აღმოსავლეთ საქართველოში ზომიერზე მეტი ნალექია მოსალოდნელი, ხოლო მაღალ მთაში თოვლჭყაპი და ყინვა – ამის შესახებ “გურია ნიუსს” გარემოს ეროვნული სააგენტოს მოკლევადიანი ამინდის პროგნოზის ბიუროს ხელმძღვანელმა, დოდო გვაზავამ განუცხადა.
“12-13 სექტემბერს ცალკეულ რაიონებში ხანმოკლე წვიმაა მოსალოდნელი. აღმოსავლეთ საქართველოში, შესაძლოა, ზომიერზე მეტი ნალექი მოვიდეს 12 სექტემბრის საღამოს საათებში, დასავლეთში არ არის ძლიერი ნალექი მოსალოდნელი. არ არის გამორიცხული, რომ მაღალ მთიან რაიონებში, ზღვის დონიდან 2000 – 2500 მეტრზე, მწვერვალებზე სუსტი თოვა აღინიშნოს.
ჰაერის ტემპერატურის მომატება საქართველოში დაიწყება 14 სექტებრიდან. ძლიერი ქარი და ნალექი მოსალოდნელი არ არის, თუმცა ამ კვირის განმავლობაში ცალკეულ რაიონებში მაინც მოსალოდნელია ხანმოკლე ხასიათის წვიმა ელჭექებით”,_ ამბობს გვაზავა.
კითხვაზე, მოსალოდნელია თუ არა თოვა ბახმაროშიც – დოდო გვაზავა გვპასუხობს:
_ ბახმაროს ტერიტორიაზე ცივი ჰაერის მასები ახლა შემოდის, თუმცა დღის ბოლომდე გამოიდარებს. 11 სექტემბერს ისეთი არაფერი არ არის და ჰაერის ტემპერატურის ცოტათი მატება შეიმჩნევა, მიუხედავად იმისა, რომ 11 სექტემბერს მთელ საქართველოში ჰაერის დაბალი ტემპერატურა დაფიქსირდება. ღამის ტემპერატურა ძალიან დაიკლებს და მაღალ მთიან რაიონებში უკვე უარყოფითი ტემპერატურა დაფიქსირდება, -2, -3 გრადუსი. 12-13 სექტემბერს მოსალოდნელმა ნალექმა შესაძლებელია ბახმაროში არ გამოიწვიოს ნალექი, მაგრამ შესაძლებელია ამ სიმაღლის მწვერვალებზე თოვლჭყაპი.
