წყალმომარაგებისა და წყალარინების ქსელზე უკანონო მიერთებების ფაქტები გამოვლინდა. ქუთაისში მომხდარი ამბის შესახებ ინფორმაციას ინფრასტრუქტურის სამინისტრო ავრცელებს.
“ჩატარებული ტექნიკური შემოწმებების შედეგად, ქალაქში მოქმედ რამდენიმე სამეწარმეო და სასოფლო-სამეურნეო დანიშნულების მქონე ობიექტს წყლის მიწოდება შეუზღუდა.
აღნიშნული ობიექტები წყალმომარაგების ქსელზე კანონის დარღვევით იყვნენ მიერთებულნი, რაც იწვევდა წყლის დანაკარგებს, ქსელში წნევის ვარდნას და ზრდიდა სასმელი წყლის ხარისხის გაუარესების რისკებს. მსგავსი ქმედებები აზიანებს როგორც წყალმომარაგების ინფრასტრუქტურას, ისე კეთილსინდისიერ მომხმარებლებს.
წყალმომარაგების შეზღუდვა ხორციელდება მხოლოდ ტექნიკური შემოწმებით დადასტურებული უკანონო დაერთების შემთხვევაში და სრულად შეესაბამება მოქმედ კანონმდებლობას.
კომპანიამ კომერციულ ობიექტებს კანონის შესაბამისად რეგისტრაციისთის ვადა გასული წლის დეკემბრამდე მისცა, თუმცა მოთხოვნები ყველა შემთხვევაში არ შესრულდა. შედეგად, ქსელის სტაბილური ფუნქციონირების, წყლის რესურსის სამართლიანი განაწილებისა და მოსახლეობის უსაფრთხოების უზრუნველსაყოფად, მიღებულ იქნა გადაწყვეტილება მათთვის წყალმომარაგების შეზღუდვის შესახებ.
„საქართველოს გაერთიანებული წყალმომარაგების კომპანია“ აცხადებს, რომ უკანონო დაერთებების წინააღმდეგ ღონისძიებები გაგრძელდება მთელი ქვეყნის მასშტაბით და მოქალაქეებსა და ბიზნესს მოუწოდებს, წყალმომარაგებისა და წყალარინების სერვისით კანონიერად და პასუხისმგებლობით ისარგებლონ“,_ აცხადებს ინფრასტრუქტურის სამინისტრო.
