ახლა, როცა თანდათან ტემპერატურა ვარდება და მალე ზამთარიც მოგვადგება კარს, ქალბატონებს განსაკუთრებულ რჩევებს ვთავაზობთ, რაც პირადი თუ საოჯახო გამოცდილებით, არის სანდო და სრულფასოვანი შედეგით გამყარებული.
ქალბატონებს, განსაკუთრებით მათ, ვისაც ყოველდღიურად უწევთ შინიდან გასვლა, გამორჩეულად მართებთ, მზრუნველობით მოექცნენ საკუთარ სახის (ხელის) კანს, სისტემატურად იზრუნონ დაღლილობის მოხსნაზე, უფრო კი აცივების პერიოდიდან.
დაღლილობის იერის გასაქრობად, ასევე, სახის თუ ხელების კანის ელასტიურობის შესანარჩუნებლად, გთავაზობთ ძალიან ეფექტურ და უვნებელ პროცედურას, სახელდახელოდ მომზადებული ნაზავით.
ამისთვის დაგჭირდებათ სახლის ქათმის ერთი ცალი კვერცხი, ზეითუნის ზეთი ან გლიცერინი და ლიმონის წვენი, თითო სუფრის კოვზი. ეს ყველაფერი კარგად ათქვიფეთ ერთმანეთში. ათიოდე წუთით დადეთ ოთახის ტემპერატურაზე. მიღებული მასა გასუფთავებულ სახეზე წაისვით კარგად, თვალების გარშემო კი უფრო სქლად და ასე გაიჩერეთ სახეზე, 40 წუთის განმავლობაში (ერთ საათს არ გადააჭარბოთ).
შემდეგ ოთახის ტემპერატურის წყლით ჩამოიბანეთ. გაიმშრალეთ პირსახოცის დაფენით და წაისვით ხარისხიანი მკვებავი კრემი. ნუ გაგიკვირდებათ _ ბებიაჩემი, კრემის ნაცვლად, ხმარობდა ღორის გადადუღებულ ე. წ. მუცლის ქონს და საუცხოო შედეგი ჰქონდა. ეს პროცედურა კვირაში სამჯერ ჩაიტარეთ.
თუ საშუალება გექნებათ და დრო, თან არ დაიზარებთ, შეგიძლიათ, ყოველ საღამოსაც გაიკეთოთ. მერწმუნეთ, საოცრად კმაყოფილი დარჩებით. მით უფრო, საჭირო მასალა ადვილად ხელმისაწვდომია.
დაღლილობის მოსახსნელად, ასევე, ორგანიზმის გასასუფთავებლად, შინაგანი სიმძიმის მოსახსნელად, საუცხოოა შემდეგი მარტივი მეთოდით მომზადებული ნაზავის მიღება:
ერთლიტრიან ქილაში ჩაასხით ოთახის ტემპერატურის წყალი, ჩაუშვით ექვსი ჩაის კოვზი ნატურალური თაფლი და დაუმატეთ ერთი დაჭრილი ლიმონი. კარგად აურიეთ და დღის განმავლობაში სამჯერ ან დილა-საღამოს დალიეთ. სასურველია, ერთი ლიტრი, ერთი დღის განმავლობაში მიირთვათ, ათი დღის მანძილზე მაინც.
მომდევნო კვირაში შეისვენეთ და მერე კვლავ გაიმეორეთ. ეს , როგორც ვთქვი, უფრო ეფექტურია და საჭიროც, ზამთრის განმავლობაში. საუცხოოო შედეგი გექნებათ.
ზოგადად, სოფლის ქათმის კვერცხი, ლიმონი და თაფლი ის ინგრედიენტებია, რომლებიც ყველაზე კარგად ეხმარება სახის კანის დაღლილობის, შეშუპების, უძილობის პრობლემების სრულად აღმოფხვრას. ამიტომ, ზამთრის მოახლოების წინ, განსაკუთრებით დაიჭირეთ თადარიგი და მოიმარაგეთ ან ხელმისაწვდომი იყოს თქვენთვის. ასევე, გირჩევთ, ნუ მიიღებთ ყველანაირ რჩევას, ნაირ-ნაირი კრემების შეგროვებას. გამოცადეთ ერთი სახეობის კრემი გარკვეული დროის მანძილზე. რომელიც მოგცემთ საუკეთესო შედეგს, ის გამოიყენეთ.
ასევე, მინდა, გესაუბროთ ასკილის შესახებ, რომელიც გურიაში, ისევე როგორც მთელ საქართველოში, ხშირად გვხვდება. ის, ახლა, შემოდგომაზე, შეგიძლიათ სრულიად უსასყიდლოდ შეაგროვოთ.
ასკილს უამრავი ღირსება გააჩნია. ის უნიკალური მცენარეა. ასკილის ზეთი არის საუკეთესო საშუალება კანის დაავადების მოსაშუშებლად, ჭრილობის შესახორცებლად. ასევე, როგორც საცხი, მშრალ კანს ძალიან ატენიანებს და ნაზს ხდის.
კარგად გამომშრალ ასკილის ნაყოფს თესლი გამოვუღოთ. დავჩეჩქვოთ დარჩენილი მასა და ერთ კოვზს სამი კოვზი ზეთი (უმჯობესია, ზეითუნის) დავასხათ. დავდგათ ბნელ, მშრალ ადგილზე.
20 დღის მანძილზე, დღეში ერთხელ შევანჯღრიოთ. შემდეგ გავწუროთ მარლაში და გრილ ადგილზე (ზაფხულში კი მაცივარში) დავდგათ. გამოვიყენოთ, როგორც კრემი. საუკეთესოა, როგორც ვთქვი, ჭრილობის მოსაშუშებლად, დამზრალი კანის დასარბილებლად. ძალიან კარგია ფეხის დამსკდარი ქუსლებისთვის.
გალინა წიტაიშვილი
