ქალაქ ოზურგეთში, აპოლონ წულაძის ქუჩაზე ე.წ. “გმირთა მოედანზე“, ოზურგეთის სიმბოლო, ბილბორდი _ “მამული, ენა, სარწმუნოება, უკვე რამდენიმე დღეა აღარ არის.
აღნიშნულ ტერიტორიაზე სამსართულიანი კომერციული დანიშნულების შენობა შენდება, რომელსაც ოზურგეთელი საზოგადოების ვერსიით, ჩოხატაურის მუნიციპალიტეტის საკრებულოს დეპუტატი ბაკურ შარაშიძე და ქალაქ ოზურგეთის მერი ბეგლარ სიორიძე აშენებენ.
“გურია ნიუსმა“ კითხვით მიმართა ოზურგეთელებს, თუ იციან ვინ და რას აშენებს აღნიშნულ ტერიტორიაზე, რომელთა უმეტესობა მხოლოდ ერთ პასუხს გვაძლევდა:
“არ ვიცით, რა შენდება, მგონი სავაჭრო ცენტრი, რომელსაც ბაკურ შარაშიძე და ბეგლარ სიორიძე აშენებენ“.
მოქალაქეების ჩაწერის დროს, ერთი პიროვნება მოგვიახლოვდა, რომელიც აგრესიული ტონით მოგვმართავდა:
„მშენებლობასთან დაკავშირებით რაიმე გაინტერესებთ? გამომყევით და გაგცემენ პასუხებს, აქ რომ ვიღაც ტაქსისტებს ეკითხებით ინფორმაციას“, _ გვითხრა ახალგაზრდა მამაკაცმა, რომელმაც ჩვენს კითხვაზე თუ ვინ იყო, ასევე თავხედურად გვიპასუხა _“ვინ ვარ და მაკო შუბლაძე“.
აღნიშნული პირი ვინმე კახა კონტრიძე აღმოჩნდა, რომელიც ოზურგეთელი ვასილ ვაშალომიძის მეგობარია. სწორედ, ვასილ ვაშალომიძის სახელზეა გაცემული სამშენებლო ნებართვა.
როგორც “გურია ნიუსმა“ გაარკვია, ქალაქ ოზურგეთში აპოლონ წულაძის ქუჩაზე, ე.წ. გმირთა მოედანზე, ვასილ ვაშალომიძე აშენებს კომერციულ შენობას. ის ქალაქ ოზურგეთის მერის თანაშემწე იყო გარკვეული დროის განმავლობაში, ასევე, იყო “ოცნების“ აქტივისტი და მერის არჩევნებში აქტიურად ჩართული, თანამდებობის პირებთან დაახლოებული, თუმცა ვაშალომიძე “გურია ნიუსთან“ საუბრის დროს აღნიშნავს, რომ ის არც “ოცნებისტია“, არც _ საჯარო მოხელე და არის უბრალოდ ოზურგეთელი. აღნიშნული ტერიტორია კი 2008 წელს შეიძინა აუქციონის წესით.
არც ქალაქ ოზურგეთის მერი ბეგლარ სიორიძე, არც ვაშალომიძე და არც საკრებულოს დეპუტატი ბაკურ შარაშიძე არ ადასტურებენ მშენებლობაში ერთმანეთთან რაიმე წილისა და გარიგების შესახებ ინფორმაციას. სამივე მათგანი ადასტურებს ინფორმაციას, რომ აღნიშნულ მშენებლობას მხოლოდ ვასილ ვაშალომიძე აწარმოებს.
ოფიციალური დოკუმენტების საფუძველზე, კონკრეტულად კი, 2017 წლის 11.04. ქალაქ ოზურგეთის მერის მიერ გაცემული ბრძანების შესაბამისად, ვასილ ვაშალომიძეს მიეცა თანხმობა აეშენებინა კომერციული ფართი:
ბრძანება _ “მიწის ნაკვეთის სამშენებლოდ გამოყენების პირობების და დამტკიცების შესახებ:
“ვასილ ვაშალომიძემ #1726 განცხადებით მომართა ქალაქ ოზურგეთის მუნიციპალიტეტის მერიას და “მშენებლობის ნებართვის გაცემის წესისა და სანებართვო პირობების შესახებ“ საქართველოს მთავრობის 2009 წლის 24 მარტის #57 დადგენილების შესაბამისად, მოითხოვა ქალაქ ოზურგეთში, წულაძის ქუჩაზე, თავის საკუთრებაში არსებულ არასასოფლო-სამეურნეო დანიშნულების 130 კვ.მ. ფართობის მიწის ნაკვეთზე კომერციული ფართის მშენებლობისთვის მიწის ნაკვეთის სამშენებლოდ გამოყენების პირობების დამტკიცება.
საქართველოს კანონის შესაბამისად, დაიწყო ადმინისტრაციული წარმოება, რომლის დროსაც დადგინდა, რომ წარმოდგენილი განცხადება და თანდართული დოკუმენტები შეესაბამება მოქმედი კანონმდებლობის მოთხოვნებს. გამომდინარე აქედან, დაკმაყოფილდეს ვასილ ვაშალომიძის განცხადება და დამტკიცდეს, ქალაქ ოზურგეთში წულაძის ქუჩაზე, თავის საკუთრებაში არსებული არასასოფლო-სამეურნეო დანიშნულების 130 კვ.მ. ფართობის მიწის ნაკვეთზე კომერციული ფართის მშენებლობისათვის მიწის ნაკვეთის სამშენებლოდ გამოყენების პირობები“, _ აღნიშნულ ბრძანებას ხელს ქალაქ ოზურგეთის მერი ბეგლარ სიორიძე აწერს.
ამის შემდეგ, 11 აპრილს ქალაქ ოზურგეთის მერიის სივრცითი მოწყობის, არქიტექტურისა და, მშენებლობის ინსპექტირების, ზედამხედველობისა და ურბანული განვითარების სამსახურის უფროსის მამია ბარამიძის ხელმოწერით იქმნება პროექტი: სამშენებლო ობიექტის დასახელება _ კომერციული დანიშნულების ფართი; პროექტის შემსრულებელია შპს “ექსპრეს სერვის პლიუსი“ .
“რა ხდება ვინმემ მოგმართათ საჩივრით თუ თქვენი დაინტერესებაა? ვის აინტერესებს?“ _ გვეკითხება ვასილ ვაშალომიძე, რომელიც ხაზს უსვამს, რომ ერთ გარემოებას:
“ეს მიწა ჩემის საკუთრებაა, ჩემია, ბეგი სიორიძე არაფერ შუაში არ არის. 2008 წელს ვიყიდე აუქციონზე, მთლიანად 140 კვ.მ. 1400 ლარად მაქვს შეძენილი, ვაშენებ სამსართულიან კომერციული დანიშნულების შენობას, რომელიც შეიძლება გავაქირავო ან მე ავამუშავო“.
_ ბატონო ვასილ, თუ 2008 წელს შეიძინეთ აღნიშნული ტერიტორია, რატომ აქამდე არ ააშენეთ?
_ რატომ მიგყავთ საუბარი იქითკენ? რაღაცა ისე მისვამთ კითხვებს! აქამდე რატომ არ ავაშენე? არ მქონდა საშუალება.
_ ახლა საიდან გაქვთ?
_მეგობარმა დამაფინანსა თბილისიდან.
ჩვენს კითხვაზე, რა ბედი ეწევათ აღნიშნულ ტერიტორიაზე მომუშავე ტაქსებს, ვაშალომიძე გვპასუხობს, ჯერ ამაზე საუბარი ნაადრევია, თუმცა, მისივე თქმით, შენობის წინ არავის გააჩერებს.
“გურია ნიუსი“ დაუკავშირდა ქალაქ ოზურგეთის მერს ბეგლარ სიორიძეს, რომელმაც კატეგორიულად გამორიცხა მისი ურთიერთობა აღნიშნულ მშენებლობასთან:
“ვინ ამბობს, რომ მეწილე ვარ? დოკუმენტაციას რატომ არ ნახულობთ? ეს არის ჯერ კიდევ “ნაციონალების“ დროს შეძენილი მიწა, მე არანაირი ურთიერთობა არ მაქვს მშენებლობასთან და ბაკურ შარაშიძეს რა აქვს ვერ გეტყვით“.
რაც შეეხება ბილბორდს _ “მამული, ენა სარწმუნოება“, სიორიძე გვპასუხობს, რომ ის უბრალოდ ადგილს მოიცვლის და უკეთეს ადგილას განთავსდება:
“მამული, ენა, სარწმუნოება“ ბევრად უკეთესად, რეკლამის სახით ჩადებულია პროექტში და სადღეღამისოდ განათებული კეთდება მაქ, ახალი შენობის თავზე“.
რაც შეეხება ჩოხატაურის მუნიციპალიტეტის საკრებულოს დეპუტატს ბაკურ შარაშიძეს, ის “გურია ნიუსთან“ ადასტურებს ინფორმაციას, რომ ხშირად არის აღნიშნულ ტერიტორიაზე, სადაც მშენებლობა მიმდინარეობს, თუმცა, მხოლოდ იმ მიზეზით, რომ ვასილ ვაშალომიძესთან მეგობრობს და მას ეხმარება.
“ალბათ ხშირად მხედავენ მაქ და ამიტომ გაუჩნდათ ეს კითხვა, ვასიკო ჩემი მეგობარია. ჩვენ 30 წელია ერთად მოვდივართ, მე არ ვაშენებ. როგორც მეგობარს ვეხმარები.
ბეგი სიორიძე საერთოდ რა შუაშია მაქ, ცოტა ხნის წინ მე და ბეგიმ დავხოცეთ ერთმანეთი და ახლა ერთად ვაშენებთ? თუ წილები ვერ გავიყავით? ახლა მშენებლობა წამოვიწყეთ სამსართულიანი? არა, ბატონო, ვასილს გამოუგზავნეს თანხა თბილისიდან და ჩვენ, ბიჭები ვეხმარებით“.
