წინასააღდგომო ბაზრობაზე, როგორც ოზურგეთში ამბობენ, ასეთი სიძვირე არასდროს ყოფილა.
ხალხმრავლობაც არაა ისეთი, წინა წლებში რომ შეიმჩნეოდა სადღესასწაულო დღეებში და მაინც ფასების ზრდა, განსაკუთრებით, კვერცხზე, ყველსა თუ ბოსტნეულზეც კი, თვალში საცემია.
_ შარშანდელი სააღდგომო კვირა გვახსოვს _ მანქანები და ხალხი ერთმანეთს გვერდს ვერ უვლიდა. პანდემიის პირობებში, როცა რეგულაციების მკაცრ დაცვას ითხოვდნენ, ადამიანები უფრო მასობრივად გამოცვივდნენ ქუჩებში. მოსწრებაზე იყო ყველა _ ეგონათ, ვერაფერს იყიდდნენ. არადა, სანთელი და სამიოდე კვერცხია მთელი ფილოსოფია. რას გვთხოვს ჩვენ მეტს გარდაცვლილთა სულები? _ ასეთი დიალოგი ისმის ოზურგეთის ქუჩებში მოსიარულე არაერთი ადამიანისგან, განსაკუთრებით კი, ქალბატონებისგან.
რაც შეეხება ოზურგეთის ბაზარსა და მიმდებარე ქუჩას, თაყაიშვილის ქუჩის ჩასახვევთან, ამ ლოკაციაზე, პირდაპირ სოფლებიდან ჩამოსული ადამიანები დგანან, რომელთა პროდუქტი გადამყიდველის დახლებზე არ გადასულა. ამიტომ მათთან ბევრი მოქალაქე მიდის, რომ ცოტათი მაინც, ნაკლებ ფასად იყიდონ განსაკუთრებული სააღდგომო პროდუქტი. თუმცა, სიიაფე არც აქ არის.
ბოლო დღეებში განსაკუთრებით გაძვირებულ სოფლის ყველსა და კვერცხზე, ყველაზე მეტი მოთხოვნაა. დილით ადრე, იყო შემთხვევები, როცა ერთ ცალ კვერცხს 80 თეთრს აფასებდნენ, შემდეგ 70 თეთრს.
უმეტესად კი კვერცხის ფასი 60 თეთრია. ცალკეულ მაღაზიებში ერთ კილოგრამ ყველს 15 ლარს აფასებენ. ოზურგეთის ბაზარში კი ერთი კილოგრამი ყველის ფასი 12 ლარს არ სცილდება. კვერცხის კი _ 50 თეთრს.
_ რა გჭირთ? მაინცდამაინც სააღდგომოდ გადაირიეთ, გაკეთილშობილების ნაცვლად? დაგვახრჩეთ ყველამ, მთავრობიან, გადამყიდველებიანად… _ ბრაზობენ პროდუქტის საყიდლად გამოსული მოქალაქეები და ბაზარსა და მაღაზიებში მონაცვლეობით დადიან, რომ შედარებით ნაკლებ ფასად იყიდონ სააღდგომოდ ყველაზე საჭირო პროდუქტი.
_ ამ ინდაურს ას ლარად ვყიდი. ერთ თეთრს არ დავაკლებ. ორასად რომ გავყიდო, მაინც ვერ ამინაზღაურებს, რაც სამ წელიწადში შეჭამა, _ ამბობდა ინდაურით მოვაჭრე ქალბატონი, რომელიც ინდაურზე უფრო ბრაზობდა, ვიდრე გამვლელ-გამომვლელებზე, რომლებიც ფრინველის წონით ინტერესდებოდნენ.
შინაური ფრინველის ფასი განსაკუთრებით მომატებულია _ ქათამი 30 ლარი ღირს, გოჭი, ცოცხალი წონით, ერთი კილოგრამი 15 ლარია.
ერთი კილოგრამი ყველის ფასი 12 ლარიდან იწყება. თუმცა, ისე ჭრელი ფასი, როგორც ახლა ყველს აქვს, არც ერთ პროდუქტზე არ შეიმჩნევა. ფასი 12-15 ლარის ფარგლებში მერყეობს და ყველა გამყიდველი ხაზს უსვამს, რომ მისი პროდუქტი მეტად ერბოიანია, წონა კი _ ზუსტი. ეს კი, უფრო თავის მართლებას ჰგავს, აწეული ფასის გამო.
ოზურგეთში, წინასააღდგომო ბაზრობაზე, არათუ ყველისა და კვერცხის ფასი გაიზარდა, ბოსტნეულმაც, განსაკუთრებით კი, პრასმა “დაიფასა თავი”.
ერთი კილოგრამი, ძირებიანად ამოღებული, გასუფთავებული პრასი სამი ლარი ღირს და ის ერთი კილოგრამი სიმინდის ფქვილის ფასს გაუტოლდა და როგორც ამბობენ, სიმინდის ფქვილი, სეზონის მოსვლამდე, შესაძლოა, 5 ლარიც გახდეს.
_ არ დათესოთ ყანები! ა, ბატონო, რა ღირს სიმინდი!
_ რით დავთესოთ, რა ღირს დიზელი, სადაა ტრაქტორი, რა ფასები ადევს ყველაფერს, _ ასეთი ბუზღუნი ყველგან ისმის სააღდგომო ბაზრობის ორომტრიალში.
რაც შეეხება ძროხის და ღორის ხორცს, ზოგან, მაგალითად, 15 ლარი ღირს.
_ გაიკვირვეთ ახლა! არ მითხრათ, ცხენი ხომ არ დაგიკლავსო, _ გვითხრეს ერთ-ერთ მაღაზიაში ხუმრობით და აღნიშნეს, რომ საკუთარი ფერმა ჰყავთ, შრომობენ და ცდილობენ, ოდნავ მაინც შეუმსუბუქონ მყიდველს ფასების სიმძიმე.
ძირითადი და აუცილებელი ბოსტნეული კულტურებიდან, ყველაზე მაღალი ფასი მაინც ახლად შემოსულ კარტოფილს აქვს. ის აქა-იქ ჩანს დახლებზე და ერთი კილოგრამი ახლადშემოსული კარტოფილი 7 ლარი ღირს!
რაც შეეხება შაქრისა და პურის ფქვილის ფასს, ერთი კილოგრამი შაქარი ახლა ოზურგეთის ბევრ მაღაზიაში იყიდება სამ ლარად, ხოლო ერთი ტომარა, უმაღლესი ხარისხის პურის ფქვილის ფასი ასი ლარია.
ყველაზე იაფი კი, არც ისე ადვილად მოსაპოვებელი და მოსათხრელი, მცენარე ენდროს ძირების შეკვრები ღირს. დიდ-პატარა ზომებად დაფასოებული, სააღდგომო რიტუალის ყველაზე საჭირო ეს ინგრედიენტი ასე ფასობს: პატარა ზომის შეკვრა, რომელიც 20 კვერცხის შესაღებად არის საკმარისი, 1 ლარი ღირს. ორმაგი შეკვრა 2 ლარი და ასე მატულობს ფასი 6 ლარამდე.
ავტორი
