“მთელი გრიგოლეთი სავსე არის მიუსაფარი, აგრესიული ძაღლებით, იყო დაკბენის შემთხვევებიც. მოგეხსენებათ, ეს საკურორტო ზონაა, სადაც უამრავი ოჯახი პატარა ბავშვებთან ერთად ისვენებს და წარმოუდგენელია, მათი მარტო გაშვება, გასეირნება. ძალიან კარგად არის მოგვარებული დასუფთავება, სანაპირო დაცვა. გთხოვთ, გაითვალისწინოთ დამსვენებელთა თხოვნა და ეს პრობლემაც მალევე გადაჭრათ. ერთი ან ორი ძაღლი რომ იყოს, კიდევ მესმის, მაგრამ აქ სანაპიროზე გასვლა შეუძლებელია“, – თხოვნით მიმართავს ლანჩხუთის მერიას მოქალაქე სოფო ჟორჟოლიანი.
სამწუხაროდ, მიუსაფარი ძაღლების თემა არახალია ლანჩხუთის მუნიციპალიტეტისთვის, მათ შორის, საკურორტო ზონისთვის. ფაქტობრივად, ქალაქისა თუ სოფლის ყველა ხალხმრავალ ადგილზე, განსაკუთრებით იქ, სადაც სავაჭრო თუ სწრაფი კვების ობიექტები მდებარეობს,
ქუჩაში მათი მოხვედრის ისტორია თითქმის იდენტურია: მათზე უარი პატრონმა რამდენიმე მიზეზის გამო თქვა _ ან სახლში მიყვანის შემდეგ სათანადოდ ვერ გაზარდა და გამოაგდო, ან მისი შენახვის ფინანსური საშუალება ვერ გამონახა, რის გამოც, ოთხფეხა მეგობარზე უარი თქვა.
ქუჩაში დარჩენილ მიუსაფარ ცხოველებს კი, არსებობისთვის უწევთ ბრძოლა. მათ მაღაზიებთან, სკოლებთან, რესტორნებთან, სამედიცინო დაწესებულებებთან, სკვერებში, ბაზარში _ თითქმის ყველგან შეხვდებით, სადაც ადამიანი ტრიალებს, შემწეობის მოლოდინში.
ცხოველთმოყვარული ადამიანები ამბობენ, რომ აგრესიული ძაღლების რიცხვი, რომლებიც ადამიანებს ერჩიან, ძალიან მცირეა. ძაღლი ადამიანს თავისი ინიციატივითა და სურვილით არ ესხმის თავს, ხშირ შემთხვევაში, ადამიანები ახორციელებენ ამის პროვოცირებას, თუმცა, ფაქტია, რომ მოქალაქეების ნაწილს ქუჩაში შემხვედრი ცხოველების ეშინია.
მიუხედავად იმისა, ამ პრობლემის მოსაგვარებლად ბიუჯეტში გარკვეული ღონისძიებები ასახულია, საკითხი სულ უფრო მტკივნეული ხდება _ ყოველდღიურად იზრდება მიუსაფარი ძაღლების რაოდენობა, პრობლემის გადაჭრის მეთოდები კი, არაეფექტური გამოდის. ამ საკითხთან დაკავშირებით საკრებულოს სხდომაზეც არაერთხელ იყო საუბარი.
მიუსაფარი ძაღლების თემა საკრებულოს ბოლო სხდომაზე “ოცნების” გუნდის წევრმა დარეჯან ბურჭულაძემ გააჟღერა. მისი თქმით, ეს საკითხი საკმაოდ პრობლემურია ჩვენს სინამდვილეში და ყურადღებას საჭიროებს: “თუკი ე.წ. ქუჩის ძაღლების სტერილიზაცია–კასტრაცია ხდება, მაშინ რატომ მრავლდებიან? ზოგი მათგანი აგრესიულია. ამ ბოლო პერიოდში რამდენიმე ადამიანი დაკბინა, უმეტესობა მათგანი პენსიონერია. ზოგი ძაღლი დაავადებულია. რა გვეშველება ამ კუთხით?” _ იკითხა ბურჭულაძემ, რომლის ინფორმაციითაც, მიუსაფარი ძაღლების თავდასხმის ობიექტი მისი ასაკოვანი მამაც გახდა.
ლანჩხუთის სინამდვილეში მიუსაფარი ძაღლების პრობლემაზე ადრე საკრებულოს ოპოზიციონერმა დეპუტატმა, გია გოგუაძემაც გაამახვილა ყურადღება: “სამარცხვინო სიტუაციაა, ძაღლების შიშით მოსახლეობა მაღაზიებიდან ვერ გამოდის ნავაჭრით ხელში. გუნდ–გუნდად არიან დაყოფილი, საკუთარი სამოქმედო ზონები აქვთ შერჩეული და მაღაზიიდან გამოსულ ადამიანებს თავს ესხმიან. ცნობისთვის, 2015 წლის 27 თებერვალს მაშინდელმა საკრებულომ ცხრაპუნქტიანი სამოქმედო გეგმა დაამტკიცა, სადაც სასწაულად კარგი მიზნები და ამოცანებია დასახული კატებისა თუ ძაღლების მოვლა–პატრონობაზე, მაგრამ, სამწუხაროდ, აქედან ერთიც არ შესრულებულა. ამ წლების განმავლობაში მხოლოდ ისაა, რომ ყვითელი “ბირკები” აქვთ ყურებზე და დანომრილია“, _ თქვა გოგუაძემ საკრებულოს ერთ-ერთ სხდომაზე.
პრობლემა რომ აქტუალურია, ამას მუნიციპალიტეტის მერი, ალექსანდრე სარიშვილიც ადასტურებს, თუმცა, მისი პოზიციით, ამ საკითხის მანამ არ მოევლება, სანამ საკანონმდებლო დონეზე არ მოხდება მიუსაფარი ძაღლების საკითხის მოწესრიგება.
პრობლემის აქტუალურობაზე საუბრობენ რიგითი მოქალაქეებიც:
“სასწრაფოდ რაღაც ღონისძიება უნდა გატარდეს, აღარ შეიძლება ასე. მაღაზიიდან ვერ გამოხვალ ნავაჭრით, მაშინვე თავს გესხმიან და გართმევენ, თუ რამე პროდუქტი იყიდე. პურია თუ სხვა რამე, ხელებაწეულმა უნდა გამოიტანო, თუ არადა პარკის ნაგლეჯიც არ შეგრჩება ხელში. მთელი ლანჩხუთი შეწუხებულია ამ პრობლემით“, _ ამბობენ მოქალაქეები და ქმედითი ნაბიჯების გატარებას ითხოვენ.
ლანჩხუთელთა უმეტესობა, პრობლემას რომ საბოლოოდ მოევლოს, გამოსავალს თავშესაფრის აშენებაში ხედავს. მათი თქმით, კასტრაცია-სტერილიზაცია პრობლემას ვერ აგვარებს:
“ვეღარ გაივლი, მშიერი ძაღლების დიდი ჯგუფები დაძრწიან ქუჩებში. ცხოველების უფლებების დაცვა და ჰუმანურობა ადამიანის უსაფრთხოებასთან შესაბამისობაშია მოსაყვანი. უნდა მოშორდნენ ეს ძაღლები ქალაქს. თავშესაფარი _ ეს თუ გვიშველის. იმდენი ფართობია, შემოიღობება და თავისუფლად შეიძლება გაკეთდეს თავშესაფარი. მერე ხალხის შემოწირულობითა და მონდომებით ყველაფერი იქნება. კასტრაცია–სტერილიზაცია პრობლემას ვერ აგვარებს, რა მნიშვნელობა აქვს, კასტრირებული გიკბენს თუ არაკასტრირებული?!” _ ამბობენ მოქალაქეები. ადგილობრივი ხელისუფლების განმარტებით კი, ლანჩხუთის ბიუჯეტი თავშესაფრის გაკეთებას ვერ გაწვდება. ხელისუფლების აზრით, პრობლემის აღმოსაფხვრელად აუცილებელია მოსახლეობის ჩართულობა და კანონმდებლობის გამკაცრება, რომ ყველა ძაღლი, რომელიც ოჯახში ჰყავთ აღირიცხოს და ქუჩაში მათი გადაგდების შემთხვევაში, შესაბამისი სანქციები უნდა გატარდეს.
ავტორი
