17 იანვარს საქართვლოს სკოლებში სასწავლო პროცესი განახლდა. განათლების და მეცნიერების სამინისტროს განცხადებით, სასწავლო პროცესის განსაახლებლად, ქვეყნის ყველა საჯარო და კერძო სკოლა სრულად მომზადებული იყო.
ყველაზე მთავარი კი, პანდემიის პირობებში, უსაფრთხოების და სხვა ნებისმიერი რისკის თავიდან ასაცილებლად, სკოლებში დაცული იქნება ჯანდაცვის სამინისტროს მიერ შემუშავებული ყველა რეკომენდაცია. დასწრებული სწავლების შემთხვევაში , პირველიდან მეთორმეტე კლასის ჩათვლით, მოსწავლეები ვალდებული იქნებიან, ატარონ პირბადე, ხოლო სახელმწიფო უზრუნველყოფს, მასწავლებელთა სავალდებულო ტესტირებას, _ ნათქვამია განათლების სამინისტროს გაცხადებაში.
თუ რა მდგომარეობაა ოზურგეთის მუნიციპალიტეტის საჯარო სკოლებში სწავლის განახლებისას, აღნიშნული მითითებების და ღონისძიებების გატარების ფონზე, განახლდა თუ არა სწავლა ყველა სკოლაში, მოწესრიგებულია თუ არა სკოლები სასწავლო პროცესის სრულფასოვნად ჩატარებისთვის, „გურია ნიუსი“ ოზურგეთის რესურსცენტრის უფროსს, ლელა იმედაშვილს ესაუბრა:
_ ოზურგეთის 44 საჯარო სკოლაში სასწავლო პროცესი 17 იანვარს განახლდა. მეორე სემესტრი განვაახლეთ. გამონაკლისია ორი სკოლა. ერთი, ეს არის ურეკის საჯარო სკოლა, სადაც ჰიბრიდული სწავლებით მივდივართ, რადგან მოსწავლეები ალტერნატიულ ფართში არიან გადასული, ახალი სკოლის მშენებლობის გამო.
მეორე არის ოზურგეთის პირველი საჯარო სკოლა, სადაც სწავლის განახლების წინა დღეს , ერთ კორპუსში, გვიან, საღამოს მოულოდნელად დაგვიზიანდა გათბობის სისტემა. ამის გამო პირველი სკოლის მეხუთე-მეთორმეტე კლასებში სწავლა 17 იანვარს ვერ განახლდა და შაბათის ხარჯზე აანაზღაურებენ. პირველ -მეოთხე კლასებში კი ჩვეულებრივად ვმუშაობთ, _თქვა მან.
ლელა იმედაშვილმა გამოთქვა იმედი და მზადყოფნა, რომ მეორე სემესტრში, მშვიდობიან გარემოში გაგრძელდება სწავლა.
_ აბსოლუტურად მორგებული ვიქნებით იმ კოვიდრეალობას, რაც იქნება ამ ეტაპისთვის და მეორე სემესტრის განმავლობაში ჩვენს მუნიციპალიტეტში, _ გვითხრა მან.
სასწავლო პროცესის განახლების შემდეგ, ჩვენ ასევე ვესაუბრეთ ცალკეული სკოლების ხელმძღვანელებს პრობლემებზე, განწყობაზე, სხვადასხვა საკითხზე, რაც მათ სასწავლო პროცესის დროს ეხებათ.
ოზურგეთის მეორე საკჯარო სკოლის დირექტორმა, ფატი სიორიძემ გვითხრა, რომ მეორე სემესტრის სასწავლო პროცესს სკოლა მომზადებული შეხვდა.
_ მეორე სემესტრის სასწავლო პროცესი განახლდა და სკოლა აბსოლუტურად მომზადებული შეხვდა ამ სიტუაციას. გათბობა 24 საათის განმავლობაში ჩართულია. გამოცხადება არ იყო სახარბიელო, თუმცა ეს ძირითადად უამინდობის ბრალი იყო. სტატისტიკას ვავსებთ და ვიღებთ ინფორმაციას, რა ხდება ამ მხრივ. პირველ რიგში გეტყვით, კოვიდსტატისტიკას რაც შეეხება. სკოლაში სულ ხუთი ინფიცირებული მოსწავლე არის და იზოლაციაში იმყოფებიან, ეს არდადეგების პერიოდში მოხდა და სკოლასთან არანაირი კავშირი არ ჰქონდა. ამ ეტაპზე კოვიდინფიცირებული პედაგოგი არ გვყავს, _ გვითხრა მან.
კითხვაზე, მოსწავლეთა დასწრების სიმცირის გამო, თუ გატარდება ღონისძიება, ქალბატონმა ფატიმ განაცხადა, რომ ყველა მშობელს მიმართეს ინდივიდუალრად და არ გამოცხადებასთან დაკავშირებით, ყველა პრობლემა მკაცრად გაკონტროლდება:
_ ვიმეორებ, რომ უამინდობის გამო , დასწრების მაჩვენებელი არ იყო მაღალი, თუმცა უმეტეს კლასებში გამოცხადება ნორმალურად მოხდა. 15, 18, 20 ბავშვი ყველა კლასში იყო. 25 ბავშვზე ნაკლები, არცერთ კლასში არაა და ამიტომ გვეცოტავება აღნიშნული მაჩვენებელი. მხოლოდ დაწყებითი კლასებში, მეორე კლასში იყო სამი ბავშვი. თოვდა, იყო ყინვები. არაერთი პატარა მშობელს სკოლამდე ხელჩაკიდებული მოჰყავს. თუმცა ეს იყო სწავლის დაწყების დღეს, ახლა კი ველოდებით უკეთეს დასწრებას. სწავლის განახლებამდე ყველა დამრიგებელს მივაწოდეთ ინფორმაცია და მათ მშობლებს ელექტრონული ფორმით შეატყობინეს, რომ სასწავლო პროცესი აბსოლუტურად გამართულია. არდასწრების მიზეზი, გარდა უამინდობისა, არასაპატიო არ ყოფილა. სკოლაში შექმნილია უსაფრთხო გარემო. 99% პედაგოგებისა, აცრილია. ზოგმა ბუსტერიც კი გაიკეთა. მხოლოდ ერთი მასწავლებელია დარჩენილი, კოვიდი ჰქონდა და ამიტომ არ მოხერხდა, _ გვითხრა ფატი სიორიძემ.
ქალაქის დანარჩენ სკოლებშიც, ხელმძღვანელებმა განაცხადეს, რომ სასწვლო პროცესის ხელისშემშლელი არანაირი პრობლემა არ არსებობს. უამინდობის გამო დასწრება იყო დაბალი.
დასწრების მაჩვენებელი , კიდევ უფრო დაბალი იყო სოფლების სკოლებში:
_ სასწავლო პროცესი გამართულია. გათბობა 24 საათის განმავლობაში არის. დაცულია სანიტარული მდგომარეობა, კოვიდრეგულაციები. რაც შეეხება დასწრებას, პირველ დღეს მცირე რაოდენობა გამოცხადდა სკოლაში. თუმცა, ეს უამინდობის ბრალი იყო და ხვალიდან მდგომარეობის გაუმჯობესებას ველოდებით. კოვიდ ინფიცირებულია ერთი პედაგოგი და იზოლაციაშია , _ გვითხრა ჭანიეთის საჯარო სკოლის დირექტორმა ია ბერაძემ.
ოზურგეთს მუნიციპალიტეტის სოფელ შემოქმედის საჯარო სკოლის დირექტორმა, ნინო სადრაძემ გვითხრა, რომ 17 იანვარს, სწავლის განახლების დღეს, სკოლაში მოსწავლეთა 30% გამოცხადდა.
_ ეს იყო უამინდობის ბრალი. ასევე , არის ზოგიერთი უბანი, მაგალითად გორისფერდი, სადაც კონკრეტული ქუჩების სიღრმეში ვერ შევიდა სასკოლო ტრანსპორტი. თოვდა და დღეისთვის უკვე გზა გაწმენდილია და სკოლაშიც მოსწავლეთა 85% გამოცხადებულია. სასწავლო პროცესი გამართულია. ყველა მშობელმა იცის, რომ სკოლაში არანაირი შემაფერხებელი გარემოება არ არსებობს, ხელი შეეშალოს სასწავლო პროცესის სრულფასოვნად წარმართვას. დაცულია კოვიდრეგულაციები. განათლების სამინისტრომ ყოველმხრივ მოგვამარაგა ყველა საშუალებით. ჩვენ ისევე მოვემზადეთ და ყველა ღონისძიება გავატარეთ მეორე სემესტრში სასწავლო პროცესის განახლების წინ, როგორც სექტემბერში, ახალი სასწავლო წლის დაწყებისას ვემზადებით. კიდე ერთი სასიხარულო ინფორმაცია გვაქვს, რომ ამ დროისთვის სკოლაში არ გვყავს კოვიდინფიცირებული პედაგოგი. ორი მასწავლებელი იყო ტესტის მოლოდინში და არცერთს არ აღმოაჩნდა დადებითი ფორმა. ეს ძალიან გვიხარია. მაქსიმალურად ვფრთხილობთ, დავიცვათ კოვიდრეგულაციები, _ გვითხრა ნინო სადრაძემ.
ზოგადად, როგორც „გურია ნიუსს“ უთხრეს სკოლების დირექტორებმა თუ ადგილობრივმა მცხოვრებლებმა ნატანებში, ძიმითში, დვაბზუში, ბახვში, და სხვა სოფლებში აღნიშნეს, რომ მეორე სემესტრში, სწავლის განახლებისას სახარბიელო არ იყო მოსწავლეთა დასწრება. ეს ძირითადად უამინდობას (თოვას)დაუკავშირეს. ამის გამო კი, ყველა სკოლის ხელმძღვანელმა, როგორც მათ თქვეს, დამრიგებელთა მეშვეობით, ინიდივიდუალური შეტყობინება გაუგზავნეს ყველა მშობელს. მათ მაქსიმალურად უნდა უზრუნველყონ თავიანთი შვილების სკოლაში მოსვლა.
[sexy_author_bio]
