თურქული ფეხბურთის ლეგენდა, რუშტუ რეჩბერი, სასწრაფოდ გადაიყვანეს საავადმყოფოში. ამის შესახებ ადგილობრივი მედია წერს.
როგორც ცნობილია, “ბარსელონას” ყოფილ მეკარეს კორონავირუსი COVID-19 დაუდგინდა.
46 წლის რეჩბერის ოჯახის წევრების ინფორმაციით 46 წლის რეჩბერს ვირუსის სიმპტომები სწრაფად განუვითარდა და ის მძიმე მდგომარეობაში იმყოფება.
“ჩემი მეუღლე საავადმყოფოში მოათავსეს, მას სამწუხაროდ კორონავირუსი დაუდგინდა. ყველაფერი ნორმალურად იყო, მაგრამ სიმპტომები მომენტალურად განვითარდა, ჩვენ ჯერ კიდევ შოკში ვართ. ეს კრიტიკული და რთული დროებაა. ჩემი ერთადერთი თხოვნა იქნება ხალხისადმი ჰქონდეთ დისტანცია და ურთიერთპატივისცემა. ჩემი და ჩემი შვილების პასუხი უარყოფითია. ის საავადმყოფოშია და მისი ნახვის უფლებას არ გვაძლევენ” – წერს რუშტუს მეუღლე სოციალურ ქსელში.
შეგახსენებთ, რომ რუშტუ თურქული ფეხბურთის ლეგენდაა და გულშემატკივარს თავი 2002 წლის მუნდიალზე დაამახსოვრა, როდესაც შესანიშნავი თამაშით გუნდს მესამე ადგილის დაკავებისკენ წარუძღვა. გარდა ამისა, იმავე ჩემპიონატზე ყურადღება თვალებთან წასმული სპეციალური ლაქით მიიქცია.
კარიერის უმეტესი ნაწილი თურქმა „ფენერბახჩეში“ გაატარა, ერთი სეზონი კი კატალონიის „ბარსელონაშიც“ ირჯებოდა, ბოლო ხუთი წელი „ბეშითქაშში დაჰყო, ხოლო თურქეთის ნაკრებში 120 თამაში ჩაატარა, მათ შორის, ევროპის სამ და მსოფლიოს ერთ ჩემპიონატზე ითამაშა.
თურქეთში, ბოლო მონაცემებით, კორონავირუსით ინფიცირების 9 217 შემთხვევაა დაფიქსირდა, ხოლო 131 ადამიანი გარდაიცვალა
