე, რომლებიც აკმაყოფილებენ ტექნიკურ სტანდარტებს, შესაბამისმა სატრანსპორტო კომპანიამ მერიასთან ერთად მიიღო გადაწყვეტილება მისი განკარგვის შესახებ. შემდეგ კი აღნიშნული ავტობუსები რეგიონებში გაიგზავნა.
ყვითელი ავტობუსების გამოჩენას ლანჩხუთის ქუჩებში მოქალაქეთა მხრიდან არაერთგვაროვანი რეაქცია მოჰყვა. ერთი ნაწილის აზრით, “რატომ უნდა იაროს ლანჩხუთელმა ხალხმა ჯართში ჩასაბარებელი ავტობუსებით?!”; ნაწილი ფრიად კმაყოფილია, რომ ჯაპანა-ეწერის მარშრუტზე “მარშრუტკები” დედაქალაქიდან ჩამოყვანილმა ავტობუსმა ჩაანაცვლა.
“დღეს ვიმგზავრე ამ ავტობუსით და ძალიან კმაყოფილი ვარ. ზოგადად, “მარშრუტკა” არ მიყვარს, კუბოში მგონია თავი”, _ ამბობს ერთ-ერთი მოქალაქე.
აზრთა სხვაობის მიუხედავად, ლანჩხუთელთა უმეტესობა თანხმდება, რომ დედაქალაქიდან ჩამოყვანილი მეორადი ავტობუსები “იმ “მარშრუტკებს” მაინც ჯობს, ხალხი რომ ეჯდა ერთმანეთს თავზე და ერთმანეთის ამონასუნთქ ჰაერს სუნთქავდა”.
ახლა კი უამინდობით შეწუხებულ საზოგადოებრივი ტრანსპორტით მოსარგებლე მოქალაქეთა საწუხარი მოსაცდელის არარსებობაა. იმ ტერიტორიაზე, სადაც სხვადასხვა სოფლიდან ჩამოსული ტრანსპორტი ჩერდება, მგზავრებს ავდარსა თუ თაკარა მზეში, უკვე ბევრი წელია, ღია ცის ქვეშ უწევთ დგომა.
“საზოგადოებრივი ტრანსპორტის რეგულირება თავისთავად პრობლემატურია და იმ ქალაქში, სადაც თავს იყრის ყველა მიმართულების ტრანსპორტი, ამდენი ხანია, ვერ მოგვარდა იმ ადგილის შერჩევა, სადაც ელემენტარული მოსაცდელის ტიპის ნაგებობა გაკეთდება.
კარგია ლანჩხუთში ფასადები, ტროტუარები რომ ახლდება, მაგრამ რა ვუყოთ იმ ქაოსს, თუნდაც გურულის ძეგლის მიმდებარედ რომაა?! აქ მართლაც რთული სიტუაციაა იმის გამო, რომ არეულია ერთმანეთში გარე მოვაჭრეები, ტაქსების გაჩერება, სოფლიდან ჩამოსული საზოგადოებრივი ტრანსპორტი და მათი მგზავრები. ელემენტარულად იმის საშუალებაც არაა, გადახურულში, თავზე რომ არ გვაწვიმდეს, მაინც დაელოდო ტრანსპორტს. ზაფხულში ხის ქვეშ მაინც არის მოსაჩრდილებელი, ზამთარში, თქეში წვიმა რომაა, რა უნდა ქნა?! ხალხი ქათმებივითაა შეყუჟული, სადაც მცირედ სიმშრალეს მაინც ნახავს. სამწუხაროდ, წლებია ამას არავინ აქცევს ყურადღებას”, _ ამბობენ საზოგადოებრივი ტრანსპორტით მოსარგებლე მოქალაქეები, რომელთაც ხშირად უწევთ სხვადასხვა საქმეზე სოფლიდან რაიონულ ცენტრში ჩამოსვლა.
პრობლემა, რომელიც ბევრი წელია აწუხებს ლანჩხუთის მოსახლეობას, ლესის მაჟორიტარმა ელისო ჭიჭინაძემაც გააჟღერა რამდენიმე თვის წინ საკრებულოს ერთ-ერთ სხდომაზე. მაშინ ამ პრობლემის პასუხად მერიის ინფრასტრუქტურის სამსახურის უფროსმა, ლევან ჩხაიძემ გვითხრა: “იმისთვის, რომ ქალაქის იმ ტერიტორიაზე, სადაც სოფლებიდან ჩამოსული საზოგადოებრივი ტრანსპორტი იყრის თავს, მოქალაქეებისთვის მოსაცდელი მოეწყოს, მერიისგან დავალება უნდა მივიღოთ, რომ რაღაც პროგრამაში ჩავსვათ. კარგი იქნება, მოქალაქეებმა მერიას ოფიციალურად მიმართონ ამასთან დაკავშირებით. ჩვენ მოსაცდელის ტიპიური პროექტიც გვაქვს, ისეთი, როგორიც სოფელ გვიმბალაურში, საფეხბურთო აკადემიის მიმდებარედაა გაკეთებული. საკმაოდ ლამაზია შესახედავადაც. მთავარია, მე მივიღო დავალება ჩემი ზემდგომისგან, მათთან კი მოქალაქეებისგან უნდა შევიდეს მოთხოვნა”, _ გვითხრა ჩხაიძემ.
ახლა, როცა ქალაქში, უპირატესად, ცენტრალური ნაწილის გაკეთილშობილებაზეა აქცენტი აღებული და აქტიურად მიმდინარეობს ინფრასტრუქტურული სამუშაოები _ ხდება მრავალბინიანი საცხოვრებელი სახლების გარე ფასადების მოწესრიგება, ტროტუარების მოწყობა, მოსახლეობის თხოვნით, “გურია ნიუსი” დაინტერესდა იგეგმება თუ არა საზოგადოებრივი ტრანსპორტით მოსარგებლეთათვის მოსაცდელის მოწყობა.
კომენტარისთვის ისევ მერიის ინფრასტრუქტურის სამსახურის უფროსს, ლევან ჩხაიძეს დავუკავშირდით, რომლისგანაც პასუხად მივიღეთ, რომ მიმდინარე პროექტში მსგავსი რამ გათვალისწინებული არაა.
“ჯერჯერობით, არ არის გათვალისწინებული მოსაცდელის მოწყობა. ვნახოთ, მომავალში რა იქნება. ისე, იყო ამ საკითხზე საუბარი და ვნახოთ”, _ ამბობს ჩხაიძე.
[sexy_author_bio]
