“უადგილობის გამო პაციენტები საავადმყოფოებში ვეღარ გადაგვყავს”

ლანჩხუთის მუნიციპალიტეტიდან კოვიდკლინიკაში გადაყვანას 2 კოვიდინფიცირებული პაციენტი ითხოვდა, მაგრამ ისინი მკურნალობას, ჯანმრთლობის მძიმე მდგომარეობის მიუხედავად, სახლში აგრძელებენ.

როგორც „გურია ნიუსს“ ლანჩხუთის ჯანდაცვის ცენტრში განუცხადეს, უადგილობის გამო პაციენტები საავადმყოფოებში ვეღარ გადაჰყავთ.

„როდესაც პნევმონიაა, სუნთქვის უკმარისობის შემთხვევა გვაქვს  და პაციენტი არის ასაკოვანი, რისკფაქტორია, გართულებების თავიდან ასარიდებლად, მიზანშეწონილია, მოხდეს მათი ჰოსპიტალიზაცია. იყო 112 გამოძახებული, გუშინწინ ღამეს და სამწუხაროდ, ვერ მოხერხდა  ჰოსპიტალიზაცია. იძულებული გახდა 112 პაციენტი მოეყვანა სახლში, რადგან არცერთ კლინიკას ადგილი არ ჰქონდა და  სახლში ხდება ახლა მკურნალობა ოჯახის ექიმის და 112-ის ექიმის ონლაინკილინიკის რეკომენდაციებით. უადგილობის გამო პაციენტები საავადმყოფოებში ვეღარ გადაგვყავს. ასეთი სიტუაცია გვაქვს, ჯერჯერობით, ისევე, როგორც მთელ ქვეყანაში“, _ ამბობენ ჯანდაცვის ცენტრში.

ამ დროისთვის, ლანჩხუთის მუნიციპალიტეტში კორონავირუსით ინფიცირების 367 შემთხვევაა დადასტურებული. აქტიური შემთხვევაა 129, რაც ნიშნავს, რომ კორონავირუსით ინფიცირებული 238 ადამიანი გამოჯანმრთელდა.