“გვაქვს უთვალავი ფერითა”- ასე ჰქვა წმ. ქეთევან დედოფლის ხსოვნისადმი მიძღვნილ გამოფენას, რომელიც 10-11 ნოემბერს თბილისში, მხატვართა კავშირის საგამოფენო დარბაზში იყო წარმოდგენილი.
საშემოდგომო გამოფენა გაბრიელ-ბეგი მამალაძის სახელობის კულტურულ საგანმანათლებლო ფონდი „ჩემი საქართველოს“ ორგანიზებით მოეწყო და მასში ა(ა)იპ ჩოხატაურის მუნიციპალიტეტის სახელოვნებო სკოლების გაერთიანების სამხატვრო სკოლისა და მოსწავლე-ახალგაზრდობის სახლის მოსწავლეებთან ერთად მონაწილეობას იღებდნენ ა(ა)იპ თბილისის მოსწავლე – ახალგაზრდობის სახლის ვაკის ფილიალის მოსწავლეები და ინდივიდუალური მხატვრები, ბეგის ფონდის სტიპენდიანტები-თბილისის წმინდა გიორგის სახელობის ქართულ-ბრიტანული სკოლის მოსწავლე ანდრია ბენაშვილი და ხიდისთავის საჯარო სკოლის მოსწავლე მარი ბრეგუ.
გამოფენას ესწრებოდნენ მხატვრები: თეონა ღლონტი, ნინო ბათილაშვილი, ვასილ მეცხვარიშვილი, დემურ ჩარჩხალია, რომან კუპრეიშვილი, თინათინ კალანდაძე, ალექსანდრე ციხელაშვილი, ირაკლი ავალიშვილი, ავთო დათაშვილი, ,,ქეთევან დედოფლის საზოგადოების” წევრები და მისი ხელმძღვანელი თამარ ფარჩუკიძე, თბილისის საპატიო მოქალაქე გვანჯი მანია, საქართველოს პარლამენტის კულტურის და განათლების სპეციალისტი ქეთევან ტომარაძე, საქართველოს პარლამენტისა და თბილისის მერიის წარმომადგენლები.
გამოფენის გახსნის ღონისძიებაზე სიტყვით არაერთი მოწვეული სტუმარი გამოვიდა. მათ წმინდა ქეთევან წამებულის ღვაწლის შესახებ ისაუბრეს და ხაზი გაუსვეს ახალგაზრდა მხატვრების ნიჭიერებას.
მათი თქმით, მსგავსი სახის ღონისძიებები ახალგაზრდა მხატვრებისთვის ინსპირაციის წყაროა.
აღნიშნულ გამოფენაში აქტიური მონაწილეობისთვის მოსწავლეები და პედაგოგები სამახსოვრო სიგელებით დაჯილდოვდნენ გაბრიელ-ბეგი მამალაძის სახელობის კულტურულ-საგანმანათლებლო ფონდის ,,ჩემი საქართველო’’- ს პრეზიდენტის მარიკა ზედელაშვილის მიერ.
“ეს დღე ძალიან მნიშვნელოვანია იმიტომ პატივს მივაგებთ ქეთევან დედოფალს, რომელიც ეწამა სწორედ იმისთვის, რომ ერთიან, ბედნიერ, ქრისტიანულ საქართველოში გვეცხოვრა და თქვენ, პატარებს გქონოდათ იმის საშუალება რომ ასეთი ლამაზი ნამუშევრები შეგექმნათ”,_ განაცხადა მარიკა ზედელაშვილმა გამოფენის გახსნისას.
ქალბატონი მარიკას შემდეგ სიტყვით შეკრებილი საზოგადოების წინაშე თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსის მოადგილე ვასილ ქარსელაძე.
მან გამოფენის მნიშვნელობას გაუსვა ხაზი და წმინდა ქეთევანის ცხოვრების შესახებ ისაუბრა.
“დიდი მნიშვნელობა აქვს მსგავს შეხვედრებს. წმინდა ქეთევანს განსაკუთრებული ადგილი უჭირავს საქართველოს ისტორიაში და მისასალმებელია, რომ ბავშვები მის ცხოვრებას ეცნობიან და მუშაობენ ნახატებზე. ეს არის ძალიან დიდი რამ, რასაც თავის ნაყოფი აუცილებლად ექნება მომავალში”,_ განაცხადა ვასილ ქარსელაძემ.
ბეგის დეიდა, პოეტი ნინო ზედელაშვილი მიესალმა გამოფენის მონაწილეებს და მისი ფავორიტი ნახატების ავტორები საკუთარი ლექსების კრებულით დააჯილდოვა.
“ქეთევან დედოფლის საზოგადოების” თავმჯდომარე თამარ ფარჩუკიძემ კი სიტყვით გამოსვლისას აღნიშნა, რომ ეს პირველი გამოფენაა საქართველოში, წმ. ქეთევნის ხსოვნას ეძღვნება. გარდა ამისა, მან ბეგი მამალაძეც გაიხსენა, რომლის ნამუშევრებიც, ასევე წარმოდგენილი იყო საგამოფენო დარბაზში.
“როდესაც პატრიარქს საკუთარი გაზრდილი ძმისშვილი გარდაეცვალა, მას უთქვამს, რომ ალბათ ასეთი ახალგარზდები იმიტომ მიდიან, რომ იქ უფრო დიდი საქმის გაკეთება შეუძლიათო. ბეგი მამალაძის თავგადასავალიც დაახლოებით ამ კონტექსტში რჩება. ის გააკეთებდა ბევრ დიდ საქმეს, მაგრამ რაც მან ზეცად წასვლის შემდეგ გააკეთა განსაკუთრებით უფრო მასშტაბური, ღრმა და მაღალი პასუხისმგებლობის აღმოჩნდა. ერთ-ერთი ასეთი ღონისძიებაა დღეს სწორედ”,_ განაცხადა მან.
გამოფენის გახსნაზე სიტყვით გამოვიდა ჩოხატაურის მუნიციპალიტეტის სახელოვნებო გაერთიანების სამხატვრო სკოლების მენეჯერი მზია კვინტრაძე.
“ეს არის წმინდა ქეთევანის გახსენება, თუ შეიძლება ასე ითქვას, ნამუშევრების სახით. მოსწავლეებთან ერთად გადავწყვიტეთ შეგვექმნა წარმოდგენა წმინდა ქეთევანზე. სამი თვე ვიმუშავეთ ამ თემაზე მეუფის კურთხევით და შედეგიც სახეზეა. წმ ქეთევანი იყო ადამიანი, რომელმაც საკუთარი კეთილდღეობა გასწირა ქვეყნის კეთლილდღეობისთვის, ქრისტიანობისთვის, საქართველოსთვის დადო თავი”,_ განაცხადა მზია კვინტრაძემ სიტყვით გამოსვლისას.
გამოფენაზე წარმოდგენილი იყო გრაფიკული, ფერწერული, გამოყენებითი ხელოვნების (თექა, კერამიკა, ხეზე კვეთა) და რეწვის წრის მოსწავლეთა ნამუშევრები, რომლებმაც სტუმრების დიდი მოწონება დაიმსახურა. ამას გარდა, მოსწავლეებმა ქეთევან დეფოფლის ცხოვრების შესახებ ინფორმაცია გააცნეს შეკრებილ საზოგადოებას.
